• Yaya Diosmi agllana carca. “Ñuca churashca jatun mandajtami churarcani”. “Can japina cashcataca llajtacunatami cusha. Inti llujshinmanta, inti huashicuncama, tucui cai pachatami canman cusha” (Salmo 2:6, 8).

• David mandashpa tiyanapimi tiyarina carca. “Ñucanchijmanca churitamari cushca, chai huahuamari huacharishca”. “Pai mandanaca ashtahuanmi mirashpa catinga. Pai mandacujpica sumaj causaimi tiyanga. Chai mandanaca mana tucuringachu. David mandashpa tiyanapimi tiyaringa” (Isaías 9:6, 7).

• Belén pueblopimi huacharina carca. ‘Belén pueblolla, canmantami Mandajca llujshinga’. “Mandaj Dios jatunyachishca cashpami, chai mandajca tucui cai pachata mandanga” (Miqueas 5:2, 4).

• Yanganchishca huañuchishcami cana carca. “Tucuicunami mana ricunachircanchij. Tucuicunami mana munarcanchij”. “Paica ñucanchij cꞌariyashcacunamantami chugrichishca carca. Ñucanchij juchacunamantami paica molirishca carca” (Isaías 53:3, 5).

• Causachishca jatunyachishcami cana carca. “Ñuca almataca Seolpica mana saquinguichu. Cambajlla caj ñuca aicha ismuchunpish mana saquinguichu”. “Cambaj alli ladopica huiñaita sumajmari” (Salmo 16:10, 11).

Cai nishcacunaca Jesusllapimi pajtarirca. Shuj angelca Mariamanca: ‘Mandaj Diosca, Davidpaj jatun tiyarinatami paimanca cunga. Paipaj mandanaca, manataj tucuringachu’ nircami (Lucas 1:31-33).

Jesús cai Allpapi cashpaca mana Rey tucurcachu. Pero cunanca jahua pachapi Diospaj Gobiernopi Rey cashcamantami gentecunata ñalla mandanga. ¿Imamantataj Jesusca alli Rey can? Jesús cai Allpapi cashpa imalla rurashcata ricushun.

•   Jesusca gentecunamantami preocuparirca. Paica cꞌaricunata, huarmicunata, jovencunata, mayorllacunatami ayudaj carca. Gentecuna maimanta cajpipish, pobre cajpipish o charij cajpipish ayudajllami carca (Mateo 9:36; Marcos 10:16). Shuj cutinca lepra ungüihuan caj runami Jesustaca: “Ñucata alliyachisha ninguipishchari” nirca. Chaimi Jesusca paimanta llaquirishpa jambirca (Marcos 1:40-42).

• Jesusca Diospaj ñaupajpi alli cangapaj imata rurana cashcatami yachachirca. Paica: “Taita Diostapish, charinacunatapish” ishquipajtaca pi mana rurai tucunchu nircami. Shinallataj shujtajcuna ñucanchijta alli tratachun munashpaca chashnallatajmi paicunatapish tratana canchij nircami. Jesusca, Yaya Diosca mana ñucanchij rurashcacunallatachu ricun, paipajca ñucanchij ima yuyashca, ima shina sintirishcapish valishcami can nircami. Chaimantami Diospaj ñaupajpi alli cangapajca ñucanchij shunguta cuidana canchij (Mateo 5:28; 6:24; 7:12). Shinallataj Jesusca cushilla causangapajca Yaya Diospaj munai maijan cashcata yachashpami chaita pajtachina canguichij nircami (Lucas 11:28).

• Jesusca cꞌuyaj canatami yachachirca. Paipaj tucui yachachishcacunaca gentecunapaj shungumanmi chayaj carca. Bibliapica, Jesús yachachijpica paita uyajcunaca achcatami mancharircacuna. Paica shuj mandaj shinami yachachirca ninmi (Mateo 7:28, 29). Jesusca cancunata pꞌiñajcunatapish cꞌuyanguichij nircami. Paillatajmi paita huañuchigrijcunamantaca: “Yayitu, paicunaca imata ruracushcataca mana yachancunachu, perdonapailla” nishpa mañarca (Mateo 5:44; Lucas 23:34).

Jesusca alli mandajmi can. Ima shina mandanataca allimi yachan. Paica ñucanchijta cꞌuyashcamantami ayudasha nin. Pero, ¿ima horataj cai Allpata mandai callaringa?