WAKIN nacionkunachöqa, ima ninan kanqantapis rikëkurmi nunakuna wambrankunapa shutin churayan. Y masqa, imamampis creiyanqanmannö o wambrankunapita imata shuyäyanqanmannömi shutinkuna akrapuyan.

Pero unë witsan nunakunapis tsë costumbreyoq kayanqantam Biblia willakun. Höraqa, poqu nunayärir imata ruranampaq kaqman o imanö kawanampaq kaqman pensëkurmi wambrankunapa shutin churayaq. Tsënöllam Salomonwampis rurayarqan. Shutinqa “yamë” nishqan palabrapitam shamun, y imata ruranampaq kaqtam rikätsikurqan. Teytan Davidtam, “Salomonmi shutin kanqa y pë kawanqan witsanchöqa Israelchö yamë y kushishqa kawakuyänampaqmi rurashaq” nirqan Jehová (1 Crónicas 22:9).

Y höraqa, huk cargotana qonampaqmi Jehoväqa pipa shutintapis huktana churareq. Tsënömi pasarqan Abrahanpa qolloq warminwampis, Särana shutin kanampaqmi Jehová nirqan, y tsë shutiqa “Princesa” ninanmi. ¿Imanirtaq tsë shutitana churapurqan? Génesis 17:16 textochömi, Jehová Abrahanta kënö nirqan: “bendeciptïmi pëpita tsuriki yurinqa, bendeciptïmi nacionkunapa maman kanqa, markakunapa reyninkunam pëpita yuriyanqa”. Tsëmi Särata Jehová ima cargota qoykanqanta musyayänampaqqa, mushoq shutin ima ninan kanqantaraq puntata musyayänan karqan.

Llapan shutikunapitapis más precisaq kaq Jehová shutitaraq kananqa rikärishun. ¿Ima ninanraq tsë shuti? Moises Shutimpaq tapuptinmi, “Noqaqa munanqämi kashaq” nirqan Dios (Éxodo 3:14). Wakin Bibliakunachoqa kënömi traduciyashqa: “Noqaqa kashaq kanäpaq kaqmi” o “Noqaqa munanqa Këmanmi Chäshaq” (Biblia del nuevo milenio, nota; The Emphasised Bible, de Rotherham). Shutin ima ninan kanqantapis Dios willamarnintsikqa tukï rurëta puëdenqantam rikätsimantsik. Tsëta más musyarinapaqqa këman pensarishun, ¿imakuna rurëtataq huk mama huk hunaqllachö puëden? Wambrankuna imatapis wanayanqampitam kanqa, hampeqnin, cosinapaqnin, yachatseqnin, y huk rurëkunatapis. Hina tsënöllam Jehoväpis imëka rurëta puëden. Pero pëqa imëka munanqantam rurëta puëden. Tsëmi Diospa shutinta reqiqa, nunakunarëkur tukïta rurëta puëdenqanta alli musyë y tsëpita agradecido kë.

Diospa shutin ima ninan kanqantapis mana musyaqkunaqa, manam musyayantsu Dios imanö kanqanta. Pero Bibliaqa willamantsik pë alläpa alli Consejakoq kanqanta, Salvakoq kanqanta, Kuyakoq Teyta kanqanta y maskunapis kanqantam. ¿Alläpam kushikuntsik Diospa shutin ima ninan kanqantapis cuentata qokurirqa aw?

Tsënö kaptimpis, atskaq nunakunam Diospa shutinta reqinantsikta munayantsu. Imanir mana munayanqanta rikärishun.