Teytankuna kuyanakoqta y respetanakoqta rikarmi wamrakunaqa shumaq winayan (Colosensis 3:14, 19). Jina teytankuna pëkunapita kushikuyanqanta y kuyayanqantam musyëta wanayan. Teytakunapaqqa Jehovämi juk alli ejemplu, pëqa Tsurin Jesustam kuyanqanta y përëkur kushikunqanta nirqan. (Leyi Mateu 3:17.)

Ciëluchö Teytantsik Jehoväqa, wiyamantsikmi y sentimientuntsiktapis cuentamanmi churan. Teytakunapis wamrankuna niyanqantam wiyayänan (Santiägu 1:19). Sentimientunkunatam respetayänan, y mana gustayanqantanö imatapis niyaptinqa manam rasllaqa piñakuyanmantsu. (Leyi Nümerus 11:11, 15.)

Wayinchöqa teytakuna derëchuyoqmi kayan wamrankuna imata rurayänampaq kaqta niyänampaq (Efesius 6:1). Dios ruranqannömi, cläru willayänan imata rurayänampaq kaqta y mana wiyakurqa imaman chäyänampaq kaqta. Tsëqa kuyakïmi (Genesis 3:3). Y cäsukuyänampaqqa manam obligayanmantsu, tsëpa rantinqa cäsukuyanqan alliman chätsinampaq kaqtam rikätsiyanman. (Leyi Isaïas 48:18, 19.)

Wamrëkikuna Diosta kuyayänampaq yanapëta churapakë. Diosta kuyarqa, japallankunalla këkarpis allitam decidiyanqa. Diosqa rurëninwanmi yachatsimantsik; qampis tsënölla rurë. (Leyi Deuteronomiu 6:5-7; Efesius 4:32 y 5:1.)