Pushamaqnintsikqa kananyaqpis manam hamantsu

“Listum quecarqan yapepis contrancunata bensirinanpaq.” (APO. 6:2.)

1, 2. a) ¿Jesucristu imanö Gobernante kanqantataq Biblia rikätsikun?, ¿y 1914 watapita patsë imanö këkanqantataq willakun? b) ¿Imatataq Cristu gobernar qallarirlla rurashqa?

JEHOVÄMI 1914 watachö Jesusta gobernanampaq churarqan. ¿Imanö Gobernante kanqantataq pensanki? ¿Congregacionninta hora höralla rikämunqantaku? Tsënö pensarqa manam allitatsu pensëkanki, y rasumpa kaqtam musyanëki. Salmos y Apocalipsis librokunachö rikanqantsiknöpis, Cristuqa manam wiyaräkïkaq Gobernantetsu, antis bestian montashqa “yapepis contrancunata bensirinanpaq[mi]” listo këkan, tsënöpa munanqanta ruranampaq (Apo. 6:2; Sal. 2:6-9; 45:1-4).

² Gobernar qallarirllam ‘culebratawan anjelnincunata’ peleachö ganarqan. Arcángel Miguelmi angelninkunawan ciëlopita qarqamurqan Satanastawan angelninkunata, y tsëpita witsëpaqa, manam puëdeyannatsu Patsachö munayanqanta rurakïta (Apo. 12:7-9). Tsëpitanam, “conträtopita willakoq” Jesus Teytanwan Patsachö templo imanöpis këkanqanta rikäyarqan (Mal. 3:1). Tsë rikapakuyanqanchömi, ‘jatun Babiloniachö’ cristiänotukoq religionta atska yawar ramëkaqta tarïkuyarqan, y imëka lluta purikoq warminö Patsachö gobiernokunawan takukëkaqta (Apo. 18:2, 3, 24).

Patsachö sirveqninta limpian

3, 4. a) ¿Imatataq Cristu rurashqa Jehoväpa ‘willakoqnin’ karnin? b) ¿Templota rikapakur imatataq tariyarqan? c) ¿Y pitataq Cristu churashqa congregacionta pushanampaq?

³ Jehová y ‘willakoqnin’ Patsachö templota rikapakuyanqanchömi rasumpa cristiänokunata  tariyarqan, y pëkunaqa manam mana alli religionkunaman takukäyarqantsu. Tsënö karpis ciëlopaq akrashqa cristiänokuna o Biblia ninqannöpis, ‘Levïpa tsurinkunaqa’, manam paqwë limpiotsu kayarqan. Diospa kaqchömi más limpioyänan pishirqan Malaquías willakunqannö: “[Jehová] täkurirqa, metalta tsullutseq y qellëta limpiaq nunanömi Levïpa tsurinkunata limpianqa. Y örotanö, qellëtanö chipapäratsiptinmi, Jehoväpaq alli qarë ofrenda kayanqa” (Mal. 3:3). Ciëlopaq kaq israelïtakunatam Jehová santoyätsirqan “conträtopita willakoq” Jesucristuwan.

⁴ Y ciëlopaq kaqkuna congregacionchö cristiano mayinkunata höranchö mikïnin qoykäyanqantam Cristu rikarqan. Y pëkunam, nunakuna chikikäyaptimpis kë revistawan 1879 watapita patsë Cristupa Gobiernompita yachatsikïkäyashqa. Kikin Jesusmi nirqan, ushanan tiempokunachö sirveqninkuna rikaq chämurnin, cristiano mayinkunata “miquinincuna örancho” qarëkaqta tarinampaq kaqta. Hinamampis, kë sirveqninta “llapan imecancunamanpis” churanampaq kaqtam nirqan (Mat. 24:3, 45-47). Y tsënömi kashqa. Cristum congregacionpa pushaqnin karnin, mäkoq mäkoq sirveqninta kë Patsachö imëkankunata rikänampaq churashqa. Ciëlopa ëwaqpaq kaqkunata y Patsachö quedaqpaq kaqkunata yanapanampaqmi, Jehoväpa Testïgonkunata Pushaqkunata Jesus churashqa (Juan 10:16).

