DIOSMAN WITI
‘Cananqa llapantapis mushoqmannam tumaratsishaq’
¿Gustashunkimantsuraq mana qeshyakuna kanqan Patsachö familiëkiwan kawë? ¿Munankimantsuraq imëllapis sufrimientukuna, nanatsikïkuna y wanï (wanuy) ushakänanta? Tsëkunaqa rasumpam kanqa, porqui Diosmi awnikushqa. Awnikunqankuna imanö cumplikänampaq kaqta Apocalipsis 21:3-5 (leyiri) textukunachö rikärishun.
“Mananam waqayanqanatsu.” (Apocalipsis 21:4.) Diosqa ushakätsinqa llakikur waqakïkunatam, y waqarqa waqashun kushikïllapitanam. Y manam tsëllatatsu ushakätsinqa, sinöqa waqatsimaqnintsik sufrimientukunata y nanatsikïkunatam.
‘Mananam wanuyanqanatsu.’ (Apocalipsis 21:4.) Wanïnöqa manam imapis kantsu pasëpa waqatsimaqnintsik. Peru Jehoväqa wiyakoq nunakunatam tsëpita libranqa. Tsëtaqa ruranqa Adan jutsallakunqan jutsata ushakätsirninmi (Romänus 5:12). Jehoväqa Jesus nunakunarëkur wanunqantam utilisanqa nunakuna jutsannaq këman chäyänampaq. * “Tsepitanam permitïconqa por ultimu wanïpis manana cananpaq” (1 Corintius 15:26). Dios munanqannömi manana qeshyashpa llapankuna imëkamayaqpis kawakuyanqa.
“Mananam imancunapis nananqanatsu.” (Apocalipsis 21:4.) ¿Imanö nanatsikïtaq kanqanatsu? Tukïläya llakikïnintsikkuna y cuerpuntsikchö nanatsikïkunam, tsëmi millonyëpayan nunakunata sufritsin.
Ichikllachönam manana waqarnin, wanurnin ni nanatsikurnin kawashun. Peru itsa kënö tapukunki: “¿Mëchöraq tsënö kawakï kanqa? ¿Ciëluchötsuraq?”. Manam. Dios awnikunqanqa kënömi nin: “Diospa wayincho wamrancuna [“nunakuna”, NM] juntunam pewan cawacuyanqa”, y nunakunaqa Patsachömi kawayan (Apocalipsis 21:3). Jinamampis, Diospa awnikïninqa parlan wanï manana kanampaq kaqtam, tsë ninanqa Patsachö juk tiempu wanï kashqa karpis, kananqa ushakärishqana ninanmi. Ciëluchöqa manam ni imëpis wanuyashqatsu, peru Patsachöqa cäsi qallanampitam wanïqa kashqa. Këmi rikätsimantsik Dios awnikunqan alli kawakïqa kë Patsachö cumplikänampaq kaqta.
Llakikïrëkur y sufrimienturëkur mëtsikaq nunakuna waqayanqantam Diosqa ushakäratsinqa
Jehoväqa munan pëpa awnikïninkunaman markäkunatam. Shamoq tiempuchö kë bendicionkuna kanampaq kaqta musyaratsimarnintsikmi, kënö nimantsik: ‘Cananqa llapantapis mushoqmannam tumaratsishaq’. Jina ninmi: “Que nenqäcunataqa llapantam cumplishaq; porqui noqaqa manam ulicütsu” (Apocalipsis 21:5). Diospa awnikïnin cumplikaqta rikäyänëkipaq qam y kuyashqa kastëkikuna imata rurayänëkipaq kaqta musyariyänëkipaqmi invitariyaq.
^ par. 5 Nunakunarëkur Jesus wanunqanta mas yachakïta munarqa, Rasumpëpaqa, ¿imatataq Biblia yachatsikun? librupa 5 kaq capïtulunta ashiri, kë librutaqa Jehoväpa testïgunkunam rurayämushqa.
