Biblia ninqannöpis, markäkïqa imapis rasumpa kanqanta musyar tsëman chipyëpa crei kanqanmi. Diosman markäkoqqa chipyëpa segürom këkan llapan awnikunqanta pë cumplinampaq kaqman.

Llapan kawëninchö ruranqankunawanmi Moisesqa rikätsikurqan Dios awnikunqankunaman markäkunqanta (Génesis 22:15-18). Egiptochö riqueza jananchö kawëta puëdirpis, pëqa akrarqan “Diospa israel nunancunawan juntu allqutsashqa jipar [sufrir] cawaquitam, y manam munarqantsu reypa willcanno, etsanpa muneninta rurar juc ratu que patsacho gosacuritaqa” (Hebreus 11:25). ¿Llutallaku tsëta akrarqan? ¿Nïkurqa llakikurqanku? Manam, Bibliaqa willakun markäkïninchö ‘alli tsaracurnin, yarpayninchöpis mana desanimacurnin mana ricacag Dios Yayata imayca ricashganö’ kawanqantam (Hebreus 11:27, NTCN). Pëqa manam ni imëpis markäkur ruranqampita llakikurqantsu.

Jina Moisesqa kallpachakurqanmi wakinkunapa markäkïninta o yärakuyninta fuerteyätsinampaq. Más tantearinapaq, rikärishun israelïtakuna puka lamarpita y faraonpa soldädonkunapita qeshpita mana puëdiyanqanta. Tsënö këkäyanqanta musyarirmi, israelïtakuna Jehoväman y Moisesman mantsakashqa qayakuyarqan. ¿Imatataq Moisesqa rurarqan?

Quizaschi ichikllapis pensarqantsu puka lamarta Dios kicharinampaq kaqta y tsënöpa tsaki patsapa tsimpayänampaq kaqta. Pero segürom këkarqan israelïtakunata tsapänanrëkur Dios imatapis ruranampaq kaqman, y tsënölla confiakuyänampaqmi wakinkunatapis nirqan. Éxodo 14:13 textom willamantsik, “Moisesmi israelïtakunata kënö nirqan: ‘Ama mantsakäyëtsu. Alleq tsarakuyë, y kanan qamkunarëkur ruramunqan Jehoväpa salvacionninta rikäyë”. ¿Markäkïninkunachö israelïtakuna alli tsarakuyänampaq yanaparqanku? Awmi, Bibliaqa willakun Moiseswan israelïtakuna ‘Puca Lamarta imeca tsaqui patsapanolla’ tsimpayanqantam y tsëtaqa rurayarqan “marcäcurmi” (Hebreus 11:29). Moisespa alli markäkïninqa pëta y llapan qateqninkunatam yanaparqan.

Dios awnikunqankunaman markäkïta y ruranqantsikkunachö rikätsikïtam. Porque juk awnikïninqa, pëpa kaqta puntaman churashqaqa llapan necesitanqantsikta qomänapaq kaqmi (Mateo 6:33). Imëkayoq këta asheq mundochö alli tsarakunanqa manam fäciltsu; pero necesitanqantsikllawan kawar y Diosta puntaman churashqaqa pasëpa segürom këkantsik Jehová yanapamänapaq kaqta. Pëmi këta awnimantsik: “Manam qonqashqequitsu ni jaqirishqequitsu” (Hebreus 13:5).

Jina procurashwanmi wakinkuna alli markäkïyoq kayänampaq yanapëtapis. Teytakunapis wamrankunata yanapayänanmi Diosman markäkïninkuna kanampaq. Pishi kayanqampitam wamrakunaqa necesitäyan Dios kanqanta musyëta, alli kaqta y mana alli kaqta reqiyänampaq leyninkuna kanqanta. Leyninkunata wiyakï allipaq kanqanta musyëtapis necesitäyanmi (Isaías 48:17, 18). ¡Dios ‘rasonpa cawanqanta, y llapan shonquncunawan asheqnin caqcunata yanapanqanta’ musyarirninqa alli markäkïyoq kayänampaqmi yanapanqa! (Hebreus 11:6.)