WAKINKUNA IMANIR MANA CREIYANQAN: Tsëraq juk estudiuta rurayanqanmi rikätsikun galaxiachö mëtsikaq waranqëpayan planëtakuna kanqanta. Ciëlukuna alläpa jatun kaptinmi mëtsikaq nunakuna kënö tapukuyan: “¿Imanir-raq Dios cuentaman churanman ichikllan planëtachö këkaq nunakuna rurayanqankunata?”.

¿IMATATAQ BIBLIA YACHATSIKUN? Jehoväqa * manam Palabran Bibliata qomarquntsik, tsëpita qonqëkamänantsikpaqtsu. Pëqa këtam änimantsik: “Rasumpam, rikëkurniki consejashqëki” (Salmu 32:8).

Egipcia warmi Agarta pasanqanta yarpärishun, pëqa kawarqan Jesus manaraq shamuptin 1900 watakuna witsanmi. Juk kutim, patrönan Saraïta mana respetarqantsu, tsëmi patrönanqa mana allipa tratarqan, tsërëkurmi tsunyaq jirkapa escapakur ëwakurqan. ¿Diosqa pëta qonqëkurqantsuraq pantanqanrëkur? Bibliaqa willakun ‘Jehoväpa angelnin tarinqantam’ y kënö nirmi kallpata qorqan: “Llakikïnikitam Jehovä wiyashqa”. Agarnam contestarqan kënö nir: “Qamtaq rikämaqnï Diosqa kanki” (Genesis 16:4-13, nota).

Diosqa qamtapis rikäshunkim. ¿Ima ninantaq tsëqa? Kë igualatsikïmi entiendinapaq yanapamäshun. Juk mamaqa llapan wamrankunatam kuyëpa cuidan, peru llullu kaqkunatam masqa atiendin, porqui pëkunam mas dëbil kayan y mas cuidayänanta wanayan. Tsënö kaqllam, Jehoväpis altantulla këkan noqantsik dëbil këkashqa y yanapakïta wanashqa yanapamänapaq. Jehovämi nin: “Janachö y santu sitiuchömi tärä, jina llakishqa y humildi kaqwampis këkämi, waktsakunapa kawëninta kushitsinapaq y llakishqakunapa shonqunta kushitsinapaq” (Isaïas 57:15).

Tsënö kaptimpis, itsa kënö tapukunki: “¿Imanötaq Dios rikäman? ¿Janapa imanö kanqällataku rikäman o shonqöchö ima kanqantaku rikan y entiendiman?”.