5 kaq yachatsikï

Diospa kaqta puntaman churë

BIBLIAQA KËNÖMI NIN: “Kushishqam kayan Diosta wanaqkunaqa” (Mateo 5:3, NM).

¿IMATAQ LLAKISHQA KËMAN CHÄTSIKUN? Mëtsika religionkunachömi “Diostam sirvë” nirpis, shonqunkunachö kushishqa këtaqa tariyantsu. Tsëmi Diosta servir kushishqa këta tariyänanrëkur imata rurayänampaq kaqtapis musyëta munayan. Wakin reqishqa nunakunanäqa Diosman crei y adorëqa upa kë kanqanta o hasta mana allita rurakunqantam pensayan. Diosman mana creeq nuna ninqantam huk revista kënö nir willakun: “[Ni cienciapis imanö kanqanta willakïta mana puëdenqanman, y noqantsikpis mana musyëta puëdenqantsikman] cristiänokuna creiyanqanqa, [...] mana kaqpaqmi kawënintsikta churan y más chikinakïmanmi chätsikun” (Maclean’s nishqan revista).

¿IMATAQ KUSHISHQA KANAPAQ YANAPAMÄSHUN? Kikintsikmi cuentata qokunantsik Dios rasumpa kanqanta (Romanos 1:20; Hebreus 3:4). Ama pipis michämäshuntsu kë tapukïkunapa respuestanta musyanata: “¿Imapaqtaq kawantsik? ¿Imaraq pasamantsik wanurishqa? ¿Imanirtaq alläpa hipantsik o ñakantsik? ¿Imatataq ruranantsik Diospa shonqunta kushitsinapaq?”. Kë tapukïkunapa respuestanta mana tarirqa, manam imëpis kushishqa këta tarishuntsu.

Nunakuna parlayanqantaqa manam llapantatsu creinantsik. Imakuna Diosta kushitsinqanta musyanapaqqa, “llapan yarpeywan” alli pensar cuentata qokunantsik precisanqantam Biblia nimantsik (Romanos 12:1, 2, QKW). Itsa Bibliata leinapaq y ninqanta ruranapaqqa sasaraq kanqa, pero ruranqantsikqa allipam yanapamäshun. Imëka mana alli rurëkunapitam tsapämäshun, mana alläpa yarpachakunapaqmi yanapamäshun y más kushishqam kawakushun. Y këqa manam ulikïtsu o llullakuytsu. Mëtsikaq nunakunanam kushishqa kawakïkäyan rasumpa kaq Diosta reqirnin y shamoq tiempopaq awnikunqanta yachakurnin.

Hinamampis, Diosta wiyakï más alli kawakunapaq yanapakunqanta rikarmi pëta más kuyashun. ¿Imëllapis Jehoväpa testïgonkuna niyäshushqankiku Bibliapita yachatsiyäshunëkipaq? Pëkunawan yachakurninqa, apóstol Pablunömi kënö ninki: “Noqantsicqa musyantsicmi Dios munashqanno cawaqueqa biennintsicpaq canqanta, peru tsepaqqa capamanqantsicllawanmi conformi cawacushwan” (1 Timoteu 6:6).

[8 kaq päginachö dibüju]

Diosta ima kushitsinqanta yachakï