Diospa Palabrampita yachatsikïkuna

¿Imanirtaq Diospa shumaq patsätsishqa markan kan?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa, Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Imanirtaq israelïtakunata huk nación kayänampaq Dios patsätsirqan?

Diosqa huk nación kayänampaqmi Abrahanpa kastankunata shumaq patsätsirqan y leykunatam qorqan. Israel shutinkuna kanampaqmi nirqan, y pëkunam rasumpa kaq adoracionta y qellqashqa Palabranta kawëninkunachö más precisaqpaq churayänan karqan (Salmo 147:19, 20). Tsënöpam hinantin Patsachö nunakuna yanapashqa kayan. (Lei Génesis 22:18.)

Diosqa israelïtakunatam akrarqan testïgonkuna kayänampaq. Qonqan leyninkunatam wiyakuyänan karqan, y wiyakurqa kushishqam kawakuyarqan (Deuteronomio 4:6). Unë israelïtakunapita yachakurmi rasumpa kaq Diospita más musyashun. (Lei Isaías 43:10, 12.)

2. ¿Imanirtaq rasumpa kaq cristiänokunaqa alli patsätsishqa këkäyan?

Israel nación favorninta oqrariptinmi Jehoväqa pëkunapa rantin cristiano congregaciontana akrarqan (Mateo 21:43; 23:37, 38). Unëqa israelïtakunam Diospa testïgon kayarqan. Kananqa rasumpa kaq cristiänokunanam Testïgonkuna kayan. (Lei Hechos 15:14, 17.)

Jesusqa qateqninkunata yachatsirqan y mandarqan tukï nación nunakunata Jehoväpita yachatsiyänampaq y qateqnin këman chätsiyänampaqmi (Mateo 10:7, 11; 24:14; 28:19, 20). Tsë precisaq rurëqa ushëkannam. Kanan witsankunaqa millonyëpayanmi tukï rikoq nunakunata Jehová ëllïkan o gorïkan rasumpa kaq religionchö kayänampaq (Apocalipsis 7:9, 10). Alli patsätsishqa markachö karmi kallpata qonakïta y yanapanakïta puëdeyan. Llapankunam reunionninkunachö Bibliapita igual-lla yachakuyan. (Lei Hebreus 10:24, 25.)

  3. ¿Imanötaq Jehoväpa testïgonkuna kanan witsan patsakar qallayarqan?

1870 watakunam patsakar qallayarqan. Huk grupo Bibliata estudiaqkunam qonqakashqana Bibliapa rasumpa yachatsikïninkunata yapë tarir qallëkuyarqan. Cuentatam qokuriyarqan yachatsikur puriyänampaq congregacionta Jesus patsätsinqanta. Tsëmi Diospa Gobiernompita hinantin nacionkunapa yachatsikur qallëkuyarqan. Y Jehoväpa testïgonkuna nishpa shutinkuna kanampaqmi 1931 watachö patsätsiyarqan. (Lei Hechos 1:8; 2:1, 4, y; 5:42.)

4. ¿Imanö patsätsishqataq këkäyan Jehoväpa testïgonkuna?

Hinantin nacionkunapita punta cristiano congregacionkunataqa alläpam yanaparqan huk grupo cristiänokuna Pushaqninkuna kanqan, pëkunaqa cuentatam qokuyaq congregacionkunapa peqan cuenta Jesus kanqanta (Hechos 16:4, 5). Tsënöllam kanan witsan Jehoväpa testïgonkunaqa Jesusta pushaqninkunatanö rikäyan (Mateo 23: 9, 10). Hina pëkunataqa alläpam yanapan huk grupo Pushaqnin Cristiänokuna, pëkunaqa alli yachaqmi y kallpata qokoqmi kayan, Diospa yachatsikïnintam pachak waranqa congregacionkunapitapis masman chätsiyan. Cada congregacionchömi alli yachaq anciänokuna o superintendentekuna Diospa üshan cuenta cristiänokunata shumaq cuidayan. (Lei 1 Pedru 5:2, 3.)

Jehoväpa testïgonkunaqa Diospa Gobiernompita willakïkunata llapan nunakunaman chätsiyänampaq y discípulo kayänanrëkur yanapayänampaqmi alli patsätsishqa këkäyan. Tsëmi hinantin Patsachö nunakunata yanapayänanrëkur, pitsqa pachak idiömakunapitapis masman Bibliapa yachatsikïninkunata traduciyan, imprimiyan y hinantinman chätsiyan. Apostolkuna rurayanqannöllam wayin wayin yachatsikuyan (Hechos 20:20). Rasumpa kaqta llapan shonqunkunawan kuyaqkunatam Bibliapita yachatsiyan. Jehoväpa markanqa pëta kushitsiyänampaq y nuna mayinkunata yanapayänampaq kallpachakurmi alläpa kushishqa kayan. (Lei Salmo 33:12 y Hechos 20:35.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 19 kaq capïtulonta leiri, kë librotaqa Jehoväpa testïgonkunam rurayämushqa.