¿Reqimantsuraq Jehová?
¿Reqimantsuraq Jehová?
“Noqaman rasonpa marcäcamoqcunataqa, reqïmi.” (2 TIM. 2:19.)
1, 2. a) ¿Imatataq Jesusqa imëkapitapis más munarqan? b) ¿Imatataq tapukunantsik?
HUK farisëom Jesusta kënö tapurqan: “Mayestru, Diospa mandamientu[n]cho ¿Meqan caqtaq mas presisaq?”. Jesusnam nirqan: “Teyta Diosniquita cuyanqui llapan shonqiquiwan, llapan boluntaniquiwan y llapan yacheniquiwan” (Mat. 22:35-37). Cristupis tsë mandamiento ninqannöllam kawarqan. Pero ciëlochö këkaq Teytanta alläpa kuyarnimpis, munarqan pëpa rikënimpaq alli këtam, y tsëtaqa rikätsikurqan imëpis Dios ninqannölla kawarninmi. Tsëmi wanunampaq ichikllana pishikaptin Teytan kuyanqanta willakurqan. Tsëmi yanaparqan teytanta imëpis kuyëkänampaq (Juan 15:10).
2 Kanan witsankunapis atskaq nunakunam y noqantsikpis Diosta reqinqantsikta y kuyanqantsiktaqa nintsik. Pero manam tsëllatatsu ruranantsik. Musyanantsikmi Jehová allitanö reqimanqantsikta o manapis, o huk parlëchöqa pëpa rikënimpaq alli këkanqantsikta o manapis. Tsëmi kë precisaq tapukïta rurakunantsik: “¿Noqa nïmantsuraq Jehová reqimanqanta y pëpatanö rikämanqanta?” (2 Tim. 2:19). Awmi, Ciëlochö y Patsachöpis mandakoqwan amigo kënöqa manam imapis kantsu.
3. ¿Imanirtaq wakin nunakunaqa creiyantsu Dioswan amigo këta puëdeyänampaq kaqta, y imaraq yanapanqa tsënö mana pensayänampaq?
3 Kayanmi Jehoväta alläpa kuyaqkuna. Pero tsënö kaptimpis manam creiyantsu pëwan amigo këman chëta puëdeyanqantaqa. Höraqa imapaqpis mana väleq kayanqantam pensayan. ¡Pero Jehoväqa manam tsënötsu rikämantsik! (1 Sam. 16:7.) Pablu kënö ninqanman pensarishun: “Rasonpa yacheyoq nunaqa Diostam cuyan, y Diospis peta reqinmi” (1 Cor. 8:3). Këchö rikanqantsiknömi, huk nunata Dios reqinampaqqa puntataqa kë nunaran pëta kuyanan. Kënö tapukurishun: “¿Imanirtaq kë revistata leikä? ¿Imanirtaq sinchikü llapan shonqüwan, kawënïwan, yarpënïwan y kallpawan Jehoväta servinäpaq? ¿Pëllapaqna kawënï kanampaqku nirqö y bautizakurqoku? Tsënö kaptinqa, ¿imanirtaq tsëta rurarqö?”. Yarpäshun, ciëlochö Teytantsikqa llapan nunakunapa shonquntam rikëkan y ‘allin kaqkunallatam’ pë kaqman wititsin (lei Ageo 2:7 * y Juan 6:44). Tsëmi Pëtaqa servikantsik amïgon kanapaq kikin invitamashqantsik kaptin. Pëllapaq kanqantsikyaqqa, manam imëpis haqimäshuntsu. Alläpa kuyamarnintsikmi cuidekämäshun alläpa väleq tesöronnö kashqa (Sal. 94:14).