‘Chacracho poqurishqana’ mikïkunata ëllun

5. Juan rikanqanchö, ¿imatataq Gobernaq Mesias rurëkan?

⁵ Apóstol Juanmi huk visionchö rikarqan Gobernaq Mesias “Señorpa junaqninchow” maskunata ruranampaq kaqta, këqa qallarqan 1914 watachö Gobernanampaq corönata chaskiriptinmi. Juanmi kënö qellqarqan: “Tsepitanam riquecorqä yulaq pucutetana. Tse pucute jananchonam tëcarqan Diospita Shamushqa Nuna ricoq. Pëqa carqan orupita coronan coronashqam y finu osin tsararishqam”, y ëllupakunampaqmi listo këkarqan (Apo. 1:10, QKW; 14:14). Hinamampis, kë Gobernaqta Jehová kachamushqan ángel kënö neqtam wiyarqan: “Miquicuna chacracho poqurishqanam. Cananqa tse osiquiwan segariquïna” (Apo. 14:15, 16).

6. ¿Manaraq cosecha qallaptin imakuna pasanampaqtaq Jesus nirqan?

⁶ “Miquicuna chacracho poqurishqanam” ninqanqa, yarpätsimantsik trïgopaqwan vallïgopaq Jesus parlanqantam. Tsëchömi kikin Jesus igualatsikun huk murukoq nunatawan, kë nunaqa, alli cosëchata ëllïta munarmi alli trïgota murun. Tsë alli trïgoqa “reynupa tsurinkunam”, o Cristuwan gobernayänampaq akrashqa cristiänokunam. Pero Jesusqa willakun chikeqnin nuna o ‘Dyablu’ paqaspa ëwëkur tsë murushqa hananman vallïgota maqtsïkunqantam, pëkunaqa kayan “mana allipa tsurinkunam”. Tsë muroq nunaqa mandakurqan ëllupaki witsan o ‘mundupa usheynin’ chämunqanyaq tsë trïgowan mana alli qora winayänanta haqiriyänampaqmi. Y tsë witsanraqmi mana alli qorapita trïgota rakiyänampaq  angelninkunata kachanan karqan (Mat. 13:24-30, 36-41, QKW).

7. ¿Imanötaq Jesus ëllïkan “miquicuna chacracho poqurishqata”?

⁷ Juan ninqannöllam Cristu hinantin Patsachö cosechëkan “miquicuna chacracho poqurishqata”. Puntataqa ëllun 144.000 ‘reynupa tsurinkunata’ o Jesus ninqannöpis ‘trigukunatam’. Punta kaq hatun guerra ushanqampita patsëmi, alli cristiänokuna cristiänotukoqkunapita hukläya kayanqan rikakashqa. Tsëmi yanapakushqa “miquicuna chacracho poqurishqata” o wakin kaq üshakunapis ëllukänampaq. Kë wakin kaq üshakunaqa manam ‘reynupa tsurinkunatsu’ kayan, antis “mana yupetapis puedipaq, mantsaquepaq alli shuyni nunacuna[m]”, y pëkunaqa ‘jinantin nasionpita tuquilaya nunacuna y tuqui idioma parlaqmi cayan’. Y Jesuswan 144.000 “santokuna” ciëlopita gobernayämuptin mandädonchö kayänampaqmi awnikuyan (Apo. 7:9, 10; Dan. 7:13, 14, 18).

Congregacionkunatam dirigikan

8, 9. a) ¿Imanötaq musyantsik congregacionchö cada cristiänopa rurëninkunata Jesus rikëkanqanta? b) 29 päginachö këkaq foto, ¿imakunata mana ruranapaqtaq yachatsimantsik?

