YACHAI 29
¿Jatun llaqui punllapajca ñachu allichirishca cangui?
“Cancunapish allichirishca shuyacuichij” (MATEO 24:44).
CANTO 150 Diosca ñucanchijta quishpichijmi
CAITAMI YACHASHUN a
1. ¿Imamantataj allichirishca cana canchij?
MANARAJ llaquicuna tiyajpi ña allichirishca cashcamantami gentecunaca mana huañuncuna. Shinallataj shujtajcunatami ayudai tucuncuna. Chaimantami llaquicuna manaraj tiyajpi allichirinaca minishtirishca can. Caimanta parlashpaca Europamanta shuj ayudaj organizacionca cashnami nin: “Allichirishca cashpaca causashpami cati tucungui”.
2. ¿Jatun llaqui punllapajca imamantataj allichirishca cana canchij? (Mateo 24:44).
2 ‘Jatun llaqui punllaca’ ñapishmi callaringa (Mateo 24:21). Huaquin llaquicunaca mana yuyashcapimi shamun. Pero Jesusca jatun llaqui punlla shamunataca ñami 2.000 huatacuna huashaman huillarca. Chaimantami allichirishca caichij nirca (Mateo 24:44-ta liyipai). Chai punllapaj allichirishca cashpami llaquicunataca ahuantai tucushun, shujtajcunatapish ayudai tucushun (Lucas 21:36).
3. ¿Jatun llaqui punllata ahuantangapajca imatataj minishtishun?
3 Shamuj punllacunapica gentecunamanca sinchi huillaicunatami huillana tucunga. Chaimantami paicunaca ñucanchijpaj contra tucungacuna (Apocalipsis 16:21). ¿Chai sinchi punllacunapajca ima shinataj allichirina canchij? Jehová Diosta cazungapaj, ñucanchijta cuidagrishcapi cringapajca ima llaquitapish ahuantanami canchij. Cutin, ¿chai punllacunapi huauqui panicuna nimahuan saquirijpica imatataj rurashun? (Habacuc 3:17, 18). Paicunata tucuipi ayudangapajca llaquijcuna canatami yachana canchij. Cutin, ¿gobiernocuna ñucanchijta llaquichijpi o shuj uchilla cuartopi huauqui panicunahuan tandalla causana tucujpica imatataj rurashun? (Ezequiel 38:10-12). Cunanmantapachami huauqui panicunata cꞌuyanata yachana canchij.
4. ¿Imamantataj ahuantajcuna, llaquijcuna, cꞌuyajcuna cangapaj esforzarina canchij?
4 Diospaj Shimica ahuantajcuna, llaquijcuna, cꞌuyajcuna cachunmi animan. Por ejemplo, Lucas 21:19-pica: “Tucuringacama ahuantashpaca cancunapaj causaitami quishpichinguichij” ninmi. Cutin, Colosenses 3:12-pica: ‘Tucui shunguhuan llaquij caichij’ ninmi. Shinallataj, 1 Tesalonicenses 4:9, 10-pica: ‘Diosllatajmi cancunamanca caishuj chaishuj cꞌuyanacunata yachachicun. Shinapish huauquicuna, chaita ashtahuan rurashpa catichunmi animanchij’ ninmi. Cai shimicunaca punta siglopi Jesusta sirvijcunapajmi carca. Paicunaca ahuantajcuna, llaquijcuna, cꞌuyajcunami carca. Shinapish paicunaca ashtahuanmi chai cualidadcunataca ricuchishpa catina carcacuna. Ñucanchijcunapish chaillatataj rurangapajmi esforzarishpa catina canchij. Chaipajca ¿imatataj rurana canchij? Cai yachaipica punta siglopi Jesusta catijcuna chai cualidadcunata charingapaj imata rurashcata, ñucanchijcunapish chai cualidadcunata ima shina chari tucushcatami yachashun. Chashnami jatun llaqui punllapajca allichirishca cashun.
LLAQUICUNATA AHUANTASHUNCHIJ
5. ¿Punta siglopi Jesusta sirvijcunaca llaquicunata ahuantangapajca imatataj rurarcacuna?
