Uchilla cashpaca allpata, plantacunatami achcata cꞌuyaj carcani. Ñucanchijca Finlandia llajta Jyväskylä ciudadmantami canchij. Chai cꞌuchullapi saquirij sachacunata, lagunacunatami ñuca familiahuanca casi siempre ricunaman rij carcanchij. Animalcunatapish achcatami cꞌuyani. Uchilla cashpaca misicunata, allquitucunata ricushpaca pugllanatami munaj carcani. Ña huiñarishpaca gentecuna animalcunata maltratajta ricushpami achcata sustarij carcani. Chaimantami animalcunata cuidaj shuj organizacionman yaicurcani. Chaipimi ñuca shinallataj yuyaita charij shujtaj gentecunatapish rijsircani.

Gentecuna animalcunata ama maltratachun, ñucanchij ima yuyashcata shujtajcuna yachachunmi informacionta cuj carcanchij. Shinallataj animalcunapaj cuerota ama cꞌatuchun, animalcunata ama laboratoriocunapi utilizachunmi parocunata ruraj carcanchij. Ultimotaca animalcunata cuidangapaj, difindingapajmi shuj organizacionta huiñachircanchij. Tauca cutinmi parocunata, marchacunata rurashcamanta autoridadcunahuan problemata charij carcanchij. Achca cutinmi ñucataca prezu japishpa juicioman pusharcacuna.

Pero cai mundopi tiyaj shujtaj problemacunamantapishmi sustarij carcani. Chaimantami Amnistía Internacional, Greenpeace nishca organizacioncunata y shujtaj organizacioncunatapish shungumanta apoyaj carcani. Shinallataj pobrecunapaj, yaricaihuan pasajcunapaj derechocunatami difindij carcani.

Tiempohuanca cai mundota mana cambiai tucushcatami cuentata curcani. Maipica uchilla problemacunataca allichi tucurcanchijmi. Pero shujtaj jatun problemacunaca ashtahuan mirarishpami catirca. Millai ruraicuna cai mundopi ashtahuan mirarijpipish mana pi imata rurasha nishcatami sintircani. Ñucapish mana imata rurai tucurcanichu.

Mana imata rurai tucushcamantami sustopina purircani. Chaimantami Diospi yuyai callarishpa Bibliata cutin estudianata munarcani. Ñaupaca Testigocunahuanmi ña Bibliata estudiaj carcani. Pero paicuna cꞌuyaihuan ayudasha nijpipish ñuca yuyaicunata cambiangapajca manaraj listo carcanichu. Pero qꞌuipaca ña mana chashnallataj yuyarcanichu.

Ñuca Bibliata japishpami liyi callarircani. Bibliata liyishpami achca aliviado sintirircani. Achca versocunapica animalcunata alli cuidana cashcatami liyircani. Por ejemplo, Proverbios 12:10-pica: ‘Cashcata ruraj runaca animalcunatapish cuidanmi’ ninmi. Shinallataj cai mundopi tiyaj llaquicunaca mana Diospaj culpamanta cashcata, ashtahuanpish achca gentecuna Diosta mana cazushcamanta achca llaquicuna tiyashcatami intindircani. Yaya Dios cꞌuyaj cashcata, pacienciata charij cashcata yachanami ñuca shunguman chayarca (Salmo 103:​8-14).

Chai tiempopica ¿Bibliaca imatataj yachachin? nishca librota mañangapajmi ñuca datocunata jundachishpa correopi cacharcani. Asha tiempo qꞌuipaca Bibliamanta yachachingapajmi shuj Testigo cusa huarmi ñucata visitarca. Enseguidami Bibliata yachangapaj saquirircani. Shinallataj paicunapaj tandanacuicunamanmi puri callarircani. Asha ashami Bibliapi imalla yachashcacunataca shungumanta valorai callarircani.

Bibliata yachashpami achca cambiocunata rurarcani. Fumanata, yallitaj tragota ubyanatami saquircani. Shinallataj alajatami allichiri callarircani. Ña mana maipish cachun parlajchu carcani. Autoridadcunatapishmi respetai callarircani (Romanos 13:​1). Ñaupaca huainayanaca normalmi can nishpami yuyaj carcani. Pero chashna yuyanata, chashna causanatami saquircani.

Gentecunata, animalcunata difindij organizacioncuna llaquicunata mana tucuchi tucushcata intindinami sinchi carca. Callaripica paicunamanta caruyashpaca mana allita ruracushcatami sintircani. Shinapish Diospaj Gobiernolla gentecunaman sumaj causaita cui tucushcatami intindircani. Chaimantami Diospaj Gobiernota tucui shunguhuan, tucui almahuan apoyarcani. Shinallataj shujtajcunamanmi chai Gobiernomanta yachachircani (Mateo 6:33).

Ñaupaca gentecunataca shujcunataca allita shina, caishujcunataca millaicunata shinami ricuj carcani. Chaimantami millaicunapaj contra shayarij carcani. Cunanca Bibliata yachashcamantami gentecunataca ña mana pꞌiñani. Ashtahuanpish tucuicunata cꞌuyangapajmi esforzarini (Mateo 5:44). Chai cꞌuyaitaca chꞌichan chꞌican ruraicunahuanmi ricuchini. Por ejemplo, Diospaj Gobiernomantami gentecunaman predicani. Chaita rurashcamantami gentecuna sumajta, cushilla causajta ricushpa, shamuj punllapajpish shuj sumaj esperanzata charijta ricushpa cushilla sintirini.

Tucui problemacunata Diospaj maquipi saquishcamantami cunanca tranquilo causani. Tucuita ruraj Diosmi gentecunapish, animalcunapish sufrichun, maltratashca cachunca ña mana saquinga. Cai Allpapish llaquinai tucurichunca mana saquingachu. Diospaj Gobiernomi gentecuna imalla llaquicunata rurashcataca allichinga (Isaías 11:1​-9). Bibliapi yachachishcacunata intindishcamanta, shujtajcunapish chai yachachishcacunapi crichun ayudashcamantami cushilla sintirini. Cai mundota cambiana yuyaicunataca ña mana charinichu.