Jesusqa nirqan, manaraq mañakuyaptikim ima wanayanqëkitapis Dios Yayaqa musyanna (Mateu 6:8). Israelpa tiempunchö rey Davidpis kënömi nirqan: “Manaraq imatapis parlaptïmi, ¡Jehovällä! llapan parlanäpaq kaqkunata musyankina” (Salmu 139:4) Tsëqa itsa kënö tapukuyanman: “¿Musyëkaptinnaqa precisanku mañakunä?” Musyarinapaq, mañakïpaq Biblia imata yachatsikunqanta rikärishun. *

Bibliaqa nin, Jehovä * llapanta musyanqantam, peru manam sirweqninkunapita musyanqanllawantsu conformakun (Salmu 139:6; Romänus 11:33). Juk computadöraqa imatapis qellqëkur churëkuyaptin katsikunllam, peru Jehoväqa manam tsënötsu, sinöqa, amïgun kanantsikta munarmi, shonquntsikchö llapan pensanqantsikkunaman yarpachakun (Salmu 139:23, 24; Santiägu 4:8). Tsëmi Jesusqa nimarqantsik, wananqantsikkunata musyëkaptimpis mañakunapaq (Mateu 6:6-8). Wananqantsikkunata mas seguïdu Diosta willarninmi, mas amïgun tikrashun.

Höraqa itsa imata mañakïta o imanö willëta puëdishuntsu. Peru tsënö kaptimpis, Diosqa alläpa yachaq karmi imata munanqantsikta rikämunqa y qoramäshun (Romänus 8:26, 27; Efesius 3:20). Tsënam, yanapamanqantsikta mäkurirqa pëpa lädunchö mas sientikushun.

Bibliaqa willakun, sirweqninkunapa mañakïninkunata Dios wiyanqantam. Jina willakunmi wakin nunakunapa mañakïninkunata imanir mana wiyanqantapis. Tantiyarinapaq, israelïtakunapa tiempunchömi alläpa maqanaki karqan, tsëmi profëta Isaïasta Jehovä mandarqan israelïtakunata kënö ninampaq: “Kutin kutin mañakayämuptikipis manam wiyätsu; yawarta ramëwanmi makikikunapis yawarllana këkan” (Isaïas 1:15). Këchö rikanqantsiknöpis Diospa mandamientunkunata mana wiyakoqkunaqa, manam mañakïninkunata Dios wiyananta shuyaräyanmantsu (Proverbius 28:9; Santiägu 4:3).

Jina Bibliaqa kënömi nin: “Sitsun pe munashqanno imatapis mañacushun, wiyamäshunmi” (1 Juan 5:14). Tsëqa, ¿sirweqninkuna llapan mañakuyanqantatsuraq qonqa? Manam. Tantiyarinapaq, apostul Pablum juk qeshyawan alläpa sufrirqan, tsëmi kachakëkatsinampaq Diosta kima kuti mañakurqan (2 Corintius 12:7, 8). Itsachi nawi (ñawi) nanëwan alläpa qeshyarqan. Llakikïpaqchi karqan, wakinkunata kachakëkätsirnin hasta juk wanushqatapis kawarikätsirnin, kikin mana kachakanqanqa (Hëchus 19:11, 12; 20:9, 10). Peru mañakunqanta Dios mana contestaptimpis, yanapanqantaqa kushishqam chaskikurqan (2 Corintius 12:9, 10).

Awmi, Biblia qellqakanqan witsankunachöqa, wakin nunakunapa mañakïninta Dios contestarqanmi (2 Rëyes 20:1-7). Peru tsëqa höra hörallam pasakoq. Höraqa mañakïninkunata Dios mana contestëkaqnömi karqan, tsëmi alläpa llakikuyaq. Y rey Davidtam tsënö pasarqan y llakikurmi kënö nirqan: “Jehovällä, ¿imëyaqraq qonqëkamanki? ¿Mananatsuraq yarpämanki?” (Salmu 13:1). Tsënö kaptimpis, Davidqa cuentata qokurqanmi Jehovä imanö yanapashqa kanqanta, tsëmi mas markäkurqan (yärakurqan). Tsë mañakïninllachömi Jehoväta nirqan: “Alli kënikimanmi chipyëpa markäkurqö” (Salmu 13:5). Kanan witsan cristiänukunapis, mañakïninkunata Dios contestamunqanta rikäyänampaqqa Davidnöllam mëtsika kuti mañakuyänan (Romänus 12:12).

Rasumpa wananqantsiktam qomantsik.

Juk teytaqa manam wamranta alläpa kuyarnimpis, llapan munanqantatsu mañakunqan höra qonqa. Tsënömi Diosnintsikpis, manam munanqantsik hörachötsu llapan mañakunqantsikta qomäshun. Peru chipyëpam markäkushwan Jehoväqa juk kuyakoq teytanöpis, rasumpa wananqantsik höranchö qomänapaq kaqman (Lücas 11:11-13).

