Cai shimicunataca yallitaj sustarishca cana ungüihuan o dimastij llaquilla cana ungüihuan caj gentecunami nishca. ¿Tal vez canpishchu chashna sintirishcangui? ¿O shuj cꞌuyashca amigo o familia chashna sintirishcatachu ricushcangui?

Achca gentecunami yallitaj sustarishpalla purina ungüita charincuna. Mana cashpaca paicunapaj familiacuna o amigocunami chashna sintirincuna. Chaimantami canlla cai ungüihuan sufricushcataca mana yuyana cangui.

Cunancunaca mana ahuantaipaj sinchi, llaqui punllacunapimi causacunchij. Chaimantami achcacunaca dimastij preocuparincuna (2 Timoteo 3:1). Huaquin yachaj runacunaca: “Muyundij allpapica ocho gentecunamanta shujmi yallitaj llaquirina o depresión ungüita, yallitaj sustarina o ansiedad nishca ungüita charincuna” nincunami. a 2020 huatapicarin COVID-19 ungüi tiyashcamantami 28 millón gentecunahuan depresión ungüita o ansiedad ungüita chari callarishcacuna.

Mashna gentecuna depresión o ansiedad ungüita charishcata yachanaca allimi can. Pero ashtahuantajca can o cambaj cꞌuyashca familia cutin alli sintiringapaj imata rurana cashcata yachanami ashtahuan importante can.

Sano yuyaita charijcuna o yuyaipi alli cajcunaca casi siempremi alli sintirincuna. Punllanta imatapish rurangapajmi fuerzasta charincuna. Shinallataj ocupado cashpapish, problemacuna ricurijpipish chaicunata ima shina allichinatami yachancuna. Paicunaca alli trabajajcunami can. Paicunapaj causaihuanpish cushillami sintirincuna.

• Cai laya ungüicunata charijcunaca mana paicunapaj culpamantachu yallitaj sustarishcalla, dimastij llaquilla sintirincuna.

•   Cai ungüicunata charijcunaca ratomi imamantapish yallitaj sustarincunalla. Paicunapaj yuyaimanpish ñapishmi llaquichij yuyaicuna shamunlla. Maipicarin imatapish mana alli yuyashpami rurancunalla.

• Cai laya ungüita charijcunaca shujtajcunahuanca mana alli apanacui tucuncunachu. Punllanta imatapish mana jahualla rurai tucuncunachu.

• Ima edadta charijpipish, maijan culturamanta cajpipish, ima religionta charijpipish, estudiado o mana estudiado cajpipish, charij o pobre cajpipish cai ungüicunaca pitapish japinllami.

Can o cambaj familia diferente comportari callarijpi, yallitaj o ashallata dormirijpi o micui callarijpi, dimastij sustarishca o llaquilla purijpica pi ayudachunmi minishtinguichij. Shuj doctormi chai ungüita imamanta charishcata, chai ungüimanta jambingapaj imata rurana cashcatapish huillai tucun. ¿Ayudachunca pitataj mashcanguiman?

Tucuita alli yachaj runa Jesucristoca: “Sano gentecunaca jambijtaca mana minishtincunachu. Ungushcacunami jambijtaca minishtincuna” nircami (Mateo 9:12). Ungüita charijcunaca doctorpajman rishpa, alli tratamientota catishpa, alli jambicunata ubyashpaca cutinmi alli, cushilla sintiri callarincuna. Canpish yallitaj sustarishca o dimastij llaquilla sintirishparajca shuj doctortami mashcana cangui. b

Bibliaca ima shina ungushcacunata jambina cashcataca mana yachachinchu. Pero chaipi tiyaj consejocunami ñucanchij yuyaipi, shungupi tranquilo sintirichun ayudan. Yallitaj sustarishca causajcunapaj, dimastij llaquilla sintirijcunapaj Biblia ima consejocunata cushcataca cai catij yachaicunapimi ricungui.