⁸ Qepa kaq artïculochömi rikarqantsik punta congregacionkuna llapan rurayanqanta Cristu rikëkanqanta. Jesusta ‘sielucho y que patsacho mandacunampaq’ Dios churashqa kaptinmi, kanan witsampis Pushamaqnintsik dirigikan llapan Patsachö këkaq congregacionkunata y anciänokunata (Mat. 28:18; Col. 1:18). Jehovämi pëta “churashqa llapan [ciëlopaq caq] creyicoqcunapa mandacoqnin cananpaq” (Efe. 1:22). Tsëmi, Jehoväpa testïgonkunapa pachak waranqapitapis más congregacionkunachö pasanqanta musyan.

⁹ Unë witsanmi Tiatïrachö këkaq congregacionta Jesus kënö nirqan: “Diospa Tsurin nina nirëcaq nawiyoqmi, y chipapäquicaq bronsi nirëcaq chaquiyoqmi queno niyaq: Noqa musyämi llapan rurayashqequita” (Apo. 2:18, 19). Congregacionchö mana allita rurayanqantam rikarqan, tsëmi kënö nirqan: “Tsenopam noqaman creyicoqcuna cuentata qocuyanqa shonquncunacho imatapis pensayashqanta noqa musyanqäta, y llapequicunata rureniquicunamanno castiganäpaq caqta” (Apo. 2:23). Kënö ninqanmi rikätsimantsik Jesus congregacionchö imanö kayanqanllata mana rikanqanta, sinöqa cada cristiänopa rurëninkunata. Pero Tiatïra congregacionchö wakin cristiänokunapaqqa, Jesus këtam nirqan: “Manam ishquiyarqonquitsu ‘¡Diablupa allapa espantepaq!’ [...] yachatsiqui[nin]man” (Apo. 2:24). Kanan witsampis, Jesusqa alläpam kuyan ima edadyoq karpis “¡Diablupa allapa espantepaq!” Internetchö yarqamoqkunata mana rikäkoqkunata, mana alli videojuëgokunata mana pukllaqkunata o kikinkunapa munëninkunallata rurakuyänampaq yachatsikïkunaman mana ishkeqkunata. ¡Imanömi Jesus kushikun qateqninkuna llapan kawëninkunachö pë ninqanta rurayänanrëkur kallpachakuyaptin!

10. a) ¿Imatataq rikätsimantsik Jesuspa makinchö anciänokuna këkäyanqan? b) ¿Y imatataq anciänokuna musyayänan pushamänapaq Jesus churanqampita?

¹⁰ Jesusqa anciänokunawanmi congregacionta kuyakïpa pushan (Efe. 4:8, 11, 12). Punta cristiänokunapa tiemponchö anciänokunapaqmi, Jesuspa derecha kaq makinchö këkaq qoyllurkunanömi kayan nin Apocalipsis librochö (Apo. 1:16, 20). Tsë witsankunaqa  ciëlopaq cristiänokunallam congregacionkunata rikäyaq. Kanan witsan llapan anciänokuna ciëlopaq mana karpis, Jesuspa derecha kaq makinchömi këkäyan, y anciano kayänampaqqa churayashqa santo espïritupa yanapakïninwan y Diosman mañakurninmi (Hech. 20:28). Tsënö akrashqa këkarpis, pëkunaqa musyayanmi llapan cristiänokunata rikäyänampaq Jehoväpa Testïgonkunata Pushaqkunata Jesus churashqanta (lei Hechos 15:6, 28-30).

“¡Eucallämïna, Teyta Jesus!”

11. ¿Imanirtaq Pushamaqnintsik shamunanta shuyëkantsik?

¹¹ Juanta revelanqanchöqa atska kutim Jesus shamunampaq kaqta willakurqan (Apo. 2:16; 3:11; 22:7, 20). Kutimunampaq kaqta parlarqa, hatun Babiloniata y Satanaspa makinchö kaqkunata ushakätsinampaqmi parlarqan (2 Tes. 1:7, 8). Tsë llapan rurakänampaq kaqta rikëta munarmi, Apóstol Juanqa “¡Tseno callätsun! ¡Eucallämïna, Teyta Jesus!” nirqan. Kë ushanan tiempokunachö kawëkaqkunapis, rikëtam munantsik Teytan Jehovälla Mandakoq kanqanta y shutin santo kanqanta Pushamaqnintsik y Reynintsik Jesucristu musyatsikunanta.

