Huaquin yaya mamacunaca pi telefonaman cayajpica chaipi cashpapish huahuacunataca, ‘mana caipichu can ni’ nishpami yachachincuna. Pero huahuacuna cazuchun nishpaca ñucanchijrajmi alli ejemplota cuna canchij.

David runaca: “Ima shinami shuj esponja yacuta chupan, chashnallatajmi huahuacunaca yaya mamata ricushpa tucuita yachancuna. Pero ‘caita mana ruranachu cangui’ nishca jahua ñucanchijllataj chaita rurashpaca huahuacunamanca mana allitami yachachicunchij” ninmi.

BIBLIAPICA: “Canca mana shuhuanachu nishpa yachachishca jahuachu ¿shuhuangui?” ninmi (Romanos 2:21).

Jovencitocuna escuelapi cajpica paipaj compañerocunami imapipish ayudanata munancuna. Pero yaya mamacunami huahuacunataca alli ñanpi purichunca ayudana canguichij. Chaipajca cancunami alli ejemplota churana canguichij.

Shuj huarmica: “Huahuacunata ‘caitaca mana ruranachu cangui’ nishpa consejajpipish paicunaca mana uyanata yachancunachu. Pero ñucanchijcuna, ‘chaita mana ruranachu cangui’ nishcata rurajpica chai ratomi paicunaca ñucanchijta reclamancuna. Huahuacunaca ñucanchij rurashcacunata mana ricucuj laya cashpapish paicunaca tucuitami ricuracuncuna” ninmi.

BIBLIAPICA: “Dios cushca yachaita charijca mishqui shimi jayaj shungupish mana canchu” ninmi (Santiago 3:17, QC, 1989).

Caipi yuyai: ¿Cambaj huarmita, cusata, huahuacunataca ima shinataj tratangui? ¿Televisionpica ima programacunatataj ricungui? ¿Ima laya amigocunatataj charingui? ¿Shujtajcunamantaca preocuparinguichu? ¿Huahuacuna jatunyashpaca can layallataj causachunchu munangui?

Christine huarmica: “Ñucapish, ñuca cusapish alli ejemplota cushpami huahuacunamanca yachachinchij” ninmi.

Huahuacunaca yaya mama juchayujcuna cashcataca allimi yachancuna. Pandarishcamanta cambaj huarmita, cusata o huahuacunata perdonta mañajpica huahuacunapish honrados, humildecunami cangacuna.

Robin runaca: “Ñucanchij pandarishcacunamantaca siempremi perdonta mañana canchij. Chashna rurajpimi huahuacunapish perdonta mañanata yachangacuna” ninmi.