4. Diosnintsikwan amigo kë alläpa precisanqanman, ¿imanirtaq alli yarpachakushwan?
4 Jehová pë kaqman wititsimashqana këkaptinqa, ¿imamantaq más yarparashwan? Kuyakïninchö imëpis këtam (lei Judas 20, 21). Bibliaqa alleqmi willakun “mana alliman [...] jeqacurcunapaq” kaqta y “cawecaq Diosnintsicpita raquicacuri[napaq]” kaqta (Heb. 2:1; 3:12, 13). Tsëmi Himeneotawan Filëtota pasarqan, pëkunapaqmi apóstol Pablu parlarqan 2 Timoteu 2:19 textota manaraq qellqarnin. Këchö rikanqantsiknömi, kë nunakunaqa Diosta sirveq kayarqan, pero tsëpitaqa rasumpa kaq yachatsikïpitam rakikäkuriyarqan (2 Tim. 2:16-18). Y tsënöllam pasarqan Galacia congregacionchö wakin cristiänokunatapis. Diospa reqishqa këkarnimpis, manam rasumpa kaq yachatsikïchö tsarakuyarqantsu (Gal. 4:9). Ama imëpis pëkunanöqa kashuntsu. Kë mundochöqa manam imapis igualantsu Ciëlochö y Patsachö autoridadyoq Jehoväwan amigo kënöqa.
5. a) ¿Imanö nuna kanatataq Dios munan? b) ¿Imakunapitataq yachakushun?
5 Diospa reqishqan huk nuna kanampaqqa, pë munanqannö nunam kanan (Sal. 15:1-5; 1 Ped. 3:4). Humilde y markäkïyoq o yärakuyyogmi kanan. Yachakurishun unë witsan Diosta sirveq ishkaq nunakuna tsënö kayanqanta y tsënöpa Diospa kuyakïninchö kawayanqanta. Tsëpitanam rikäshun precisaqtukunqanchö Jehoväpa amïgon këkarpis despreciashqa nunapaq. Kë llapanqa noqantsiktapis imanö kanapaqmi yachatsimantsik.
“Marcäcoq caqpaqqa imeca tëtancuna cuenta[m]”
6. a) ¿Imanötaq Abrahan rikätsikurqan Jehová awnikunqankunaman markäkunqanta? b) ¿Imanirtaq Jehoväqa Abrahanta reqirqanmi nintsik?
6 Bibliaqa willakun, Abrahanqa Diosman markäkoq nuna kanqantam, tsëmi “marcäcoq caqpaqqa imeca tëtancuna cuenta ticrarishqa” nin (Gén. 15:6; Rom. 4:11). Kë nunaqa wayinta, imëkankunata y amïgonkunatapis haqirïkurmi karu markata ëwakurqan (Gén. 12:1-4; Heb. 11:8-10). Rasumpam, allipam Diosman markäkoq. Y atska watakuna pasaptimpis tsënöllam karqan. Tsënö kanqantaqa atska kutim rikätsikurqan, itsachi yarpantsik Dios mandanqanta wiyakunqanrëkur wambrantapis wanutsita munanqanta (Heb. 11:17-19). Jehoväqa musyarqanmi Abrahan pëman markäkunqanta, tsëmi reqirqan kuyashqa kaq o alli kaq amïgontanö (lei Génesis 18:19 *). Kënö ninqanwanqa manam Abrahan rasumpa kanqanllatatsu Jehová rikätsikïkarqan, sinöqa amïgontanö kuyanqantam (Sant. 2:22, 23).
7. ¿Jehová awnikunqampita imatataq Abrahan musyaq y tsëkunaman yarpararnin imanötaq kawarqan?
7 Abrahantaqa Jehová awnirqan mirëninkuna awnikunqan patsata herenciantanö chaskiyänampaqmi, y mirëninkunaqa mëtsikam kayänan karqan ‘lamar kuchunchö aqushanö’ (Gén. 22:17, 18). Tsë awninqanta rikänampaq manana kawananna karpis allim Jehoväman markäkurqan. Musyaqmi Jehová imatapis parlarqa cumplinampaq kaqta. Y cumplinampaq kaqtaqa rikätsikoq imanöpis kawanqanwanmi (lei Hebreus 11:13). Y noqantsikpitaqa, ¿imaraq nishwan? ¿Abrahanpa markäkininyoqtanötsuraq Diosnintsikqa reqimantsik?
Markäkoq nunakunaqa Jehovämanmi shuyaräyan
8. ¿Nunakunaqa imatataq llapampis munayan?
8 Nunakunaqa llapampis munayan alli saludyoq këta majayoq këta y familiayoq këtam. Kë munëkuna alli kaptimpis, manam höraqa rurakantsu. Tsënö kaptinqa, ¿imatataq rurashun? Imanöpis ruranqantsikwanmi rikätsikushun markäkïnintsik sinchi kanqanta o manapis.