5 Jesusta catijcunaca llaquicunata ahuantangapajmi esforzarina carcacuna (Hebreos 10:36). Paicunaca Diosta sirvishcamantami ashtahuan llaquicunata charircacuna. Por ejemplo, paicunataca panda religioncunata pushajcuna, autoridadcunapishmi llaquichijcuna carca. Paicunapaj familiacunapishmi paicunapaj contra carcacuna (Mateo 10:21). Shinallataj huauqui panicunata chꞌicanyachingapajmi apostatacunaca pandata yachachijcuna carca (Hechos 20:29, 30). Chai llaquicunata charishpapish paicunaca ahuantashpami catircacuna (Apocalipsis 2:3). ¿Ahuantangapajca imatataj rurarcacuna? Paicunaca ñaupa tiempopi Diosta sirvijcunapimi yuyajcuna carca. Por ejemplo, Jobpimi yuyajcuna carca (Santiago 5:10, 11). Shinallataj Jehová Diostami mañajcuna carca (Hechos 4:29-31). Llaquicunata ahuantashcamanta Jehová Dios bendicianatapishmi seguros carcacuna (Hechos 5:41).
6. ¿Pani Meritapaj ejemplomantaca imatataj yachai tucunchij?
6 Ñucanchijcunapishmi llaquicunataca ahuantai tucunchij. Chaipajca Bibliapi, publicacioncunapi tiyaj ejemplocunapimi yuyana canchij. Chaitami pani Meritaca rurarca. Paipaj familiaca paipaj contrami tucurca. Paica cashnami nin: “Jobpaj ejemploca ñuca shungumanmi chayarca. Paica cꞌuyaillatami sufrirca. Chai llaquicunata Diablo churacushcataca mana yacharcachu. Chashnapish paica Job 27:5-pica cashnami nirca: ‘Huañungacamami ñucaca ima pandata mana rimasha’. Ñucaca Job shina llaquicunataca mana charinichu. Pero cai llaquicunata Diablo churashcataca yachanimi” nircami.
7. ¿Shamuj punllacunapi llaquicunata ahuantangapajca cunanmanta imatataj rurana cangui?
7 Ima llaquita charishcata, ima shina sintirishcatapishmi Jehová Diosmanca cutin cutin huillana canchij (Filipenses 4:6; 1 Tesalonicenses 5:17). Tal vez canca cai ratoca manachari jatun llaquicunata charingui. Pero, asha llaquilla cashpa, pꞌiñarishca cashpa o imata ruranata mana yachashpaca ¿Jehová Diospaj ayudatachu mashcangui? Uchilla cosascunapi Jehová Diospaj ayudata mashcashpaca shamuj punllacunapi ima llaquicuna shamujpipish Jehová Diospaj ayudatami mashcashpa catishun. Jehová Diosca cantaca ima shina ayudanata, ima hora ayudanataca allimi yachan (Salmo 27:1, 3).
AHUANTANAMI CANCHIJ
Shamuj llaquicunata ahuantangapajca cunanmantami llaquicunataca ahuantana canchij. (Párrafo 8-ta ricui).
8. ¿Pani Miramantaca imatataj yachanchij? (Santiago 1:2-4). (Fotomantapish parlapai).
8 Cunan punllacunapi llaquicunata ahuantashpaca jatun llaqui punllacuna shamujpipish ahuantai tucushunmi (Romanos 5:3). ¿Imamantataj chashna ninchij? Achca huauqui panicunaca shuj llaquita ahuantashcamantami shujtaj llaquicunatapish ahuantai tucushcacuna. Chai llaquicunata ahuantangapaj Jehová ayudajta ricushpaca paipimi ashtahuan confiashcacuna (Santiago 1:2-4-ta liyipai). Mira shuti precursora panica huaquinpica pailla achca llaquicunata charishcatami yuyan. Chai yuyaicuna shamujpica paica cashnami nirin: “Cai 20 huatacunataca llaquicunata charishpapish Jehová Diostami sirvi tucushcani. Paillatajmi ñaupajman catichun ayudashca. Chaimantami paitaca sirvishpa catina cani”. Canpishmi llaquicunata ahuantangapaj Jehová Dios ima shina ayudashcata yuyarina cangui. Shinallataj llaquicunata ahuantajpi canta bendicianataca manataj cungarinachu cangui (Mateo 5:10-12). Chashnami shamuj punllacunapica llaquicunataca ahuantashpa catingui.
