“Mastaraqmi washkuta munä”

ALBERTOQA 11 watayoqllaraq këkarmi washkuta upyar qallëkurqan. * Pëwan amïgonkunam televisionchö rikäyanqannölla pukllayänanrëkur ëllukäyaq montikuna rurinchö. Televisionchö rikäyanqanllata tsëmi o wakmi kä nir ardëlla pukllarpis, washkutaqa rasumpam upyayaq.

Tonynam 40 watayoq këkar machakur qallëkurqan. Qallarllaqa huk ishkë cöpallatam paqaskunapa upyaq, tsëpitaqa pitsqa o hoqta cöpatanam upyaq, nïkurqa hunaqchö ëka cöpata upyanqantapis manam mäkoqnatsu.

Albertoqa vicio haqita tïrarqanmi, pero Tonyqa familiankuna y amïgonkuna yanapëta munayaptimpis manam wiyakurqantsu. ¿Imataq tsëpita pasarqan? Albertoqa kawëkanran, pero Tonyqa machashqa manejarmi huk accidentechö wanurqan.

Hapallankunalla upyarqa pitapis mana imanäyanqantam wakinqa pensayan, pero manam tsënötsu, alläpa upyaqkunaqa familiankunata y amïgonkunatam tukïnöpa hipatsiyan o ñakatsiyan. * Mëtsika kutim washkuqa nunakunata qayapänakïman, maqanakïman, ofendinakïman, wanutsinakïmampis chätsishqa y tsë causallam cärrokunachö y trabäjokunachöpis desgraciakuna pasan. Rasun kaqchöqa, washkupa culpan mëtsika qellëtam nunakuna wata wata ushayan, y manam tsëllatsu, alläpa upyaqkunaqa tukï problëmakunaman y yarpachakïkunamanmi chäyan, hina familiankunatapis alläpam hipatsiyan.

Tsënö karpis, Estados Unïdoschö Institutos Nacionales de la Salud nishqanmi kënö nin: “Imëpis upyaqkunaqa manam llapantsu borracho kayan, y borrächokunapis manam llapantsu cada hunaq upyayan”. Mana borracho karpis, pï mëmi mana mäkïllata alläpa upyar qallayashqa. Wakinnam höralla upyayan, pero qallëkurqa paqwë mana mäkuyanqanyaq apyakurkuyan.

Tsëqa, ¿imanöraq musyashwan alläpa upyëkanqantsikta? ¿Imanöraq musyashwan manana ‘más washkuta ashinapaq’? (Proverbios 23:29, 30, 35.) Qateqnin yachatsikïkunachömi kë tapukïkunapa respuestanta rikärishun.

[Päginapa ura kuchunchö willakïkuna]