¿Huiñaita causangapajca imatataj rurana cangui?

SHIMI

Bibliaca caitami yachachin

Bibliapica: “Diospaj munaita rurajca huiñaitami causanga” ninmi (1 Juan 2:17). Shinapish Diosca ¿imata rurachuntaj munan?

Jehová Diosca paita, paipaj churita rijsichunmi munan. Jesusca Diosta mañacushpaca cashnami nirca: “Paicunaca: Mandaj Diostajca canlla cashcata rijsishpa, Jesucristotapish can cachashca cashcata crishpami, huiñai causaita charingacuna” (Juan 17:3, El Nuevo Testamento Quichua, Nueva Versión Interlineal, 1999). ¿Diostapish Jesustapish rijsingapajca imatataj rurana canchij? Bibliatami estudiana canchij. Shinallataj imata yachacushcacunataca ñucanchij causaipimi pajtachina canchij. a Bibliapica ñucanchijta ruraj Jehová Dios imata yuyashcatami yachai tucunchij (Hechos 17:24, 25). Ashtahuanpish Bibliapica Jesusmantapishmi parlan. Paica cai Allpapi cashpaca huiñai causaita charinamantami yachachirca (Juan 6:67-69).
Diosca, Jesús huañushcapi feta charichunmi munan. Jesusca gentecunata sirvingapaj, paipaj causaita cushpa quishpichingapajmi cai pachaman shamurca (Mateo 20:28). Jesús huañushcamantami alli gentecunaca paraíso Allpapi huiñaita causangacuna b (Salmo 37:29). Jesusca: “Taita Diosca, cai pachapi causajcunataca yallitaj cꞌuyashpami, paipaj shujlla churita cacharca. Pipish paita crijca ama chingarishpa, ashtahuanpish huiñai causaita charichunmi cacharca” ninmi (Juan 3:16). Pero Jesuspi crinimi nishpallaca mana saquirinachu canchij. Ashtahuanpish Jesús yachachishca shina causashpa, paipaj Yayapaj munaita rurashpami feta charishcataca ricuchina canchij (Mateo 7:21; Santiago 2:17).
Diosca paipajman cꞌuchuyashpa paihuan alli apanacuchunmi munan (Santiago 2:23; 4:8). Jehová Diosca nunca mana huañungachu. Chaimantami paipaj amigocunapish huiñaita causachun munan. Jehová Diosca: ‘Ñucata mashcajcunaca huiñaitami causangacuna’ ninmi (Salmo 22:26).

Huiñaita causanamanta panda yuyaicuna

Gentecunapaj yuyai: Ñucanchijllataj esforzarishpami huiñai causaita charishun nincunami.

Verdad: Doctorcunapish cientificocunapish gentecunapaj causaita mirachisha nishpami chꞌican chꞌican jambicunata rurancuna. Pero achcata esforzarishpapish huiñai causaita gentecunaman cunataca mana pudingacunachu. Bibliapica: ‘Causaita cuj pugyu yacuca Jehová Diosmantami shamun’ ninmi (Salmo 36:9). Yayitu Diosca huañuitapish huiñaipaj chingachishpaca paita cazuj gentecunamanmi huiñai causaita cunga (Isaías 25:8; 1 Juan 2:25).

Gentecunapaj yuyai: Huaquin raza gentecunallami huiñaita causanga nincunami.

Verdad: Diosca mana shuj razapajlla lado tucunchu. Ashtahuanpish Bibliapica: ‘Maijan llajtapi causaj cashpapish Taita Diosta manchashpa allita rurajtami paica chasquin’ ninmi (Hechos 10:34, 35). Gentecunaca mai llajtamanta cashpa, ima costumbrecunata charishpapish Yayitu Diosta cazushpallami huiñaita causanga.

Gentecunapaj yuyai: Huiñaita causanaca jiru, aburridomi canga nincunami.

Verdad: Yayitu Diosca gentecunata cꞌuyashpami cushilla huiñaita causachun munan (Santiago 1:17; 1 Juan 4:8). Shinallataj munashca trabajota rurashpa cushilla sintirichunmi munan (Eclesiastés 3:12). Chaimanta Jehová Diosca: ‘Cai Allpapi huiñaita causagrijcunaca paicunapaj trabajocunahuan, familiacunahuanmi cushilla causangacuna’ ninmi (Isaías 65:22, 23).

Ashtahuanpish paraíso Allpapi huiñaita causagrijcunaca Jehová Diosmanta, pai rurashcacunamantami yachashpa catingacuna. Jehová Diosca gentecunata rurashpaca paicunapaj shungupimi yachana munaita, huiñaita causana yuyaitapish churarca. Pero gentecunaca huiñaita causashpapish Dios rurashcacunataca mana tucuita rijsi pudingacunachu (Eclesiastés 3:10, 11). Chaimantami paraíso Allpapi huiñaita causagrijcunaca mushuj cosascunata yachanata, ruranatapish manataj saquingacuna.

a Testigo de Jehovacunaca Bibliamanta gratismi yachachinchij. Ima shina yachachicujta yachangapajca ¿Ima shinataj Bibliamanta yachachinchij? nishca videota ricui.

b “¿Jesusca ima shinataj ñucanchijta quishpichi tucun?” nishca yachaita ricui.