“Shuj runallamantami juchaca, cai pachamanca yaicurca. Chai juchamantami huañuipish yaicurca. Chashnami tucuicuna juchallishcamantaca, huañuica tucui runacunaman shamurca” (ROMANOS 5:12).

Diosca punta cꞌari Adanman, punta huarmi Evamanca jucha illaj cuerpota, jucha illaj yuyaitami curca. Shinallataj Edén sumaj huertapi causachunmi churarca. Paicunaca chai huertapi pꞌucushca tucui yuracunamantami micui tucurcacuna. Shuj yurapi pꞌucushcallatami mana micuna carcacuna. Shinapish Adán y Evaca Diosta mana cazushpami chai yuramanta micurcacuna. Chaimantami juchayujcuna tucurca (Génesis 2:15-17; 3:1-19). Paicuna mana cazushcamantami Diosca chai huertamanta llujchishpa cacharca. Chai punllamantami paicunapaj causaica sinchi tucurca. Tiempohuanca huahuacunayujmi tucurca. Paicunapaj huahuacunapish sinchi causaitami charircacuna. Y tucuicunami yuyajyashpa huañurcacuna (Génesis 3:23; 5:5). Ñucanchijpish Adanpaj Evapaj huahua huahuacuna cashcamantami ungunchij, yuyajyanchij, huañunchij.

“Cai pachapi millaita rurajcunaca Diablopaj ucupimi” (1 JUAN 5:19).

Shuj angelmi millai tucushpa Diospaj contra tucurca. Chai millai angelca Diablo Satanasmi can (Juan 8:44; Apocalipsis 12:9). Tiempohuanca shujtaj angelcunapishmi  Diablo parte tucurcacuna. Chashnami demoniocuna tucurca. Cai demoniocunaca paicunapaj poderta utilizashpami achca gentecunata pandachishpa Diosmantapish caruyachincuna. Shinallataj achca gentecunatami mana allicunata rurachun pandachincuna (Salmo 106:35-38; 1 Timoteo 4:1). Satanaspish, demoniocunapish ñucanchijcuna llaquita apajta ricushpami cushicuncuna.

“Maijan imata tarpujca, chaillatatajmi tandanga” (GÁLATAS 6:7).

Huaquinpica juchayuj cashcamanta, Diablo cai mundota mandacushcamantami sufrinchij. Pero maipica ñucanchij culpallamantatajmi sufrinchij. Alli cosascunata rurangapaj esforzarishpaca alli resultadotami charishun. Pero mana alli cosascunata rurashpaca llaquicunapimi urmashun. Por ejemplo, shuj yaya honrado cashpa, alli trabajaj cashpa, familiata cꞌuyashpaca familiahuanca cushillami causanga. Pero apuestashpa pugllajpi, mana trabajajpi o machashpalla pasajpica familiaca pobremi saquiringa. Chaimantami Dios alli yachachishcacunata catinata minishtinchij. Chashnami sumaj causaita charishun (Salmo 119:165).

‘Cai punllacuna tucurinapajca quiquinlla alli canata munajcuna, quiquinpajlla charinata munajcuna, yaya mamata mana cazujcuna, mana jarcari tucujcuna, pꞌiña millaicuna, allita pꞌiñajcunami cangacuna’ (2 TIMOTEO 3:1-5).

Cunan punllacunapi causaj gentecunaca cai profeciapi nishca shinami comportarincuna. Chaimantami tucuri punllacunapi causacushcata yachanchij. Shinallataj Diospaj Shimipica tucuri punllacunapica jatun macanacuicuna, yaricaicuna, jatun terremotocuna, ungüicunami tiyanga nircami (Mateo 24:3, 7, 8; Lucas 21:10, 11). Achca gentecunami chaimanta sufrincuna, huañuncunapish.