Höraqa contestamanqantsikta manam mäkushwantsu.

¿Pasëkanqantsik problëma raslla mana altsakaptintsuraq, “Jehoväqa manam contestamunqatsu” nishwan? Manam tsënöqa pensashwantsu. Mas bienqa, imanö contestamunqantam musyëta procurashwan. Itsachi juk kuyashqantsik amïgu wananqantsik hörachö yanaparamarquntsik (Proverbius 17:17). Jehovämi tsënö yanaparamänapaq permitishqa. O yachëwan imatapis ruranapaqmi Palabran Bibliawan contestëkämantsik (2 Timoteu 3:16, 17).

Sirweqninkunapa problëmankunata kikin altsanampa rantinmi, Jehoväqa kallpata qomantsik kikintsik altsanapaq (2 Corintius 4:7). Juk kutin teytampa jutinta mana allichö quedatsita mantsarnin, Jesusqa rogakurqan ruranampaq kaqpita librëkunampaq. Peru Jehoväqa juk angeltam mandamurqan kallpata qonampaq (Lücas 22:42, 43). Tsënöllam, Diosqa mëqan amïguntsiktapis utilisärita puëdin yanaparamänapaq (Proverbius 12:25). Tsënö contestëkämunqantaqa itsa cuentata qokushwantsu, tsëmi imanö contestëkamunqanta mäkoq mäkoqlla këkänantsikqa alläpa precisan.

Höraqa shuyaränantsikran.

Bibliaqa willakun, humildikunapa mañakïninkunataqa, dispunishqan hörachö contestamunqantam (1 Pëdru 5:6). Tsëmi mañakïnintsikta mana contestamoqtanö rikarnin, mana kuyamanqantsiktaqa pensashwantsu. Ciëluchö këkaq Diosnintsikqa noqantsikpaq imë mas alli kanqanta rikëkurmi mañakïnintsikta contestamun.

Tantiyarinapaq, llullu wamrëki juk biciclëtata mañashunkiman. ¿Tsë höratsuraq ras rantirapunkiman? Wamrëki llullullaraq këkaptinqa y manijëta mana puëdinampaq kaqta musyarninqa, manachi tsë höratsu rantirapunkiman. Wamrëki edäninman charkunantaraqchi shuyärinkiman mana malograkurinampaq. Tsënö kaqllam Diosnintsikpis, shonquntsikchö imatapis munëkanqantsikta mana dejëpa mañakushqaqa dispunishqan tiempuchö qomäshun (Salmu 37:4).

Mañakunqantsikta imë hörapis Dios contestamunampaq kaqman markäkunapaqmi Bibliaqa animamantsik. Itsa pipis kënö ninman: “‘Shuyë’ ninanqa fäcilmi, peru rasumpa shuyänanqa sasaraqmi (ajarämi)”. Awmi, alläpa sasaran kanman imëka sufrimientukunapa y problëmakunapa atska tiempuna pasëkarnin Dios yanapamänapaq kaqman shuyaranqantsikqa. Tsënö kaptimpis, mañakur sïguinapaq Jesus nimanqantsiktam yarparänantsik.

 Juk igualatsikïchömi Jesus parlarqan, juk waktsa viuda yanapanampaq mana alli juezta kutin kutin mañakunqanta (Lücas 18:1-3). Puntallataqa manam yanapëta munarqantsu, peru tsëpitam kënö pensarqan: “Mana arreglaptëga imaycay örapis cutiycämungallam fastidiamar umätapis nanatsirnin” (Lücas 18:4, 5, MTCS). Peqätapis o “umätapis nanatsirnin” ninqantaqa, Bibliata qellqayanqan witsanchöqa “nawïchö kutëkaman” nirmi churayarqan, tsë palabrakunaqa entienditsikurqan “pitapis penqakïman churë” ninantam. * Diosta mana respetaq juez këkarpis penqakïchö quedëta mana munarnin viudata yanapëkaptinqa, ¿manatsuraq kuyakoq Diosnintsiknäqa “paqaspa junaqpa mañaquicayaptin” ‘mana shuyarätsicushpa, justisianta ruranqa’? (Lücas 18:6-8).

Mañakïta utirnimpis (ajayarnimpis) mañakur sïguishwanllam. Tsënö rurarninqa, rikätsikushun pë contestamunanta munanqantsiktam. Jinamampis yachakushunmi, mañakïnintsikta Dios imanö contestëkamunqanta rikëta y tsëmi yanapamäshun pëwan mas amïgu kanapaq. Jehovä munanqannö mañakurnin y shonqupita patsë rurarninqa, alleqmi markäkushun contestamänapaq kaqman (Lücas 11:9).