Hechos 5:1-42
-
Ananiaspish, Safirapish (1-11)
-
Apostolcuna achca milagrocunata rurashcamanta (12-16)
-
Carcelpi churashcamanta, cacharichishcamantapish (17-21a)
-
Mandaj juezcunapajman cutin pushashcamanta (21b-32)
-
Gentecunata cazunapaj randi Diosta cazunamanta (29)
-
-
Gamaliel nishcata uyashcamanta (33-40)
-
Huasin huasin rishpa huillashcamanta (41, 42)
5 Shinallataj Ananías shuti runapish, paipaj huarmi Safirapishmi shuj allpata cꞌaturcacuna.
2 Shinapish paica cꞌatushca cullquimantaca ashatami japirca. Chaitaca piman mana huillarcachu, paipaj huarmillamanmi huillarca. Caishuj asha cullquitaca apostolcunapajmanmi aparca.
3 Ashtahuanpish Pedroca cashnami nirca: “Ananías, espíritu santota llullashpa allpata cꞌatushca asha cullquita pacalla japingapajca, ¿ima nishpataj Satanás pandachichun saquircanguiyari?
4 ¿Manaraj cꞌatujpica chai allpaca manachu cambajllataj carca? ¿Cꞌatushca qꞌuipapish chai cullquihuanca manachu canllataj imatapish rurai tucurcangui? ¿Ima nishpataj cambaj shungupica mana allita ruranata yuyarircanguiyari? Mana runacunamanchu llullashcangui, ashtahuanpish Diosmanmi llullashcangui” nirca.
5 Chashna nijta uyashpami Ananiasca chai rato pambaman urmashpa huañurca. Shina tucushcata yachaj chayajcunapish tucuicunami achcata mancharircacuna.
6 Ashtahuanpish huaquin joven runacuna shamushpami Ananiastaca telahuan pilluchishpa chaimanta llujshichishpa pambarcacuna.
7 Casi quimsa horas qꞌuipami paipaj huarmipish chaiman yaicurca. Shinapish paica ima tucushcataca mana yacharcachu.
8 Chaimi Pedroca paitaca: “¿Cancuna cꞌatushca allpamantaca cai cullquillatachu japircanguichij?” nishpa tapurca. Chashna tapujpimi paica: “Ari, chaillatami japircanchij” nirca.
9 Shina cutichijpimi Pedroca: “¿Cancunaca ima nishpataj ishquindij shuj yuyailla tucushpa Jehová* Diospaj espiritutaca umasha yuyarcanguichij? ¡Ricui! Cambaj cusata pambajcunaca ñami pungullapi, cantapish chashnallatajmi llujshichingacuna” nirca.
10 Chashna nijpica chai ratomi Pedropaj ñaupajpi urmashpa paipish huañurca. Joven runacuna yaicushpaca chai huarmi huañushca siricujtami japircacuna. Chaimantami paitapish llujshichishpa paipaj cusapaj ladopi pambarcacuna.
11 Chashna tucushcata uyashpaca, Jerusalenpi caj Jesusta catijcunapish,* tucui shujtaj gentecunapishmi achcata mancharircacuna.
12 Apostolcunaca milagrocunata, jatun mancharina ruraicunatapishmi gentecunapaj ñaupajpi rurashpa catircacuna. Paicunaca Salomón nishca Corredorpimi tandanacujcuna carca.
13 Ashtahuanpish shujtajcunaca manchaimantami paicunahuanca mana tandanacushun nircacuna. Shinapish tucui gentecunami paicunamantaca allita parlajcuna carca.
14 Achca cꞌaricunapish, huarmicunapishmi Amitopi crircacuna. Chashnami Jesusta catijcunaca ashtahuan mirarishpa catircacuna.
15 Ashtahuanpish gentecunaca Pedro chaita pasacushpa huaquincunallatapish paipaj llandu japishpa alliyachichun nishpami, ungushcacunataca jatun ñancunaman llujshichishpa uchilla camacunapi, camillacunapipish churajcuna carca.
16 Jerusalén cꞌuchulla llajtacunapi causaj achca gentecunapishmi ungushcacunata, millai espiritucuna llaquichishcacunatapish pushamurcacuna. Chaicunaca tucuicunami alliyachishca carcacuna.
17 Shinapish sacerdotecunata jatun mandajca paihuan caj saduceocuna yachachishcata catijcunahuan tandanacushpami envidiamanta achcata pꞌiñarishpa jatarircacuna.
18 Chashna jatarishpami paicunaca apostolcunata japishpa chai llajta carcelpi churarcacuna.
19 Shinapish Jehová* Diospaj shuj angelmi cárcel pungucunata tuta pascashpa paicunata llujshichishpa cashna nirca:
20 “Diospaj huasiman* richij. Chaiman rishpaca cai causaimanta alli huillaicunata gentecunaman huillashpa catichij” nircami.
21 Chaita uyashca qꞌuipami apostolcunaca ña pacarimucujpi Diospaj huasiman yaicushpa chaipi yachachi callarircacuna.
Shinapish sacerdotecunata jatun mandajca paihuan cajcunandij shamushpami mandaj juezcunahuan,* Israel llajtamanta autoridadcunahuanpish tandanacurcacuna. Chashna tandanacushpami apostolcunata carcelmanta pushamugrichun guardiacunata mandarcacuna.
