Imëkachö trabajarpis ama qonqëtsu Biblia kënö ninqanta: “Tukïläya sasa trabäju rurëchöqa kushikïmi kan” (Proverbius 14:23). ¿Imanö kushikïtataq tarishun? Puntataqa, wananqantsikta tarinapaqmi yanapamäshun. Bibliaqa nimantsik sirweqninkunataqa Dios imëkanöpapis bendicinampaq kaqtam (Mateu 6:31, 32). Peru jina ninmi, kikintsik trabajar kallpachakunantsikpaqpis (2 Tesalonicensis 3:10).

Trabäjïki imachö alli yanapashunëkipaq kaqta rikë. 25 watayoq Joshuam kënö nin: “Gananqëkiwan kushishqa karqa allim kanqa. Gastïkikunata pagakunëkipaq kallpachakurqa munanqëkita cumplinëkipaqmi yanapashunki”.

Jinamampis, alleq trabajanqëkiqa mas kushishqatam katsishunki. ¿Imanir? Höraqa alleq trabajananqa manam fäciltsu y qelanëpaqmi kanman, peru trabajar sïguinapaq kallpachakushqaqa kushishqam sientikushun y llapan puëdinqantsikmannö rurarqa allim sientikushun. Y manam ishkishuntsu fäcil-lla qellëta tariman (Proverbius 26:14). Y tsëta rurarqa kushikushunmi. Punta yachatsikïchö parlanqantsik Aaronmi kënö nin: “Trabäjüta usharir utishqa sientikurnimpis o trabajanqäta pipis cuentapaq mana churaptimpis, ruranqäpitaqa kushishqam sientikö”.

Bibliaqa alaban trabäjunta alli ruraq nunatam y warmitanam makinwan imëka trabäju ruranqampita (Proverbius 22:29; 31:13). Awmi, yachaq këmanqa manam rasllatsu chärishun, y imapis mana alli yarqupumashqaqa manam trabäjuntsik gustamantsiktsu. Itsa tsërëkur mëtsikaqta trabäjunkuna gustantsu, porqui manam kallpachakuyantsu alli trabajaq kayänampaq.

Rasumpa kaqchöqa gänas gänaslla ima trabäjutapis rurashqaqa kushikushunmi. 24 watayoq Williammi kënö nin: “Imatapis ruranapaq alleq kallpachakushqaqa alläpa kushikïpaqmi. Peru imatapis qelanar rurashqaqa manam kushikïta tarishuntsu”.

Ama ëkata pagashunëkipaq kaqllamanqa pensëtsu. Antis kënö tapukï: “¿Imanirtaq trabäjü precisan? ¿Imaraq pasanman kë trabäjuta mana rurayaptin o mana alli rurayaptin? ¿Imanötaq wakinta yanapan trabajanqä?”

Kë ultimu kaq tapukïqa alläpam precisan, porqui respuestanmi yanapamäshun rurëkanqantsikpita kushikunapaq. Jinamampis Jesusmi kënö nirqan: “Qaraquimi mas cushiqueqa chasquir cushiquipitapis” (Hëchus 20:35). Jina trabäjuntsikpitaqa yanapakïta chaskiyanmi patronnintsikkuna o clientikuna, familiantsikkuna y hasta wakin wanëkaqkunapis.

Familiantsikkuna. Juk teyta o juk mama familianta manteninampaq kallpachakunqanqa, ishkë formapam yanapan. Tantiyarinapaq, mikïninkuna, röpankuna kayäpunampaq y mëchö täräyänampaqmi. Tsënöpam cumplikäyan Dios qonqan cargunkunawan “wayinchö tärag castancunata” yanapëchö (1 Timoteu 5:8, NTCN). Jinamampis, alli trabajador këninkunawanmi wakinta yachëkätsiyan. Shane jutiyoqmi kënö nin: “Teytäqa trabäjunchö imatapis allitam rurëta tïran. Porqui honrädum y imëpis trabajëkashqallam, y masqa carpintërunömi trabajashqa. Pëpitam yachakurqö makïwan trabajëta, tsënöpam nunakuna wanayanqanchö yanapakïkä”.