LLAQUIJCUNA CASHUNCHIJ
9. ¿Antioquiamanta huauqui panicunaca shujtajcunata ayudangapajca imatataj rurarcacuna?
9 Shuj cutinca Judeamanta huauqui panicunaca micungapajca imata mana charircacunachu. Antioquiamanta huauqui panicuna chaita yachaj chayashpaca paicunata ayudanatami munarcacuna. Chaimantami paicunaca “Judea llajtapi causaj huauqui panicunata ayudangapaj paicuna imalla cui tucushcata cachanata yuyarircacuna” (Hechos 11:27-30). Judeamanta huauqui panicuna carupi causashca cajpipish Antioquiamanta huauqui panicunaca shungumantami ayudarcacuna (1 Juan 3:17, 18).
LLAQUIJCUNA CASHUNCHIJ
Llaquicuna tiyajpica shujtajcunatami ayudana canchij. (Párrafo 10-ta ricui).
10. ¿Huauqui panicuna llaquicunata charijpica ima shinataj ayudai tucunchij? (Fotomantapish parlapai).
10 Huauqui panicuna llaquicunata apacujta yachaj chayashpaca ñucanchijpishmi ayudai tucunchij. ¿Ima shina? Tal vez imapi ayudai tucushcatami ancianocunata tapui tucunchij. Shinallataj llaquipi cajcunata ayudachunmi contribucioncunata cushpa ayudai tucunchij. Mana cashpaca llaquicunata ahuantachunmi huauqui panicunamanta mañana canchij (Proverbios 17:17). b Por ejemplo, 2020 huatapi COVID-19 ungüi callarijpica huauqui panicunata ayudangapajmi 950 yalli Comités de Socorro tiyarca. Chaipi ayudajcunaca huauqui panicunata achcata cꞌuyashcamantami imalla minishtishcata cushpa ayudarcacuna. Shinallataj espiritualmente sinchi cachunmi ayudarcacuna. Huaquinpicarin paicunapaj huasicunata, Tandanacuna Huasicunatapish allichishpami ayudarcacuna. Chaimantami paicunataca achcata agradicinchij (2 Corintios 8:1-4-ta ricui).
11. ¿Shujtajcunata ayudajpica huaquincunaca imatataj rurasha ningacuna?
11 Llaquicuna tiyai horas shujtajcunata ayudajpica maijancunaca sorprendidosmi saquirincuna. Por ejemplo, 2019 huatapica Bahamas llajtapica shuj jatun acapanami Tandanacuna Huasita urmachirca. Huauqui panicuna Tandacuna Huasita allichicushpaca huaquin trabajocunata rurachunmi shuj empresata contratasha nircacuna. Chaimi shuj runataca ¿mashnata cobragringui? nishpa tapurcacuna. Paica: “Cancunaca cancunapurami cꞌuyaihuan ayudaringuichij. Ñucapishmi cancunataca ayudasha nini. Chaimantami cancunapaj Tandanacuna Huasita allichichun herramientacunata, materialcunata, trabajajcunatapish imata mana cobrashpa cugrini” nircami. Achca gentecunaca manaraj Jehová Diosta rijsincunachu. Pero paita sirvijcuna shujtajcunata ayudaj cashcatami ricuncuna. Chaimanta llaquijcuna cangapaj esforzarishunchij. Chashnami paicunataca “yallitaj llaquij” Diosta rijsichun ayudashun (Efesios 2:4).
12. ¿Imamantataj cunanmantapacha llaquijcuna cana canchij? (Apocalipsis 13:16, 17).
12 Jatun llaqui punllacunata ahuantangapajca shujtajcunata llaquishpami ayudana canchij. Bibliapi nishca shinaca gobiernocunata mana apoyashcamantami cunan punllacunapi, shamuj punllacunapipish llaquicunata charishun (Apocalipsis 13:16, 17-ta liyipai). Llaquicuna ashtahuan mirashpa catijpimi huauqui panicunaca imalla minishtishcata cushpa ayudachun minishtingacuna. Jesús gentecunata juzganaman shamujpi Diosta sirvijcuna shujtajcunata ayudacujta ricushpaca cushillami sintiringa. Chaipimi paica: “Diospaj Gobierno cushca bendicioncunata japichij” ninga (Mateo 25:34-40).
