4 Rasuntsuraq o manatsuraq nir mana kanëkipaq alli yachakï

‘¿Imanirtaq noqaman ichiclla marcäcunqui? ¿Imanirtaq, “Mä rasonpacush” nir, yarpacacharqonqui?’ (Mateo 14:31)

¿IMANIRTAQ ALLÄPA SASA KANMAN? Jesuspa wakin qateqninkunapis, rasuntsuraq o manatsuraq niyarqanraqmi höraqa (Mateo 14:30; Lucas 24:36-39; Juan 20:24, 25). Diosman mana markäkïqa hutsam, kë hutsamanqa “pï mëpis ishkinmanmi” (Hebreus 12:1, NM). “Manam llapan runacunatsu Tayta Diosman creyicur cawayan” nerqanmi apóstol Pablupis (2 Tesalonicenses 3:2, MTCS). Tsëpis, markäkïyoq këqa manam alläpa sasatsu o ajatsu. Wakin nunakunaqa  manam ni imatapis rurayantsu alli markäkïyoq kayänampaq. Pero alli markäkuyänanrëkur kallpachakuyaptenqa Dios yanapanmi.

¿IMANÖTAQ MUSYANKIMAN RASUN KAQTA? Puntataqa, rasuntsuraq o manatsuraq nir tapukonqëkikunatam musyëta tïranëki. Más yachakurinapaq këta rikärishun: Jesus kawarimonqanta Tomasta willariyaptimpis pëqa manam creirqantsu. Rikëtaraqmi munarqan. Tsënam kikin Jesus Tomas rikänampaq yuriporqan, tsëraqmi alli markäkïta yachakorqan (Juan 20:24-29).

Jehová Diosqa Bibliata qomarqontsik rasumpa kaqta musyanapaqmi, tsëchö imëka tapukïnintsikpa respuestanta tarinapaq. Wanutsinakïkunata, chikinakïkunata, y imëka ñakaykunata o hipakïkunatam Dios apamun nirmi, wakinkunaqa pëman markäkuyantsu. Këpaq Biblia ima nenqantapis rikärishun.

Nunakunataqa manam Diostsu gobernëkan. Rasun kaqchöqa, nunakunapa ‘mandacoqninqa’ Jesus nenqannöpis Satanasmi, pëqa huk mana alli espïritum (Juan 14:30). Huk kutim, adorananrëkur “jinantin munducho nasioncunata” Satanás munatserqan Jesusta. Kënömi nerqan: “Que llapan nasioncunaqa maquïchomi quecan. Munarqa pitapis qoycümanmi. Tsemi shumaq queninta ricacunequipaq y tsecho mandacoq canequipaq qoycushqequi”. Tsënam Jesus kënö nerqan: “Diospa palabranmi escribirëcan: ‘Diosllatam adoranequeqa y sirwinequeqa’” nir (Lucas 4:5-8). Këchö rikanqantsiknöpis, kë mundota Satanás gobernëkanqantaqa manam Jesus negarqantsu. Mana allikunataqa manam Diostsu apamun, antis Satanaswan nacionkunata gobernaq nunakunam (Apocalipsis 12:9, 12).

Hipakïkunata Jehoväqa ushakäratsimonqanam. Llapan nunakunata gobernanampaqmi Diosqa Tsurin Jesucristuta churashqa (Mateo 6:9, 10; 1 Corintios 15:20-28). Unëpita Biblia nenqannöpis, kë alli willakïkunataqa llapan nunakunanam wiyëkäyan (Mateo 24:14). Ichik tiempollanam pishin chikeqninkunata y hipakïkunata Diospa gobiernon paqwë ushakäratsimunampaq (Daniel 2:44; Mateo 25:31-33, 46; Apocalipsis 21:3, 4).

¿IMAKUNACHÖTAQ YANAPAMANTSIK? Biblia nenqannöpis, Diospa yachatsikïnimpaq rasuntsuraq o manatsuraq niyanqanqa, ‘imeca bientuwan wacman queman puritsiquicaqnomi mana rasonpa caqman apan’ nunakunata (Efesios 4:14; 2 Pedru 2:1). Pero tapukïninkunapa respuestanta asheqkunaqa manam tsënötsu kayan, antis ‘Diosnintsicman marcäcurmi imepis cawacuyan’ (1 Corintios 16:13).

 Kë revistata ruraq Jehoväpa testïgonkunaqa, rasuntsuraq o manatsuraq nir tapukuyanqëkikunatam contestayämonqa, y Diosman más alli markäkunëkipaqmi yanapayäshunki. Pëkunawan parlarinëkipaq, y yachatsikuyanqanta kikiki yachakunëkipaqmi niriyaq. Tsënö rurarqa más allim Diosman markäkunki.

Más yachakïta munarqa, Rasumpëpaqa, ¿imatataq Biblia yachatsikun? * libropa 8 y 11 capïtulonkunachö këkaq, “¿Imataq Diospa Reinon?” y “¿Imanirtaq hipakïkunata Dios rikaran?” neq tïtulokunata ashiri.

[Päginapa ura kuchunchö willakï]

[9 kaq päginachö dibüju]

Tapukïninkunapa respuestanta asheqkunaqa, qaqa hananchö wayi rurashqanömi kayan