Mas wanaq kaqkuna. Apostol Pablum cristiänukunata alleq trabajayänampaq nirqan. ¿Imanir? ‘Tsenopa pishipaqcunata imallawanpis yanaparcuyänanpaq’ (Efesius 4:28). Familiantsikta manteninapaq kallpachakushqaqa, itsa waktsakunata yanaparinapaqpis kapamäshun (Proverbius 3:27). Tsënöpam alli trabajanqantsikqa yanapamäshun qonqantsikpita kushikïta tarinapaq.

Jirkapita Yachatsikurmi qateqninkunata Jesus kënö nirqan: “Pipis autoridäyoq karnin juk höra trabajanëkipaq obligashuptikiqa, ishkë höra trabajë” (Mateu 5:41). ¿Imanötaq yanapashunkiman kë palabrakuna? Trabäjïkichö wallkallata ruranëkipa rantin, mañayäshunqëkipitapis masta rurëta tïrë. Churakë mas ras y mas alli trabajanëkipaq. Mana precisaqnö kaptimpis kallpachakï alli ruranëkipaq.

Tsënö rurarqa, itsa trabäju ruranqëkipita mas kushishqa sientikunki. ¿Imanir? Porqui manam abligayäshuptikitsu tsëta rurëkanki, sinöqa gustashuptikim. Kikikim tsëta decidinki (Filemon 14). Porqui trabajaq nunaqa mandakoqmi kanqa, peru qela nunaqa mandakoqpa mandädunchömi kanqa (Proverbius 12:24). Rasumpa kaqchöqa, itsa imëpis nunapa esclävunqa kashuntsu, ni alläpa sinchi trabäjukunataqa rurashuntsu. Peru qelanëkar imatapis rurarqa, itsa imëpis jukpa esclävunnö sientikushun, porqui imëpis ras o mas ruranapaqmi mañëkämäshun. Imëpis masta rurarqa kushishqam sientikunki.

Alläpa trabajë alli kaptimpis, yarpanëkim kawënikichöqa trabäjulla mana precisanqanta. Bibliaqa nimantsik imëkatapis ras y alli ruranapaqmi (Proverbius 13:4). Peru manam trabäjullachö kakunapaqtsu nimantsik. Eclesiastes 4:6 textum nin: “Mana jamëpa trabajëpitaqa mas alliqa ichikllapis jamarinqantsikmi”. ¿Imatataq kë textu yachatsimantsik? Pipis trabäjunllachö alläpa kakurninqa, itsa ruranqampitaqa kushikïta tarinqatsu, porqui tsëmi llapan tiempunta y kallpanta qochinqa. Eclesiastes textum nin alläpa trabajëqa vientuta tsarita munar qatikachë cuenta kanqanta.

Bibliam yanapashunki trabäjïkita alläpa precisaqtanö mana rikänëkipaq. Rasunmi, empëñuwanmi trabajanantsik, peru Bibliaqa yarpätsimantsik ‘mas precisaq kaq rurëkunata’ puntaman churanapaqmi (Filipensis 1:10, NM). ¿Imakunataq kayan mas precisaq kaqkunaqa? Familiantsikkunapaq y amïguntsikkunapaqmi tiemputa rakinantsik, y mas precisaqqa Diospa kaqpaqmi: Bibliata leyinapaq y leyinqantsikman yarpachakunapaq.

Trabäjunkunata alläpa precisaqpaq mana churaqkunaqa rurayanqankunapitam kushikïta tariyan. Williammi kënö nin: “Punta kaq patronnïkunapita juk kaqmi trabäjunta alläpa precisaqpaq mana churanqampita juk alli ejemplu. Alleqmi trabajan y clientinkunapis trabäjunwan kushikuyanmi. Peru junaq ushariptinqa llapanta jaqirïkurmi familianman y religionninman dedicakun. Rasumpa kaqchöqa, reqinqa nunakunapitaqa pëmi mas kushishqa kaqqa”.