Doctor Rick Hanson runaca: “Tucuicunami shujtajcuna llaquicunahuan cajpica, paicuna ima shina sintirishcataca alli intindijcuna canchij. Chashna rurana munaihuanmi nacirinchij” nircami.

CAIPI YUYAI: Humano gentecunallami shujtajcunamantaca preocuparinchij. Animalcunaca mana chaita rurai tucunchu. ¿Imamantataj ñucanchijca shujtajcunamanta preocuparinchij? Diosman rijchaj rurashca cashcamantami shina preocuparinchij (Génesis 1:26, QC, 1989). Chaimantami Yaya Dios shina shujtajcunatapish cꞌuyaihuan tratanchij. Cꞌuyaihuan tratashpami Diospaj huahuacuna cashcata ricuchinchij (Proverbios 14:31).

Yaya Diosca llaquicunahuan causachunca mana munanchu. Por ejemplo, israelitacunaca Egipto llajtapica llaquinaitami causarcacuna. Chai qꞌuipaca 40 huatacunatami shitashca pambata purircacuna. Israelitacuna llaquilla cajta ricushpami ‘Diosca shungu chaupirishpa llaquirirca’ (Isaías 63:9, QC, 1989). Chaimantami: Israelitacunata “llaquichicujpi paicuna caparishcataca uyanimi” nirca (Éxodo 3:7). Shinallataj Diosca: ‘Maijanpish cancunata llaquichishpaca, ñuca ñahuita ricucujta tujsicuj shinami llaquichicun’ nircami (Zacarías 2:8). Ñucachijta pi llaquichishpaca Yaya Diosta llaquichicuj shinami can.

Huaquinpica achca problemacunata charishcamantami Diospaj cꞌuyaitaca mana mericinichu ninchij. Pero Diosca ñucanchijcuna ima shina sintirijta, ima shina yuyajtaca allimi yachan. Chaimantami Bibliapica: “Dioscarin ñucanchij shungutapish yalli tucuita yachajmari” nin (1 Juan 3:19, 20).

 Bibliapica cashnami nin:

• “Chaipica Mandaj Diosta mañanguimi, paica can mañashcata uyangami. Can caparishpa mañajpica paica: Caipimi cani ningami” (ISAÍAS 58:9).

• “Ñuca cancunapaj imallata ruranataca ñucamari yachani. Cancunapajca llaquitaca mana cachashachu, ashtahuanpish sumaj causaitami cugrini. Cancuna shuyacushcatatajmi cusha. Chaipica ñucata mañanguichijllami. Ñucapajman shamushpa mañashcataca ñucapish uyashallami” (JEREMÍAS 29:11, 12).

• “Ñuca huiquicunatapish quiquinllatajmi vidrio huallupi churashpa charicungui” (SALMO 56:8).

¿Ñucanchij llaquicunata Dios ricujta yachashpaca ima shinataj sintirinchij? Cunanca Mariapaj ejemplota ricushun.

Mariaca: “Ñuca churica 18 huatacunata charishpami cáncer ungüihuan llaquinaita sufrishpa huañurca. Chaita ricushpami ¿caichu chaichu tucuna carcani? nishpa dimastij llaquirircani. Shinallataj ¿cai ungüitaca imamantataj Diosca mana jarcan? nishpami Dioshuanpish achcata culirarcani” ninmi.

Shinallataj Mariaca: “Yaya Dios ñucata cungarishcatami sintircani. 6 huatacuna qꞌuipami ñuca ima shina sintirishcataca ñuca amigaman huillarcani. Ñuca amigaca alaja geniotami charirca. Achca horascunata ñuca parlashcata uyashca qꞌuipami 1 Juan 3:19, 20-pi ima nishcata yuyachirca. Chaipica: ‘Dioscarin ñucanchij shungutapish yalli tucuita yachajmari’ ninmi. Caihuanca Dios ñucanchij llaquicunata alli yachaj cashcatami intindichirca” ninmi.

Mariaca: “Ñuca amiga chashna yachachijpipish Yaya Dioshuanca resintirishpami catircani. Chaimi Salmo 94:19-ta liyircani. Chaipica, ‘llaquicunahuan ñuca musparicujpipish, canmari cushichishpa ñuca almata samachihuarcangui’ ninmi. Caita liyishca qꞌuipami Jehová Diosmanca ñuca ima shina sintirishcata tucuita huillarcani. Chashna mañashpami tranquila sintirircani” ninmi.

Dioslla ñucanchij llaquicunata intindij cashcata yachashpaca cushillami sintirinchij. Pero ¿imamantataj achca llaquicuna tiyan?, ¿Yaya Dioschu ñucanchij juchacunamanta castigacun?, ¿tucui llaquicunataca Dioschu chingachinga? Caitaca catij temapimi yachashun.