Preparascka tianayquípaj, ckam tiempuan lecciunta estudianayqui tían, si suj Jehóvap testigun Bibliamanta yachachisushcan. Astaan beneficiacunayquípaj, chaynapas ’ruanayqui tían tantacunasman ’ríypaj. Suj alli programa séguiy chayna beneficiácoj ’rinqui.

Ckáay áicap y maypi estudiayta. ¿Áicap astaan concentracunqui?, ¿Tutamantapi packariptin, manáraj llamcayta ckallaris, o tutapi huahuitas na puñuptincuna? Y si mana apinqui ashca tiempu estudiáypaj, pénsay aica tiempút estúdiaj ’rinqui y ama sackeychu ni imapas arcasunanta estudianayquípaj. Máscay suj alli lugar tranquilu tianayquípaj, maypi ni imapas estorbasuchun ni radiu ni televisiun ni teléfonu. Orayta manáraj ckallaris estudiayta yanapásoj ’rin ckonckanayquípaj preocupacionesniyquita y Yáyap ’Rimayninpi concentracuyta (Filipenses 4:6, 7).

Importantes palabrastas ájllay y preparascka tianayqui tían participáypaj. Huamajta yachanayqui tían imamanta tratácoj ’rin, cháypaj títulu y subtítulus lecciunmanta leenayqui tían y ckaayta imaina relacionasckas tiancu. Dibujusta ckáay y léey tapunas yuyáypaj ima ckaachincu ideasta astaan importantes lecciunmanta. Chaymanta, sapa párrafo leenayqui tían y respuestata mascanayqui tían sapa parrafomanta. Máscay Bibliayquipi testusta ima parrafupi mana escribisckas tiancu y pénsay imaina chá testus yachachincu párrafu nisckanta (Hechos 17:11). Respuestata tariptiyqui, ajllanayqui tían huaquin palabrastas o frases ima yanapasoncka respuestata yuyanayquípaj. Chayna, tantacunapi tiaptiyqui maquiyquít sockariyta atinqui y ckampa ’rimayniyquian suj comentario ’ruayta.

Si estudianqui túcuy ima sapa tantacunapi tratácoj ’rin, astaan mósoj imastis Bibliamanta yáchaj ’rinqui (Mateo 13:51, 52).

• Estudiáypaj, ¿imaina suj programa ’ruayta atinqui?

• ¿Imaina preparacuyta atinqui suj comentariu tantacunapi ’ruáypaj?