HUAUQUI PANICUNATA ASHTAHUAN CꞌUYASHUNCHIJ
13. ¿Primer siglopi causaj huauqui panicunaca ashtahuan cꞌuyaita ricuchingapajca imatataj rurarcacuna? (Romanos 15:7).
13 Jesusta punta catijcunaca paicunapurami cꞌuyanacujcuna carca. Chaitami gentecunaca alli yacharcacuna. Pero ¿paicunapura cꞌuyaita ricuchinacunaca jahuallachu carca? Roma congregacionpi caj huauqui panicunapi yuyashun. Maijancunaca judiocunami carca. Paicunaca Moisesman cushca leyta yachashpami huiñashcacuna carca. Shujtajcunaca shujtaj llajtacunamantami carcacuna. Chaimi paicunaca chꞌican chꞌican culturacunata charircacuna. Shujtajcunaca esclavocuna, shujtajcunaca mana esclavocuna, shujtajcunacarin amocunami carca. Paicunapura alli apanacungapajca ¿imatataj rurana carcacuna? Apóstol Pabloca: “Caishuj chaishuj alli chasquinacuichij” nishpami consejarca (Romanos 15:7-ta liyipai). Shinaca paicunaca huasipi alli chasquij shinami cꞌuyaihuan, alli tratanacuna carca. Por ejemplo, Pabloca Filemontami: ‘Cambaj huasimanta miticushpa rij Onesimota alli chasquipai’ nirca (Filemón 17). Shinallataj Priscila y Aquilaca Jesuspaj yachachishcacunamanta Apolosta yalli yachashpapish paitaca allimi tratarcacuna. Qꞌuipacarin paicunahuanmi Apolostaca apashpa rircacuna (Hechos 18:26). Jesusta punta catijcuna chꞌican chꞌican cashpapish paicunapuraca cꞌuyaita ricuchishpami catircacuna. Chaimantami cꞌuyaihuan, alli tratanacurcacuna.
CꞌUYAITAMI RICUCHINA CANCHIJ
Tucui huauqui panicunatami cꞌuyana canchij. (Párrafo 15-ta ricui).
14. ¿Annapish, paipaj cusapish shujtajcunata cꞌuyashcataca ima shinataj ricuchirca?
14 ¿Huauqui panicunata cꞌuyashcataca ima shinataj ricuchinchij? Paicunataca allimi chasquina canchij. Ashtahuan rijsingapajpishmi tiempota surcuna canchij. Chaita rurajpica paicunapishmi ñucanchijtaca alli tratangacuna (2 Corintios 6:11-13). Chaitami Annapish, paipaj cusapish rurarcacuna. Paicunataca África llajtapi sirvichunmi cacharcacuna. Pero chaiman chayashca qꞌuipallami COVID-19 ungüi tiyai callarirca. Chaimi huauqui panicunahuanca ña mana tandanacui tucurcacuna. Pero paicunata cꞌuyashcata ricuchingapajca ¿imatataj rurarcacuna? Paicunataca videollamadata rurashpami cayarcacuna. Chaita rurashcamantami huauqui panicunaca cushilla sintirircacuna. Chaimantami paicunapish paicunata agradicingapaj telefonopi cayarcacuna, mensajecunatapish cacharcacuna. ¿Pani Annapish, paipaj cusapish imamantataj huauqui panicunata rijsingapaj esforzarircacuna? Pani Annaca: “Turi ñañacunaca ñucatapish, ñuca familiatapish achcatami ayudarcacuna. Chaitami siempre yuyarini. Chaimantami ñucapish shujtajcunata ayudanata munani” ninmi.
15. ¿Pani Vanessaca shujtajcunata cꞌuyashcataca ima shinataj ricuchirca? (Fotomantapish parlapai).