9, 10. a) ¿Wakinkunaqa imanötaq munëninkunata rurariyan? b) ¿Imanötaq markäkunkiman Jehová awnikunqankunaman?
9 Sirveqnintanö Jehová reqimänata munarqa, upa këchi kanman pëpa munëninta haqirir munënintsikllata rurakunqantsikqa. Wakinkunaqa kë hutsamanmi ishkiyan Biblia michäkunqan hampikïkunata akrarnin. Wakinkunanam familiankunatapis haqitseq y reunionkunaman faltatseq trabäjokunata chaskikuyan. Y wakinkunanam majankuna ashiyan mana creikoq nunakunachö. ¿Tsënö ruraq cristiänokunaqa rasumpëpaku Jehoväwan amigo këninkunata kuyayan? Abrahanman yarpärishun. Jehová awninqankunata shuyarëta utirirqa o ajayärirqa itsachi alli kawakïta qallanman karqan huk markallachöna kawakur y más reqishqa këta tïrar, pero ¿imaraq ninman karqan Jehová tsëta ruraptinqa? (Igualaratsi Génesis 11:4 ninqanwan.) ¿Kuyëninllachötsuraq këkanman karqan?
10 ¿Ima munanqëkitataq cumplikäreqtana rikëta munanki? Jehoväqa llapan munanqantsikta ruramunampaqmi awnimarquntsik, ¿tsëta shuyaränapaq markäkïnintsik sinchiku? (Sal. 145:16.) Ama qonqashuntsu, itsa awnimanqantsikkunaqa Abrahanpaqnöpis munanqantsik hörachötsu chämunqa. Pero Abrahanpanöpis markäkïnintsik sinchi kanampaq sinchikushqaqa Diosqa manam imëpis qonqamäshuntsu, imë höra karpis atska bendicionninkunatam chaskishun (Heb. 11:6).
Alli kaq y mana alli kaq
11. ¿Imachöraq Coré yanapakurqan y imakunataraq rikarqan, y imanötaq Jehoväta atska watapa servirqan?
11 Moisestawan Corëtaqa Jehová manam igualtsu rikaq. ¿Imanir? Porque Jehová mandakunqantam ishkampis hukläya hukläyapa rikäyaq. Leví kastapita Coré shutiyoq nuna imanö kanqantapis rikärishun. Alli yanapakoqmi karqan, pëqa itsa rikarqan markanta Jehová Puka lamarpita libraqta, Sinaí hirkachö mana wiyakoq nunakunapa ushakëninchö imanö salvaqta. Hina arca del pacto nishqanta apëchöpis yanapakurqanchi (Éxo. 32:26-29; Núm. 3:30, 31). Itsa atska watapa Jehoväta servirqan, tsëchi israelïtakunaqa respëtowan rikäyaq.
12. ¿Imanötaq Coré allitukoq kanqanrëkur Dioswan amigo kënin oqrarirqan? 31 päginachö dibüjota rikärï.
12 Pero awnikunqan patsaman ëwëkarmi, markanta Jehová imanöpis pushëkanqanta mana allitanö rikar qallëkurqan. Y 250 reqishqa nunakunawanmi hukmampana dirigita munarqan. Itsachi pensayarqan Jehová yanapëkanqanta, tsëchi Moisestaqa mana kaqpaq churëta munayarqan. Pëta y wawqin Aarontam kënö niyarqan: “Amana masqa munënikikunata rurayënatsu, porque këchö llapan ëllurëkaqkunaqa santom kayan y Jehovämi pëkunawan këkan” (Núm. 16:1-3). ¡Imanö precisaqtukoqmi kayarqan! Pero Moisesqa kënö nirqan: “Jehovämi musyatsikunqa pï pëpa kanqantapis” (lei Números 16:5 *). Waränin hunaqpaqqa Corëwan qateqninkunaqa wanuriyarqanmi (Núm. 16:31-35).
13, 14. ¿Imanötaq Moises rikätsikurqan humilde nuna kanqanta?
