HUAQUINCUNACA cunan punllacunapica Bibliapaj yuyaicunaca imapaj mana valinchu nincunami. Por ejemplo, shuj doctorca: ‘1920 huatapi llujshishca librohuan clasesta cungapajca mana sirvinmanchu. Chashnallatajmi Bibliaca ñaupa tiempo quillcashca cashcamanta cunan punllacunapi imapaj mana sirvin’ nircami. Cutin shujtaj gentecunaca: ‘Shuj mushuj computadorata manenajata yachangapajca mana vieja computadorapaj manualta ricushpachu yachai tucushun. Chai shinallataj Bibliaca ñaupaman quillcashca cashcamanta cunan punlla causaipajca imapaj mana valinchu’ nincunami.

Cunan punllacunapica gentecuna alli causachun munashpami Internetpica achca ayudacunata churancuna. Shinallataj televisionpica achca yachajcuna, doctorcuna, sicologocunami achca consejocunata cuncuna. Familiacuna alli causachun munashpami achca librocunata, revistacunatapish llujshichishcacuna. Chashna librocunata rurajcunaca achca cullquitami ganancuna. Cai tucui ayudacuna tiyajta ricushpami achca gentecunaca Bibliapaj yuyaicunataca ña mana valichincuna.

Maijancunaca, Bibliaca achca huatacuna huashaman escribishca cashcamantami ñucanchijtaca mana ayudai tucun nincunami. ¿Ñaupa librocuna shina o shuj manual ña mana valishca layachu Bibliaca canga? Mana. Cienciapish tecnologiapish ratomi cambiarinlla. Pero gentecunaca mana cambianchijchu. Ñaupa tiempomanta cunancamami tucuicuna cushilla canata, alli causanata, alli amigocunata charinata munanchij.

Bibliataca Yaya Diosmi quillcachirca. Chaimantami ñaupa tiempopi quillcachishca cashpapish gentecuna ima shina cushilla causanata alli yachachin. Shinallataj problemacuna ricurijpi ima shina allichina cashcatapishmi yachachin (2 Timoteo 3:16, 17). Bibliapica: “Diospaj Shimica causajmi” ninmi (Hebreos 4:12). Cai versopi nishca shinaca Bibliapaj yuyaicunaca huiñaitami ayudashpa catin tucun. Chaimantami mana shujtaj librocuna shina can.

Cai revistata leyishpami Hebreos 4:12-pi nishcaca cierto cashcata yachangui. Shinallataj Bibliapaj yuyaicuna cushilla causangapaj ima shina ayudaj cashcatapishmi ricungui.