Mëtsikaqmi cada wata Navidäta celebrayan. Wakinqa familiankunawan y amïgunkunawanmi tsë junaq juntakäyan, y wakinnam Diosta yarpäyan y wakinkunata yanapayan. Tsë rurëkuna alli kaptimpis, Navidäpitaqa mastaran musyanantsik.

Mëtsikaqmi creiyan Navidä junaqqa Jesuspa yurikïninta celebrë kanqanta. Tsënö kaptimpis unë pasakunqanta qellqaqkunam niyan, Jesus imë junaq yurinqan mana musyë kanqanta. Juk librum nin: “Punta cristiänukunaqa manam munayarqantsu Jesus imë junaq yurikunqanta patsätsita”, porqui “mana alli religionkunapa costumbrinkunapita rakikashqa këtam munayarqan”. Jina, Bibliaqa manam willakuntsu kikimpa ni pipa yurikïnin junaqta Jesus celebranqanta. Peru wanïnin junaqta yarpäyänampaqqa qateqninkunatam mandarqan (Lücas 22:19).

Jina musyëta munaq estudiösukunam niyan mëtsika costumbrikuna y Navidächö yarqamoq Papa Noel nishqan, Navidä monti, qaranakïkuna, vëlakuna, Navidäpa müsicankuna, adornukuna y tsë junaqchö wakin mikïkunaqa mana alli religionpa costumbrinkuna kanqanta. Catölicu religionpaq parlaq juk diccionarium kënö nin: “¿Ëkaqtaq musyantsik navidächö qaranakïkuna, wayikunapa punkunkunachö y iglesiakunachö corönakunata churayanqanqa mana alli religionpa costumbrin kanqanta?”.

Itsa kënö pensanki: “Manam pitapis mana allitaqa rurantsu”. Peru ¿imataraq Diosqa pensan tsë costumbrikunapita? Bibliaqa willakun rasumpa kaq religion mana alli religionkunapa costumbrinkunawan takukanqanqa, Diosta alläpa piñatsinqanta. Amos 5:21, 23 textuchömi tarintsik mana wiyakoq israelïtakunata Jehovä kënö ninqanta: “¡Noqaqa fiestëkikunatam alläpa melanä! [...] ¡Mëtapis cantaq ëwayë!

¿Imanirtaq sinchipa parlarqan? Rikärishun ima pasakunqanta. Israel markachö rey Jeroboanmi, Dan y Betel markakunaman örupita rurashqa wishikunata churarqan. Tsëpitanam nirqan tsë wishikunata utilisar Jehoväta adorayänampaq, tsënöpa Jerusalen markaman Diosta adoraq manana ëwayänampaq. Jina, mushoq fiestakunatam patsätsirqan y sacerdötikunatam churarqan tsëta celebrayänampaq (1 Rëyes 12:26-33).

Tsë rurëqa israelïtakunapaq allinömi karqan, porqui Jehoväta adorayänampaqmi rurëkäyarqan. Peru profëta Amoswan y wakin profëtakunawan Jehovä willatsikunqanqa, clärum rikätsikurqan tsëpita imata pensanqanta. Y tiempuwannam këta yarpätsirqan: “Noqam Jehovä kä, imëpis kanqänöllam këkä” (Malaquïas 3:6). Jehoväqa kanan witsampis tsënöllam pensan. Tsëqa, ¿imanöraq sientitsin Navidächö costumbrikuna?

Tsëkunata musyarmi, mëtsikaq nunakuna Navidäta celebrayannatsu. Tsëpa rantinqa watachö mëqan junaqllapis familiankunawan y amïgunkunawanmi tiemputa kushishqa pasariyan, y wakinkunapaqmi imallatapis rurayan.