500 idiömachö alli willakïkuna

RUANDA nacionchö guerra kaptinmi, traduccionchö trabajaqkuna guerrapita qeshpiyänan sitiokunaman ëwakuyan. Y llapanninkunatam haqiriyampis. Pero puritsina computadörankunataqa imëkanöpapis apakuyanmi. ¿Imanirtaq tsëllataqa apakuyan? Kiniaruanda idiömaman publicacionkunata traducïta mana haqiyänanrëkurmi.

Asiachö sureste lädopam alli paqasyanqanyaq huk shipash traducir trabajan. Alläpa achachaptin, luz ëwakuptin y utishqa karmi trabäjonta ras ushantsu, pero tsënö kaptimpis hinapam traducin. ¿Imanir? Traducikanqan publicacionkuna höranchö yarqunampaqmi.

Hinantin Patsachö llapan traduceqkunaqa kayan 2.300 yanapakoqkunam, y 190 markakunachömi këkäyan. Y 20 hasta 90 watayoq ollqukuna y warmikunam kayan, y pëkunaqa trabajëkäyan 500 idiömachö Bibliapita shumaq yachatsikïkunata nunakuna chaskiyänampaqmi (Apocalipsis 7:9).

Tukïläya nunakunapaqmi traduciyan

Kanan witsankunaqa, Jehoväpa testïgonkuna tukï idiömakunachömi publicacionkunata traducikäyämun. 1985 watachöqa, Täpakoq revista cada killa yarqamoq 23 idiömakunachömi, y tsëqa alläpa kushikïpaqmi karqan. Kananqa 176 idiömakunachönam cada killa tsë revista yarqamun, tsënöpam hinantin patsachö tsë revistallapita yachakuyan.

Kë llapan idiömakunapitam 50 idiömakunachönö cada killapaq Täpakoq revistalla yarqïkan, y pipis mana ranteq kaptinmi huk revistakunata o librokunataqa ni mëqan emprësakuna rurayantsu. Pero Diospa palabranta nunakuna më tsëchöpis leiyänanta munarmi, Jehoväpa Testïgonkunaqa tsë revistakunata rurëkäyämun. Tsëmi kikin testïgokuna shonqun nenqanmannö ëkallawampis yanapakuyanqanwan më tsë markakunaman publicacionkuna chëkan (2 Corintios 8:14).

¿Allipaqku tsë llapanta rurëkäyämun? Awmi. Nunakunaqa alläpam agradecikuyan parlayanqan idiömachö Diospa yachatsikïninta leirnin, y qateqninchömi tsëta rikärishun. Tutëllaraqmi Bibliapita willakïkuna willakoq librota * mískito idiömachö huk warmi chaskerqan, tsë idiömataqa 200.000 nunakunam parlayan Nicaragua nacionchö, y pëkunapaqqa tsëllaraqmi publicacionkunata traducir qallariyashqa. Tsë warmi librota kekätseqta rikärirmi iglesiapita pastorpis munarqan. Y ¡20 kilo cafëwan trokayänampaq niptimpis manam munarqantsu!

Pasaq chunka watakunachömi México nacionchö 15 idiömapitapis maschö publicacionkunata  traduciyashqa maya, náhuatl y tsotsil nishqan idiömakunachö. Tsënöpam huk idiömachö y sëñaschö 72 congregacionkuna, 1.200 congregacionkunamanna mirashqa. Muroq cuenta nunakunapa shonqunman Diospa yachatsikïninta Testïgokuna churayanqantaqa kikin Diosmi winëkätsin (1 Corintios 3:5-7).

80 idiömakunaman traducikäyämunqan libro

Kanan witsanqa, 80 idiömakunachömi Jehoväpa Testïgonkuna Traducción del Nuevo Mundo de las Santas Escrituras nishqan Bibliata llapanta o pullanllata karpis horqëkäyämun. ¿Ima niyantaq nunakuna tsëta rurayämunqampaq? Tsuana idiömachö Biblia yarqaramuptinmi sudafricapita huk testigo kënö nerqan: “¡Alläpam yanapakun! Kayikïllapaq [mayayllapaq] palabrakunawan traducishqa kaptinmi leinan alläpa gustëkaman. Kananqa Diospa Palabranta masran kuyashaq”. Mozambique nacionchö publicacionta leeqmi kënö nirqan: “Tsonga idiömachöqa revistäkuna, follëtökuna y librökunapis karqanmi, pero Bibliäkunaqa manam kapayämarqantsu. Bunrurur tillapyar ciëlochö pukutë këkar mana tamyamoqnömi karqan. Pero Traducción del Nuevo Mundo nishqan Biblia tsonga idiömachö yarqaramuptenqa imëka tamya chäramoqnömi karqan”.

Bibliapa alli yachatsikïninkunata traducimoqkuna, y nunakuna leiyänampaq apaqkunapis, unëna Jesus kënö willakonqantam rurëkäyan: “Llapan nunacunata alli willaquinïta willayänequi[m] presisan; tsenopa nunacuna Diospa mandaquininman yecuyänanpaq, y jinantin nasioncunacho tse alli willaquita musyariyaptinnam, que patsapa ushenin chäramonqa” (Mateo 24:14).

[Päginapa ura kuchunchö willakï]

[31 kaq päginachö dibüju]

(Imanö yarqamunqanta rikëta munarqa, kikin publicacionta rikäri)

TRADUCCIÓN DEL NUEVO MUNDO WAKIN

NISHQAN BIBLIA PUBLICACIONKUNA

Llapan

o pullan kaq

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

ËKA IDIÖMACHÖPIS RURAYANQAN

[30 y 31 kaq päginakunachö dibüjukuna]

2.300 ollqukuna y warmikunam 500 idiömakunaman publicacionkunata traducir yanapakïkäyan

BENÍN

ESLOVENIA

ETIOPÍA

GRAN BRETAÑA