¿Quiquin uchilla cashpa urmashcata yuyaringuichu? Urmashpaca maqui huajtarishpa sanpipish chugrirircanguichari. ¿Cambaj mamitaca imatataj rurarca? Cꞌuyashpami ama huacaichu nishpa, ugllashpa inquitashca canga. Chugririshcatapish jambishpami ayudashca canga. Can huahua cashpa llaquilla cajpica siempremi cambaj mamitaca ayudashca canga.

Achca huatacuna pasajpica ashtahuan sinchi llaquicunatami charinchij. Chai llaquicunahuan cajpica ñucanchijta cushichishpa ayudachunmi minishtinchij. Pero ñucanchijta pi cushichijca mana tiyanllachu. Jatunyashpaca sinchi problemacunatami charinchij. Pero chai problemacunaca mamita ugllajllapi, jambijllapica mana anchunchu. Huaquincuna ima llaquicunata charishcata ricushun.

• ¿Cambaj trabajomanta llujshichishpa cachashcamanta llaquillachu cangui? Julián runaca: “Trabajomanta llujshichijpica ñucaca yallitajmi sustarircani. ¿Ñuca familiataca ima shinataj mantinishari? Cai trabajopica achca huatacunatamari cashcani. Mana alli trabajajpichu caimantaca llujshichishpa cachan imatajgari” nircami.

• ¿Divorciarishcamanta llaquillachu cangui? Raquel huarmica: “Ñuca cusaca 18 huatacuna huashamanmi shitashpa rirca. Chaimantami yallitaj llaquirishpa causarcani. Ñuca shungupish, ñuca tucui cuerpopish nanaihuanmi causarcani. Achca manchaitami charircani” ninmi.

• ¿Shuj millai ungüihuanchu cangui? ¿Cambaj ungüimanta manachu alliyai tucungui? Diosta servij Job runa layachari sintiringui. Paica: ‘Ñuca causaitaca pꞌiñanayanmi, manataj causasha ninichu’ nircami (Job 7:16). Mana cashpaca 80 huatacunata charij Luis runa layachari sintiringui. Paica: “Huaquinpica huañui japichunllami shuyani” ninmi.

• Cambaj cꞌuyashca familia huañushcamanta llaquillachari cangui. Robert runaca: “Cambaj churica shuj accidentepimi huañurca nishpa huillajpica ñucaca mana crisha nircanichu. Chaita uyashpaca ‘shuj espada ñuca shunguta chaupij shinami tullu ñutcucama’ llaquirircani” ninmi (Lucas 2:35).

Julián, Raquel, Robert, Luispish jatun llaquicunata chꞌimbapurajpica tucuita rurai tucuj Diosmi paicunata cushichishpa ayudarca. ¿Canpish llaquicunahuan cajpica Diosca ayudangachu? ¿Diosca ima shinataj cushichishpa ayudan?