12. ¿Imataraqtaq Jesucristu ruranqa ushakätsikoq vientokuna manaraq chämuptin?

¹² Patsachö Satanaspa kaqkunata Jesus manaraq ushakätsiptinmi, precisan ciëlopaq kaqkuna llapan sellashqa kayänan. Satanaspa kaqkunata ushakätseq ‘bientuqa’ kachakämunqa, 144.000 nunakuna señalakar ushakäriptinraqmi (Apo. 7:1-4).

13. ‘Allapa jipaqui’ hunaq qallanqanchö, ¿imanötaq Cristu kutimushqantana rikätsikunqa?

¹³ Casi llapan nunakunam, 1914 watapita patsë Cristu ‘cutimushqana’ kanqanta musyayashqatsu (2 Ped. 3:3, 4). Pero ichik tiempollachönam Jesusqa tsëta musyatsikurinqa. ¿Imanö? Kë Patsachö llapan mana allikunata ushakätsirnin. Kutimushqana kanqantaqa rikätsikunqa, “Diosnintsicpa contran” këkaq cristiänotukoq religionkunapa pushaqninkunata ushakätsirmi (lei 2 Tesalonicenses 2:3, 8). Tsëta rurarmi rikätsikunqa Jehová churanqan juez kanqanta (lei 2 Timoteu 4:1). Hatun Babiloniapa ushakëninqa qallanqa más mana alli ruraq cristiänotukoq religionkunawanmi, tsëpitanam wakin mana alli religionkunata ushakätsinqa. Jehovämi Patsachö gobiernokunapa shonqunman churanqa lluta purikoq warminö mana alli religionkunata ushakätsi munëta (Apo. 17:15-18). Tsënömi ‘allapa jipaqui’ qallëkunqa (Mat. 24:21).

14. a) ¿Imanirtaq qallanan hipakïqa raslla pasarinqa? b) ‘Diospita Shamushqa Nunapa sielucho señalninta’ rikar, ¿imataraq Jehoväpa markan yarpanqa?

¹⁴ Jesusmi nirqan ciëlopaq ‘Teyta Dios acrashqancuna’ Patsallachöraq këkäyanqanrëkur, hatun hipakï ‘ras pasarinampaq’ kaqta (Mat. 24:22). Mana alli religionkunata gobiernokuna ushakätsiyaptimpis, manam Jehoväqa ciëlopaq kaqkunata y Patsapaq kaqkunata ushakätsiyänantaqa haqinqatsu. Hina Jesusqa nirqanmi, ‘tse jipaquicuna pasariptin’ Intichö o Rupaychö, Killachö y qoyllurkunachö señalkuna kanampaq kaqta, y ‘Diospita Shamushqa Nunapa sielucho señalnin’ yurinampaq kaqtapis. Tsëkuna pasaptinmi “que patsacho llapan nunacuna mantsaquewan mana imano quetapis puedir waqaquicuyanqa”. Pero ciëlochö kawayänampaq akrashqa kaqkuna, y kë Patsachö kawaqpaq kaqkunaqa manam waqayanqatsu. Tsëpa rantinqa, Jesus kënö ninqantam yarpäyanqa: “Qamcuna balorta tsarir, cushishqa cayë; porqui librayänaqpaq ichicllanam pishi[n]” (Mat. 24:29, 30; Luc. 21:25-28).

15. ¿Imataraq Cristu kutimur ruranqa?

