Shuj avión alli funcionachunmi avionta manejajca paipaj ayudantehuan ishquindij trabajana can. Shinallatajmi cazadocunaca problema ricurijpica mana paicunallapi yuyana can. Chaipaj randica imatapish ishquindij allichinatami yuyarina can.

BIBLIAPICA: “Cusandij huarmindijca shujllami, mana ishquichu” ninmi (Mateo 19:6, QC, 1989).

Shuj runaca: “Cusa huarmi alli causangapajca ishquindijmantami ayudanacuna can” ninmi.

Cusa huarmi ishquindij mana ayudanacushpaca paicunapurami pꞌiñanacungacuna. Problemacunata mana utca allichijpica mirashpami catinga.

Alexandra huarmica: “Cazadocunaca cada quien ima decisioncunata mana agllancunachu. Chaipaj randica imata rurangapajpish ishquindijmi alli yuyarincuna” ninmi.

CAIPI YUYAI

• ¿Trabajashpa cullquita charishpaca ñucapajllami can ninguichu?

• ¿Alli pasangapajca ñuca huarmita o cusata mana minishtinichu nishpachu yuyangui?

• ¿Ñuca huarmipaj o cusapaj familiacuna alli cajpipish paicunahuanca mana apanacunachu cani nishpachu yuyangui?

CUSANDIJ HUARMINDIJ ALLI PARLANACUICHIJ

• ¿Imacunapitaj ishquindij alli trabajanguichij?

• ¿Imapitaj ashtahuan mejorana canguichij?

• ¿Ishquindij trabajangapajca imatataj rurana canguichij?

CAITA RURAI

• Por ejemplo, futbolta pugllajcunaca ganangapajca caishujmanta chaishujmantami ayudanacuncuna. Chashnallatajmi cusandij huarmindij alli causangapajca ishquindijmanta ayudarina can.

• Canpilla yuyanapaj randica ishquindij alli causanapimi yuyana cangui.

Shuj runaca: “Ñucami razonta charini ninapaj randica familiahuan tandalla, sumajta causanami importante can” ninmi.

BIBLIAPICA: “Quiquinpajlla alli canata ama mashcaichijchu. Ashtahuanpish caishujcunapaj alli canata mashcaichij” ninmi (Filipenses 2:3, 4).