¿Precisanku Jesus pï kanqanta musyanantsik?

“Rason caqta musyariyaptiqui[m], tse rason caq librariyäshunqui.” (JUAN 8:32.)

BIBLIAQA rasun kaqta yachatsimarnintsikmi, Jesuspaq mana rasun kaq creenciakunapita libramantsik. ¿Rasumpaku precisan pï kanqanta musyanantsik? Awmi. Jehoväpaq y Jesuspaqpis precisanmi, tsëmi noqantsikpaqpis precisan.

● ¿Imanirtaq Jehoväpaq precisan? Claro parlakïchöqa, ‘allapa cuyacoq’ kaptinmi (1 Juan 4:8). Diosqa imëpis kushishqa kawakunatam munan. Juan 3:16 textochömi Jesus kënö nirqan: “Que patsacho nunacunata allapa cuyarninmi, Dios jucllella tsurinta cachamorqan, peman marcäcoqcuna [...] wiñepa cawayänanpaq”. Diosqa Tsurinta kachamurqan noqantsikrëkur wanunampaq y shumaq huertaman tikrashqa Patsachö imëyaqpis kawakunarëkur nanïta kichamunampaqmi (Génesis 1:28). Diosqa, Tsurimpita yachakoqkunata y munëninta ruraqkunatam imëyaqpis kawakïta qarëta munan (Romanos 6:23).

● ¿Imanirtaq Jesuspaq precisan? Pëpis nunakunata kuyanmi, tsëtaqa rikätsikurqan nunakunarëkur wanurmi (Juan 15:13). Musyarqanmi tsënölla salvacionta tarinapaq kaqta (Juan 14:6). ¡Tsëchi munan llapan nunakuna salvacionta tariyänanta! Tsëmi Jesusqa, Diospita y munënimpita entero nacionchö nunakunata yachatsiyänampaq qateqninkunata mandarqan (Mateo 24:14; 28:19, 20).

● ¿Imanirtaq noqantsikpaq precisan? “¿Imataq qampaqqa más precisan?” nir tapuriyäshuptikiqa, ¿ima ninkimanraq? Itsachi familiëkiman o saludnikiman pensarinkiman. Llapantsikmi munantsik yamë y familiantsikkunawan shumaq kawakïta. Jesus wanunqanrëkurmi Jehoväqa noqantsikta y familiantsiktapis awnimantsik nanatsikïta, llakikïta y wanïta ichikllachöna ushakäratsimunampaq, jina kë Patsata juk shumaq huertaman tikraratsimunampaq kaqtapis (Salmo 37:11, 29; Apocalipsis 21:3, 4). ¿Manatsuraq tsëchö kawakïta munankiman? Tsëqa imata karpis ruranëkiran.

¿Kë yachatsikïpa qallananchö rikanqantsik textota yarpankiku? “Rason caqta musyariyaptiqui[m], tse rason caq librariyäshunqui” ninmi. Jesuspita y Diospa munëninchö pë imanö yanapakunqampita rasun kaq yachatsikïmi jutsapita y wanïpita salvamënintsikta puëden. Tsëpaqqa, rasun kaqta musyanëkim alläpa precisan. ¿Munankimantsuraq Jesuspita rasun kaqta yachakïta, tsënöpa qam y familiëki pëpita rasun kaqta musyayänëkipaq? Jehoväpa testïgonkunaqa kushishqam yanapariyäshunki.