¹⁵ Jesucristu contrankunata manaraq vencirmi, hukta ruranampaqraq shamunqa. Kikin ninqannömi kanqa: “Que patsaman Diospita Shamushqa Nuna cutimorqa, shamonqa puedeq queninwanmi, llapan anjelnincunawan. Tsepitanam tronuman tecur, nunacunata jusganqa. Tsenam [jinantin] nasionpita nunacuna nopanman ellucayanqa. Y juc mitseq üshacunata chiwacunapita raqueqnomi nunacunata raquenqa. Üsha caqcunatam  derechu laduman acranqa; y chiwa caqcunatanam itsoq caq laduman acranqa” (Mat. 25:31-33). Këchö rikanqantsiknöpis, Cristum Juez këninchö ‘jinantin nasionpita nunakunata’ ishkë grüpoman rakinqa. Huk kaqchömi Patsachö kawaqpaq kaq ‘üshacuna’ këkäyan, pëkunam ciëloman ëwaqkunata o Patsallachöraq këkaq Jesuspa wawqinkunata yanapayan, y huk kaqchönam ‘chiwa caqcuna’ këkäyan, këkunaqa ‘Jesucristupa alli willaquininta mana cäsucoqcunam’ (2 Tes. 1:7, 8). Hina üshakunataqa “alli ruraq” nishpam reqiyan, pëkunam ‘wiñe cawaquita’ Patsachö chaskiyanqa, pero chiwanö kaqkunaqa “wiñepa, wiñenin jipacoq[mi] ewayanqa”, o chipyëpam ushakäyanqa (Mat. 25:34, 40, 41, 45, 46).

Jesus paqwë vencirin

16. Pushamaqnintsik, ¿imanötaq chikeqninkunata paqwë vencirinqa?

¹⁶ Ciëlochö reynö y sacerdötenö kayänampaq cristiänokuna señalakar ushakäriptin y Patsachö täräyänampaq kaqkuna Jesuspa derecha kaq lädonchö salvacionta chaskiyänampaq këkäyaptinnam, Pushamaqnintsik ‘listu quecanqa yapepis contrancunata bensirinanpaq’ (Apo. 5:9, 10; 6:2). Alläpa kallpayoq angelninkunawan y ciëlochö gobernayänampaq Patsapita akrashqa wawqinkunawanmi, ushakätsinqa Satanaspa makinchö këkaq gobernantekunata, tröpakunata y hatun negociantekunata (Apo. 2:26, 27; 19:11-21). Awmi, kë mana alli mundo ushakäriptinmi Jesus paqwë Satanasta vencirinqa. Tsëpitanam Satanasta demonionkunatawan wanwanyarëkaq uchkuman hitarkunqa, tsëpitaqa waranqa watam yarqunqatsu (Apo. 20:1-3).

17. ¿Imanö kawakïmantaq Cristu üshankunata Waranqa Watachö chätsinqa, y noqantsikqa imata ruranapaqtaq churapakänantsik?

¹⁷ Apóstol Juanmi ‘mana yupetapis puedipaq, shuyni nunacuna’ hatun hipakïchö salvakoqkunapaq kënö nirqan: “Tronu chopincho quecaq Achcasmi üshacunata cuidaq cuenta pecunata mitsenqa. Tsenollam cawatsicoq yacuman pushanqa mana yacunäyänanpaq” (Apo. 7:9, 17). Rikanqantsiknöpis, Waranqa Wata Jesus Gobernanqanchömi üshankunata yanapanqa mana wanushpa kawakïta tariyänampaq, pëkunanam Cristu parlanqanta wiyayanqa (lei Juan 10:16, 26-28). ¡Imëpis qatikäshunlla gobernamaqnintsikta y mushoq Patsaman chätsimänapaq Pushamaqnintsikta!

Yarpärishun

• ¿Imatataq Cristu rurarqan Rey këman chärirnin?

• ¿Pikunawantaq Cristu congregacionkunata pushëkan?

• ¿Imanöpataq Cristu kutimunqanta musyashun?

• ¿Mushoq Patsachö imanöraq Cristu pushëkämäshunlla?

[Yachakunapaq kaqpa tapukïninkuna]

[32 kaq päginachö dibüju]

Jesusqa kutimunqanta rikätsikunqa Satanaspa mundonta ushakätsirmi