22 Ashtahuanpish guardiacuna carcelman chayashpaca apostolcunataca mana japircacunachu. Chaimi huillanaman tigrashpaca
23 cashna nircacuna: “Cárcel pungucunataca llavehuan huichcashcatami japircanchij, guardiacunapish chai pungucunapimi shayacushcacuna carca. Ashtahuanpish cárcel pungucunata pascajpica ni pi chaipica mana ricurircachu” nircacuna.
24 Chashna huillashcata uyashpami Diospaj huasipi cuidajcunata mandajpish, sacerdotecunata mandajcunapish imachari cunanca tucunga nishpa mancharircacuna.
25 Chaipimi shuj runa shamushpaca: “¡Ricuichij! Cancuna carcelpi churashca runacunaca Diospaj huasipimi gentecunaman yachachicun” nirca.
26 Chaimi Diospaj huasipi cuidajcunata mandajca paipaj guardiacunandij rishpa apostolcunata pushamurca. Shinapish paicunaca gentecuna paicunata rumicunahuan shitanata manchashpami apostolcunata mana imata rurashpa pushamurcacuna.
27 Apostolcunata pushamushpaca mandaj juezcunapaj* ñaupajpimi churarcacuna. Chaimi sacerdotecunata jatun mandajca apostolcunata tapurca.
28 Paica: “¿Manachu cancunataca Jesuspaj shutipi ama huillanguichij nishpa mandarcanchij? Shina mandajpipish ¿imamantataj Jerusalenpica cancunapaj yachachishcacunahuan jundachicunguichij? ¿Imamantataj chai runa huañushcamantaca ñucanchijta juchachishun ninguichij?” nircami.
29 Chashna nijpimi Pedropish, caishuj apostolcunapish cashna cutichircacuna: “Gentecunata cazunapaj randica tucuimanta yallica Diostami cazuna* canchij.
30 Cancunami Jesustaca caspipi* huarcushpa huañuchircanguichij. Shinapish ñucanchij ñaupa yayacunapaj Diosmi paitaca causachirca.
31 Shinallataj Diosca paipaj alli ladopi churashpami paitaca jatunyachirca. Gentecunata Quishpichij, Punta Pushaj cachunpishmi Diosca agllarca. Israel llajtapi causajcuna arrepintirichun, paicunapaj juchacunamanta perdonashca cachunpishmi Diosca chashna rurarca.
32 Ñucanchijmi chai tucuita ricushcanchij. Espíritu santopish chaicuna mana llulla cashcata huillachunmi ayudashca. Diosmi paita cazujcunamanca chai espirituta cushca” nircacunami.
33 Chaita uyashpami paicunaca yallitaj pꞌiñarishpa apostolcunataca huañuchishun nircacuna.
34 Shinapish Moisesman cushca leyta yachachij, tucuicuna respetashca Gamaliel shuti fariseo runami mandaj juezcunapaj* ñaupajpi shayarirca. Paica apostolcunata ashacama canllaman llujshichichunmi mandarca.
35 Chai qꞌuipami caishujcunataca cashna nirca: “Israel llajta runacuna, cai runacunapaj contra imata manaraj rurashpa alli yuyarichij.
36 Asha punllacuna huashamanca Teudas shuti runaca profetami cani nishpami ricurirca. Chaimi casi 400 runacuna paihuanca tandarircacuna. Shinapish paita huañuchijpica paita catijcunaca caita chaita rishpami tucui chingarircacuna.
37 Paipaj qꞌuipapish censota rurai punllacunapimi Galileamanta Judas shuti runa ricurirca. Paitapishmi gentecunaca catirca. Cai runa huañujpica paita catijcunapish caita chaita rircallacunami.
38 Chaimantami cancunamanca cashna nini, cai runacunataca cacharichij ama imata ruraichijchu. Paicuna imata ruracushcapish runacunallamanta cashpaca chingaringallami.
39 Shinapish paicuna ruracushca Diosmanta cajpica cancunaca mana chingachi tucunguichijchu. Ashtahuanpish ñataj Dioshuan macanacucunguichijman” nircami.
40 Gamaliel nishcatami paicunaca uyarcacuna. Shinapish apostolcunata cayashpami azotircacuna.* Chashna azotishpaca Jesuspaj shutipi ama huillanguichij nishpami mandarcacuna. Chai qꞌuipami paicunataca cacharishpa cacharcacuna.
41 Jesuspaj shutimanta llaquita apashpa pingai tucushca cashcamantami apostolcunaca mandaj juezcunapaj ñaupajmantaca cushicushpa rircacuna.
42 Paicunaca tucui punllacunami Diospaj huasipipish, huasin huasin rishpapish Cristo Jesusmanta alli huillaicunata* huillashpa, yachachishpa catircacuna.
Notacuna
^ “Jehová” shutita huasha diccionariopi ricui.
^ Griego rimaipica: “congregacionpish” ninmi.
^ “Jehová” shutita huasha diccionariopi ricui.
^ “Diospaj huasi” shimita huasha diccionariopi ricui.
^ O “Sanedrinpi cajcunahuan”.
^ O “Sanedrinpaj”.
^ Griego rimaipi “cazuna” nishpaca shuj mandajta shina cazuna cashcatami nicun.
^ O “yurapi”.
^ O “Sanedrinpaj”. “Sanedrín” shimita huasha diccionariopi ricui.
^ O “macarcacuna”.
^ “Alli huillaicuna” shimita huasha diccionariopi ricui.
