Sin duda, yachachinas Bibliamanta ima caypi aprenderanqui, munayniyquita Jehovaraycu huiñachera. Cá múnay huiñas seguinan tían (1 Pedro 2:2). Suyanayqui únay unáypaj causáypaj dependen, ckaylla Jehovamanta tianayqui tían y Bibliát estudias seguiyta. Juan 17:3 y Judas 21 léey.

Astaan Tata Yayamanta yachaptiyqui, feyqui sinchi ʼruácoj ʼrin y chayna Tata Yayát cusichiyta atinqui (Hebreos 11:1, 6). Fe arrepenticuyta yanapaaycu y causayniycupi cambiusta ʼruayta. Hechos 3:19 léey.

Nacha aprendesckayquita sujcunata nipucuyta munanqui, tucuycunasta gustaaycu alli noticiasta ckoyta. Adelantas ʼris, Bibliát estudias apréndej ʼrinqui Bibliát utilisayta Jehovamanta ʼrimáypaj y alli noticiasmanta ima pay persunáspaj apin. Romanos 10:13-15 cama léey.

Atinquiman ckallariyta ʼrimapucus familiaresniyquita, yanasusniyqui, pero amable y respetuoso canayqui tían. Mana nipucuychu ima creenciasnincu llullas cancu, Yáyap promesasninmanta ʼrimapúcuy. Yúyay, alli cayniyqui y ʼrimasckayquimanta, convencécoj ʼrin. 2 Timoteo 2:24, 25 léey.

Bibliát estudias, feyqui huíñaj ʼrin y suj ancha súmaj amistar Jehovaan ápej ʼrinqui. Y ckam atinqui cayta chayayta Jehóvap familianmanta. 2 Corintios 6:18 léey.

Ama sackeychu Bibliát estudiayta (Hebreos 5:13, 14). Suj Jehóvap testigunta máñay suj cursu Bibliamanta ckosunanta, libruan Biblia, ¿imát yachachiáysh? Astaan aprendeptiyqui, astaan alli ʼrisoncka causayniyquipi. Salmo 1:1-3 y 73:27, 28 léey.

Yúyay, alli noticias ima Biblia apin, Jehová cusiscka Tata Yayamanta amun y ckam astaan payman ckemícoj ʼrinqui, si fieles siruejninuan tantanacunqui (Hebreos 10:24, 25). Y si Jehóvap voluntarninta ʼruas seguíypaj afanacunqui, checka cáusay y únay unáypaj cáusay ápej ʼrinqui. Mana dudas tían astaan súmaj ima ʼruayta atinqui Tata Yayaman ckemicuyta can. 1 Timoteo 1:11 y 6:19 léey.