13 Pero Moisesqa manam Corënötsu karqan, pëqa “llapan nunakunapitapis más manshu[m]” karqan (Núm. 12:3). ¿Imanötaq Moises manshu kanqanta rikätsikurqan? Jehová ninqanta humildadwan rurarninmi (Éxo. 7:6; 40:16). Bibliachöqa manam tarintsiktsu Jehová mandakunqampa contran churakëkaqta o mana allipa parlëkaqta. Pensarishun, Jehoväta adorayänampaq carpata ruranampaq mandakunqanman. Jehoväqa mandarqan imanöpis rurayänampaq kaqtam, tëlakuna imanö kanampaq kaqta, ima colorkunawan awayänampaq kaqta, watayänampaq uchkunkuna ëka kanampaq kaqta y maskunatapis (Éxo. 26:1-6). Tsënömi unëpita patsë Jehoväqa markanta pushanampaq nunakunata churashqa. Itsachi casokïta qelanärintsik ichisaq cösaskunachö imanö ruranapaqpis nimashqa. Pero Jehová Diosnintsikqa alli dirigikoqmi y pëqa markäkunmi churanqan nunakunaman y yachanmi cargonkuna qoytapis. Tsëmi imata ruramurpis noqantsikman alli yarpëkur ruramun. Tabernäculota imanöpis ruranampaq atska rurëkunata mandaptin, Moisesqa manam Jehoväwan piñakurqantsu ni mana yachaqtanö churëkanqanta pensarqantsu. Tsëpa rantinqa wiyakoqmi karqan, tsënö kanqanmi yanaparqan wakin trabajaqkunapis Jehová ninqannölla rurayänampaq (Éxo. 39:32). ¡Imanö humilde Moisesqa karqan! Musyarqanmi Jehoväpa rurënin kanqanta y pëqa huk herramientanölla kanqanta.
14 Huk kutinäqa alläpa humilde kanqantam rikätsikurqan llakitseq cösaskunapa pasarnin. Tsëqa karqan israelïtakuna mana allita parlayaptinmi. Israelïtakunawan pasëpa piñakurmi Jehoväta alabarqantsu. Tsënö ruranqampitam Jehoväqa awninqan patsaman markanta pë mana yëkatsinampaq nirqan (Núm. 20:2-12). Yarpäshun, wawqin Aaronwan ishkanmi israelïtakunapa mana alli parlëninkunata atska watapa aguantayarqan. Y kananqa tsë pantarinqampitam awnikunqan patsata atska watapa shuyarëkaptimpis mana yëkunampaq nirirqan Jehová. Tsëta wiyarirnin, ¿imataq nirqan Moises? Llakikurnimpis Jehová ninqantaqa humildadwanmi wiyakurqan. Musyarqanmi Dioschöqa “mana alli rurë” mana kanqanta (Deu. 3:25-27; 32:4). Këwanmi musyantsik Moisestaqa kuyë sirveqnintanö reqinqanta (lei Éxodo 33:12, 13 *).
Jehoväta wiyakunapaqqa humilde këtam wanantsik
15. ¿Imatataq yachakuntsik Corë hutsaman ishkiyanqampita?
15 Kanan witsan Jehoväpa markanta pushaq cristiänokunapis tukïtam decidiyänan y huknöpanam rurayänan. ¿Ima nintsiktaq tsënö pasakuptin? Yarpänantsikmi, Jehoväwan amigo kënintsik peligrochö kanqanta. Manam Coré ruranqanmanqa ishkita munantsiktsu. Pë y yanaqinkunaqa Jehoväwan alli këninkunatam oqrariyarqan allitukoq karnin kikinkuna munayanqannö imatapis rurarnin, y Jehoväman mana markäkurnin. Corëqa manam cuentata qokurqantsu Moises imëkata decidiptimpis Jehovälla llapan markapa mandaqnin kanqanta. Tsënö karmi Dios churanqan nunakunataqa wiyakurqannatsu. ¡Más alliqa kanman karqan Jehoväman markäkunqanmi! Pëmi yanapanman karqan imëkatapis huknöpana rikänampaq y precisaptinqa huknöpana ruranampaq. Pero Corëqa manam tsëtatsu rurarqan, allitukoq kanqanrëkurmi atska watana Jehoväta servikarpis mana allichö usharirqan.
16. ¿Moises humilde kanqan imanötaq yanapamantsik?