15 Congregacioncunapica chꞌican chꞌican huauqui panicunami tiyan. ¿Tucuicunahuan alli apanacungapaj, paicunata cꞌuyangapajpish imatataj rurana canchij? Paicunapaj alli cualidadcunatami ricuna canchij. Pani Vanessaca chaitami rurarca. Paica huaquin huauqui panicuna ima shina cashcataca mana tanto munarcachu. Pero paicunamanta caruyanapaj randica paicunahuan tiempota pasangapajmi esforzarirca. Chashnami paicunamanta Jehová imata munashcata ricurca. Pani Vanessaca cashnami nin: “Cunanca ñuca cusaca superintendentemi can. Chaimi chꞌican chꞌican turi ñañacunata rijsishcanchij. Paicunahuan apanacunaca cunanca jahuallami can. Jehová Diosca paipaj organizacionmanca tucui laya gentecunatami pushamushca. Chaimantami ñucapish tucuicunahuan apanacungapaj esforzarini”. ¿Ñucanchijpish huauqui panicunata cꞌuyashcataca ima shinataj ricuchi tucunchij? Paicuna Jehová Diosta sirvingapaj mashnata esforzaricushcatami ricuna canchij (2 Corintios 8:24).
Jatun llaqui punllacunapi huauqui panicunamanta mana caruyajpica Jehová Diosca cuidangami. (Párrafo 16-ta ricui).
16. ¿Jatun llaqui punllacunapica imamantataj huauqui panicunata cꞌuyanaca minishtirishca canga? (Fotomantapish parlapai).
16 Jatun llaqui punllacunapica huauqui panicunata cꞌuyanaca ashtahuan minishtirishcami canga. ¿Chai punllacunapi Jehová Dios ñucanchijta cuidachunca imatataj rurana canchij? Israelitacunapi yuyashunchij. Babilonia llajtata llaquichicujpica quishpiringapajca Jehová Dios nishcatami cazuna carcacuna. Paica: “Ñuca agllashcacunalla richij, cancunapaj huasiman yaicurichij. Pai alli tucungacama punguta huichcarishpa pungu huashapi ashacama miticuichij” nishpami mandarca (Isaías 26:20). Ñucanchijcunapish jatun llaqui punllacunapica cashna laya mandashcacunatachari cazuna tucushun. Isaías libropi ‘cancunapaj huasiman yaicurichij’ nishpaca congregacioncunamantami parlacuj yuyachin. Chai punllacunapi huauqui panicunamanta mana caruyajpica Diosca quishpichingami. Chaimantami paicunataca mana nij tucushpallachu cꞌuyana canchij. Paicunataca shungumantami cꞌuyana canchij. Cꞌuyaita mana ricuchishpaca manachari quishpirishun.
CUNANMANTAPACHA ALLICHIRISHUNCHIJ
17. ¿Imamantataj jatun llaqui punllacunapajca cunanmantapacha allichirina canchij?
17 ‘Jehová Diospaj jatun punllaca’ tucuicunapajmi llaqui punlla canga (Sofonías 1:14, 15). Jehová Diosta sirvijcunapishmi llaquicunata charishun. Pero cunanmantapacha allichirishpaca tranquilosmi cashun. Jehová Diospaj ayudahuanmi ima llaquicunatapish ahuantai tucushun. Shinallataj llaquijcuna cashpaca huauqui panicunata tucuipi ayudangapajmi listos cashun. Ashtahuancarin cꞌuyaita ricuchinami tandalla cachun ayudanga. Chaita rurajpica Jehová Diosca Paraíso Allpapimi huiñai causaita cushpa bendicianga. Chaipica llaquicunaca ña mana tiyangachu (Isaías 65:17).
CANTO 144 Sumaj causaipi yuyashunchij
a Ñallami jatun llaqui punllacuna callaringa. Chai punllacunaca sinchi punllacunami canga. Chaimantami llaquicunata ahuantanata, llaquij canata, cꞌuyanatapish yachana canchij. Cai yachaipica punta siglopi Jesusta catijcuna llaquicunata ahuantangapaj, llaquijcuna, cꞌuyajcuna cangapaj imata rurashcatami yachashun. Ñucanchijpish paicuna shina cangapaj imata rurana cashcatapishmi yachashun.
b Llaqui tiyai horas ayudasha nishpaca Solicitud de voluntario local de diseño y construcción (DC-50) o Solicitud para el programa de voluntarios (A-19) nishcacunatami jundachina cangui. Chai solicitudcunata ña jundachishpaca cayangacamami shuyana cangui.