JOVENCUNA RURASHCA TAPUICUNA
¿Ñuca churarishca ropahuanca imatataj ricuchini?
¿Can churarishca ropaca imamantataj importante can? Ñucanchij churarishcami pi cashcata ricuchin. Cutin ¿can ima shina churarishca ropahuanca imatataj ricuchingui?
A la moda llujshishca ropacuna ñucanchijta ama pandachichunca quimsa yuyaicunata ricushun
Panda yuyai # 1: A la moda ropamanta propagandacunata ricushpami churarina cangui.
Theresaca: “Maipica yallitaj propagandacunata ricushpami imatapish munai callarinchij. A la moda ropacunahuan fotocunata ricushpaca ñucanchijpishmi chai fotopi ricurij shinallataj churarisha ninchij” ninmi.
Televisionpi, Internetpi llujshishca propagandacunaca mana joven huarmicunallatachu pandachin. Una guía completa para criar chicos adolescentes nishca libropica: “Jovencunapishmi a la moda ropa llujshijpica chashnallataj churarinata munancuna. Paicunataca uchillitamantami propagandacunaca ima shina churarina cashcata yachachincuna”.
Caita rurai: Proverbios 14:15-pica: “Yachai illaj runaca imata nijpipish, crishpa catinllami. Ashtahuanpish yachajcunaca imata rurangapajpish, alli yuyarinrajmi” ninmi. Chaimanta propagandacuna canman imata cꞌatusha nishcata alli ricui. Por ejemplo tucui cuerpo alirayacuj ropa propagandacunata ricushpaca cashna tapuri:
“¿A la moda ropacunata ñuca churarijpica pitaj beneficiarin?”
“¿Chai ropata churarijpica shujtajcunaca ñucamantaca imatataj yuyangacuna?”
“¿Chai ropacunata churarishpaca ñuca pi cashcata, ñuca imata crishcatachu ricuchisha?”
Consejo: Shuj semana enterota ropamanta propagandacunapi imata nishcata ricui. Chai qꞌuipaca ¿imamantataj cashna propagandacunata llujchincuna? ¿Paicunaca a la moda ropata churarichunchu munancuna? nishpa tapuri. Karenca: “Tucuicunami alli ricurinata, alli churarinata, alli cuerpota charishcata ricuchinata munanchij. Propagandacunata rurajcunaca jovencuna a la moda churarinata munajpimi cashna propagandacunata llujchincuna” ninmi.
Panda yuyai # 2: Shujtajcunapaj ñaupajpi alli ricuringapajca a la moda ropatami churarina cangui.
Manuelca: “A la moda ropacuna llujshijpica tucuicunami chai ropataca churarincuna. Chai ropata mana churarijpica canmantaca burlarincunami” ninmi. Shinallataj Annapish: “Ñucanchij amigocuna chasquichunca a la modami siempre churarina canchij” ninmi.
Caita rurai: Romanos 12:2-pica: “Cai pachapaj cajcuna shina rurashpa ama cushicuichijchu” ninmi. Cai versopi ima nishcata alli yuyashpa ricushpa cashna tapuri:
“¿Manaraj shuj ropata churarishpaca imapitaj yuyani?”
“¿Ropa de marcata churanaca ñucapajca importantechu can?”
“¿Shujtajcuna ñucata ricuchunllachu chashna churarini?”
Consejo: A la moda mana churarijpi cambaj amigocuna canta mana chasquinata o ñaupa ropata churarishcamanta, cambaj amigocuna canmanta caruyanatachari yuyangui. Pero ama chashna yuyaichu. Chaipaj randica can ima shina cashcatami canllataj ricuchina cangui. Chashnami canllataj seguro sintiringui. Shujtajcuna canmanta imata nishcamantapish mana preocuparinguichu.
Panda yuyai # 3: “Alirayacuj, apretado ropata churarishpaca allimi ricuringui”.
Jenniferca: “Maipica cuerpo alirayacuj, apretado ropatami churanata munani” ninmi.
Caita rurai: 1 Pedro 3:3, 4-pica: “Jahuallata churarishcaca ama caichijchu. Chaipaj randica, ucu shungu yuyaita allichichij” ninmi. Cai versopi yuyashpa cashna tapuri: “Shujtajcunapaj ñaupajpi alli ricuringapajca, ¿imataj ashtahuan alli can alli churarina o alli persona cana?”.
Consejo: A la moda ropata churarinapaj randica alli shunguta charinami ashtahuan alli can. Cunan punllacunapica gentecunaca mana chashna yuyanchu. Chaimanta caipi yuyai:
¿Canca paillamanta parlanata munaj runahuan parlashcanguichu? Chai runaca paillamanta parlanata yachashcamantami shujtajcuna paimanta caruyacushcataca mana cuentata cun.
Ropaca shuj joven paillamanta parlanata munaj layami can. Paillamanta parlajpica shujtajcunaca caruyangami.
Tucui alirayacuj ropata can churarishpaca chai runa layallatajmi cangui. Chaimi gentecunaca canmanta caruyanga. Shinallataj can mana seguro cashcata, jatun tucushca cashcatami ricuchingui. Maipicarin shujtaj gentecunaca cantaca ricurayashpami saquiringacuna. Mana alli munaicunatapishmi chari callaringacuna.
Can pi cashcata ricuchingapajca alli yuyashpami churarina cangui. Monica shuti jovenca: “A la moda ropata mana churarishpaca abuelitacuna shina churarina cashcataca mana nisha ninchu. Ashtahuanpish sumajta churarishpaca canllatajmi alli sintiringui. Shujtajcunapish cantaca respetangacunami” ninmi.
Caitapish yachai
¿IMATATAJ JOVENCUNACA YUYAN?
¿Sumaj canapica imamantataj achcata preocuparini?
Ima laya ricurishpapish alli sintiringapaj imata ruranata ricui.
¿IMATATAJ JOVENCUNACA YUYAN?
¿Imatataj jovencunaca yuyan? Sumaj canallapi ama yuyaichu
¿Achca jovencunaca imamantataj sumaj canallapi yuyancuna? ¿Chaipi ama yuyachunca imataj ayudai tucun?
