WAKINKUNAPAQQA kë revistapa qaranchö tapukïqa mana allinömi, peru mëtsikaqmi tsëta tapukuyan o Dios rumi shonqu kanqanta niyan.

Desgraciakunapa pasashqa kaqkunam tapukuyan: “¿Imanirtaq këkuna pasakunanta Dios permitin? ¿Manatsuraq cuentaman churamantsik? ¿Rumi shonqutsuraq?”.

Wakinkunataqa, Biblia willakunqanta leyiyanqanmi pasëpa piñatsin. Tantiyarinapaq, Noëpa tiempunchö apäkï tamyapaq leyirninmi kënö tapukuyan: “¿Imanöparaq kuyakoq Dios tsëtsikaqta wanïkatsirqan? ¿Rumi shonqu kartsuraq?”.

¿Imëllapis tsënö tapukushqankiku? Rumi shonqutsuraq Diosqa nir tapukuyaptin, ¿manaku ni imanöpa contestëta puëdinki? Imanö kaptimpis, qateqnin kaqchö yachakunqëkim yanapashunki.

‘Kikin rikoqta’ Dios ruramashqantsik kaptinmi noqantsikqa animalkunapita jukläya karnin alli y mana alli kaqta musyantsik (Genesis 1:27). Tsëmi pë imanö kanqanta rikätsikïta puëdintsik alli y mana alli kaqkunachö y limpiu portakïnintsikkunachö. Mana allikunata rikarninqa llakikuntsikmi, tsëqa, ¿manatsuraq Diostanäqa masraq llakitsinman?

Tsëmi këqa igualan kikimpaq Dios Bibliachö kënö ninqanwan: “Rurënïkunapis qamkunapa rurënikikunapita mas jatun[mi], y pensënïkuna qamkunapa pensënikikunapitapis mas jatun[mi]” (Isaïas 55:9). Kë palabrakunapa contranmi churakëkashwan Diosqa rumi shonqum nirninqa, porqui rurënintsik pëpa rurënimpita mas alli kanqantam nikashwan. Tsëmi manaraq tsënö pensar puntataqa masraq yachakunantsik. ¿Diosqa rumi shonqutsuraq? nir tapukunantsikpa rantinmi, ¿imanir-raq wakin rurëninkuna mana allinö rikakun? nirmi tapukushwan. Rikärishun rumi shonqu ima ninan kanqanta.

Pëqa rumi shonqum nirninqa imanir ruranqankunatam juzguëkantsik. Rumi shonqu nunaqa sufrikaqta rikëkarpis manam imapis qokuntsu antis kushikunmi. Maski juk ejempluwan tantiyarishun, juk teyta wamranta mana alli sientikatsinanrëkurlla qayaparqa, rumi shonqum, peru yachatsinanrëkur o cuidananrëkur rurarninqa alli teytam. Qamtapis mana allipa juzgayashqa kayäshuptiki quizä cuentata qokurinki pitapis mana allipa juzguëqa fäcil-lla kanqanta.

Imëka desgraciakuna pasakuptin y Dios castigakunqampaq Biblia willakunqanta leyirnin, Diosqa rumi shonqum nir imanir nunakuna qayayanqanta maslla yachakurishun. ¿Tsëchö tarishwantsuraq Dios rumi shonqu kanqanta?