¿Rasumpatsuraq Bibliata Dios qellqatsirqan?
“Teyta Diospa palabranqa quiquinpitam shamun, y allim yachatsicunantsicpaq, mana allita rurayaptin willapänantsicpaq, piñapänantsicpaq y allicunallatana ruranantsicpaqpis. Tse palabrata wiyacurmi, Teyta Diospa wamrancunaqa listuna quecayanqa allicunallatana rurayänanpaq.” (2 TIMOTEU 3:16, 17.)
¡IMANÖ shumaqmi apóstol Pabluqa Bibliapaq parlarqan! Yachatsikïnin alläpa väleq kaptinmi Antiguo Testamento nishqampaq allita parlëkarqan, y tsë librokunaqa pëpa tiemponchö karqannam. Pablu ninqannöllam punta cristiänokuna qellqayanqan librokunapis alläpa välin y llapanqa 66 librokunam kayan.
¿Y qamqa Pablunöllaku Bibliapaq pensanki? ¿Creinkiku Dios qellqatsishqa kanqanta? Punta kaq y qepa kaq cristiänokunapis Biblia Diospa Palabran kanqantam creiyarqan. 1300 watakuna Inglaterra nacionpita sacerdote John Wyclef nishqampis, “rasun kaqllata imëpis yachatsikoq” neqmi Bibliapaq. Hina Bibliata Dios qellqatsishqa kanqanqa, “rasumpa kaqta yachatsikunqantam rikätsikun” ninmi Nuevo Diccionario Bíblico Certeza nishqampis, y tsënöllam niyan huk librokunapis.
Manam puntatanönatsu rikäyan
Kanan witsanqa manam unënönatsu Biblia ninqanman nunakuna markäkuyan. El mundo de las religiones nishqan librom kënö nin: “Llapan cristiänokunam imanö kawayänampaq kaqta Biblia yachatsikunqanta y markäkuyänampaq yanapakunqanta musyayan”. Pero kawëninkunachöqa manam tsëta rikätsikuyantsu. Huk diccionarionam, Bibliaqa “nunakunapa lluta yachatsikïninlla, y mana markäkïpaq” kanqanman pï më pensayanqanta willakun. Y Biblia qellqaqkuna Diosman markäkoq kayanqanta creirpis, pantaq nunakunatanö y kanan nunakunanö musyaq y atska yanapakïkunayoq mana këkar, Diospa sasa o aja yachatsikïninkunata rikätsikïta tïrashqa nunakunatanöllam rikäyan.
Rasun kaqchöqa wallkaq nunakunallam kanan witsan Biblia ninqannö kawayan. ¿Ëka kutitaq wiyashqa kantsik kanan tiempontsikchöqa manam Biblia yanapakunnatsu neqta? Pï mëmi cristiano tukïkarpis Biblia yachatsikunqannöqa kawayantsu y wakinqa imata yachatsikunqanta musyëkarpis mana pëkunapaqnö kaptinqa manam wiyakuyantsu. Y hukwan hukwan punukï, suwakï, ulikï o llullakuy y machar upyar kakï mana alli kanqanta Biblia willakïkaptimpis, tsëkunata rurarllam wakinkunaqa purikuyan (1 Corintios 6:9, 10).
Pero ¿imanirtaq tsënö kayan? 1900 qallanan watakunam, La Biblia es verdad nishqan libronchö arqueólogo sir Charles Marston imanir tsënö kayanqanta willakurqan. Tsëchömi tsë witsan “qellqaqkuna [Bibliapa contran] imatapis pensayanqanta nunakuna raslla creiriyanqanta” nirqan. ¿Kanan witsampis tsënötsuraq pasëkan? ¿Rasllatsuraq creirishwan Bibliapaq mana allita parlayanqanta y yachatsikuyanqanta? Tsëkunata qateqninchö rikärishun.