16 Kë yachatsikïqa alläpam precisan noqantsikpaq y congregacionta rikaq anciänokunapaqpis. Alläpam precisan humilde këta yachakunantsik, tsëmi yanapamäshun Jehová awnimanqantsikta shuyaränapaq y pushamänapaq churanqan nunakuna nimanqantsiknölla ruranapaq. ¿Sinchikïkantsikku Moisesnö humilde y manshu kanapaq? ¿Markanta pushanampaq Jehová churanqan nunakunata respetantsikku y nimanqantsikkunata wiyakuntsikku? ¿Poqu cristiänoku kantsik imëkata llakikurnimpis alli tsarakunapaq? Humilde kashqa y wiyakoq kashqaqa imanö kanqantsiktapis Jehoväqa reqimäshunmi y manam tsëllatsu, sinöqa alläpam kuyamäshun.
‘Rasonpa marcäcoqcunataqa’ Jehová reqinmi
17, 18. ¿Imaraq yanapamäshun imëpis Jehová kuyëkämänapaq?
17 ¡Imanömi yanapamantsik kuyakoq karnin Jehová pëwan amigo kayänampaq nunakunata yanapanqanman pensëqa! Rikanqantsiknömi, Abrahanwan Moisesqa noqantsiknö hutsa ruraq karpis Jehoväwan amigo kayarqan. Pero Corëqa Jehoväpitam witikurirqan y amigo kënintapis oqrarirqan. Tsëmi noqantsikpis kënö tapukushwan: “¿Alli sirveqnintanöku Jehoväqa reqiman? ¿Imatataq yachakö unë nunakunapaq Biblia parlanqampita?”.
18 ¿Manaku kushikïpaq Jehová pë kaqman witinapaq yanapëkamanqantsik y alläpa väleq herenciantanö rikämanqantsik? Cada hunaq pëllata shonqupita patsë servirnin y markäkïyoq y humilde këta sinchikushqaqa rikënimpaqmi cada hunaq más kuyë kashun. Y reqishqan kënöqa manam imapis kantsu. Tsërëkurmi kanan witsan y shamoq tiempochöpis mana imawampis igualaq bendicionkunata chaskita puëdentsik (Sal. 37:18).
[Päginapa ura kuchunchö willakïkuna]
^ par. 3 Ageo 2:7: “‘Rasumpam llapan nacionkunata cernimushaq y llapan nacionkunachö allin kaqkunatam yëkatsimushaq; y kë wayitam gloriawan huntaratsishaq’, nishqam tröpakunata mandaq Jehová”.
^ par. 6 Génesis 18:19: “Porque reqirirqömi wambrankunata y wayinchö kaqkunata mandanampaq, Jehová mandakunqannö alli kaqllata rurayänampaq y juzgayänampaq; tsënöpa awninqanta Abrahanman Jehová apamunampaq”.
^ par. 12 Números 16:5: “Tsënam Corëta y pëwan llapan këkaq nunakunata parlapar kënö nirqan: ‘Warë qoyam Jehová rikätsikunqa pëpa pï kanqanta y pï santo y pï pëman witinampaq kaqta, y pitapis pë akranqan kaqmi pëman witinqa[‘]”.
^ par. 14 Éxodo 33:12, 13: “Kanannam Moises Jehoväta nirqan: ‘Rikë, qammi nikämanki: “Kë markata horqamï” pero manam willamashqankitsu piwan ëwanäpaq kaqta. Hinamampis kikikim nimarqunki: “Shutikipam reqeq y rikënïpaq alli kaqtam rurarqunki”. Y kananqa, rikënikipaq alli kaqta rurashqa kaptïqa, nänikita reqïkatsillämë, tsënöpa reqinäpaq y rikënikipaq alli kaqta ruranäpaq. Y yarpë kë markaqa qampa kanqanta’”.
Más precisaq kaqta yarpärishun
• ¿Jehoväwan imanö kanqantsiktaq alläpa shumaq?
• ¿Imanötaq noqantsikpis Abrahanpa markäkïnimpita yachakushwan?
• ¿Imatataq yachakuntsik Corëpitawan Moisespita?
[Yachakunapaq kaqpa tapukïninkuna]
[29 kaq päginachö dibüju]
¿Abrahannöku noqantsikpis markäkuntsik Jehová llapan awnikunqanta cumplimunanman?
[31 kaq päginachö dibüju]
Corëqa manam humildadwantsu respetarqan Jehová patsätsinqanta
[32 kaq päginachö dibüju]
¿Wiyakoq y humilde nunatanöku Jehová rikämantsik?
