Imapis mana rasumpa kanqanta musyëkar parlëmi ulikï o llullakuyqa. ¿Imëllapis ulikurqonkiku? *... Hasta Diosta kuyaq nunakunapis ulikuyarqanmi. Jukqa Jesuspa 12 apostolnimpitam karqan, quizá pï kanqanta musyanki. Jutinqa Pëdrum karqan. ¿Musyëta munankiku imanir ulikunqanta? Kë willakïta wiyari.

Jesusta tsaririrmi sacerdötekunata mandaqpa wayinman apayan. Pullan paqaspis pasarishqanam. Y Pëdrunam pipis manaraq reqiptin, wayipa pationmam yëkurirnin tullpa lädonman jamakurin. Rikärirmi, yëkatseq sirvientaqa reqirirnin nin: “Qampis [...] Jesuswan pureqmi canqui, ¿aw?”. Pëdrunam mantsakarnin, manam nin.

Rätunnintanam juk kaq sirvienta reqirin nin: ‘Que nunapis Jesuswanmi purishqa’. Jina yapëmi Pedru negarin. Tsëpita más rätuntanam jukkunapis witikurnin, “qamqa rasonpam pewan purishqanqui” aw, niyarqan.

Pëdruqa mantsapakunmi, tsëmi kima kutipana ulikun, fuertepam ‘tse nunataqa manam reqïtsu’ nin. Tsë höram juk gallo kantarin. Jesus Pëdruta rikäriptinmi, Pëdruqa yarpärin kënö ninqanta: “Manaraq gallu cantaptinmi, quima cuti negamanqui”. Tsënam Pëdruqa wamranö waqëkun. Alläpam llakikun tsëta ruranqampita.

¿Qamtapis tsënö pasarishunkimantsuraq?... Yarpakurkï, escuëlachö këkanqëkiman y estudiaq mayikikuna Jehoväpa testïgonkunapaq parlar qallëkuyanqanman. “Pëkunaqa manam bandera saludayantsu”, ninman juk. “Manam nacionninkunata defindiyantsu”, ninman jukninna. Y juk masraq kënö ninman: “Navidadta mana celebrarninmi cristiänotsu kayan”. Tsëna rikëkushurniki juknin kënö nishunkiman: “Jehoväpa  testïgonmi qamqa kanki, ¿aw?”. ¿Imataraq ninkiman?...

Tsënö pasashuptikiqa alliran musyanëki imanö contestanëkipaq kaqta. Pëdruqa manam preparädotsu këkarqan, tsëmi tapupäyaptin ulikurqan. Tsënö kaptimpis, mana allita ruranqampita llakikuptinmi Diosqa perdonarqan.

Kananqa Ananïaspaq parlarishun. Pëpis unë tiempochö Jesuspa qateqninmi karqan, warmin Safïrawanmi willanakur ulikuyarqan. Pero Diosqa manam ni mëqanta perdonarqantsu. Rikärishun imanir mana perdonanqanta.

Chunka junaqkunanam pasarishqa Jesus apostolninkunata dejarir Dioswan kanampaq ciëlota kutinqampita. Y 3.000 nunakunanömi Jerusalenchö Jesuspita wiyar bautizakuyashqa, y wakinkunaqa më tsë nacionkunapitam Pentecostes fiestata celebrayänampaq shayämushqa. Mushoq religionninkunapita yachakïta munarmi más tiempo quedakuyan. Tsëmi Jesuspa wakin qateqninkunaqa más pishipakoqkunata imëkachö yanapayan.

Ananïaswan warminqa chakrankunatam rantikuyan mushoq cristiano mayinkunata yanapayänampaq. Apostolkunata Ananias qellëta entregarninmi, rantikuyanqampita tsëlla llapan kanqanta nin; pero manam rasuntatsu nikarqan, wakinkaqwanqa quedakushqam karqan. Diospa yanapakïninwanmi Pëdruqa tsëta mäkurir kënö nin: ‘Manam nunacunallatatsu uliparqonqui; sinoqa Diostam uliparqonqui’. Tsënam jinan hora Ananïasqa wanurin. Kima hörakuna pasariptinnam warmin chärin. Qowanta pasanqanta mana musyarmi, ulikurin, y pëpis jinan höram wanurin.

¡Imanö precisaq yachatsikïmi! Rasun kaqllata parlëqa alläpa allim y llapantsikmi tsënö parlanantsik. Pero llapantsikmi pantarintsik, joven karnäqa masran. ¿Manaku kushikunki Jehová kuyamanqantsikta y Pëdrutanö perdonashunëkipaq kaqta musyëqa?... Yarpë, rasun kaqllata imëpis parlanapaq kaqta. Imëllapis ulikïman ishkishqa karqa, Jehová Diostam perdonëkamänapaq mañakunantsik. Tsëtam Pëdruqa rurarqan y tsënöpam Diosqa wiyarqan. Imëpis mana ulikïta o llullakuyta procurashqaqa, noqantsiktapis Diosqa perdonamäshunmi.