ESTÄDUS UNÏDUSPITA Katherïniqa, 16 watayoqllam bautisakurqan. Alläpa precisaqpaqmi yachatsikïta churarqan, peru markanchöqa manam chaskikuyaqllatsu. Kënömi nin: “Diosta reqiyänampaq mañakoq nunakunapa willakïnintam publicacionkunachö leyeq kä. Tsënö nunakunatam tarita munaq kä, peru manam tareqtsu kä”.

Tiempuwannam Katherïniqa pensarirqan, Diospita yachakïta munaq nunakunapa markanman ëwëta. Peru puntata familiampita ishkë semänallapa yarqurir alläpa llakikunqanmanmi pensaq. ¿Atska tiempupa yarqurqa aguantanmantsuraq karqan? Diospita yachatsikur kushishqa këta munanqanmi yanaparirqan. Tsëmi mëchö yanapakunampaqnö kanqanta musyapakurir, Guamchö këkaq sucursalman cartakurqan, tsënam willariyarqan mëchö yanapakoqkunata wanayanqanta. Y 26 watayoq këkarmi, 2007 wata juliu killachö, lamar kuchunchö këkaq Saipan markaman ëwarqan, tsë islaqa këkan täranqampita 10.000 kilömetruchömi. ¿Alliku tsëchöqa karqan?

Mushoq congregacionman chanqampita ichik tiempullatanam, Bibliapita yachakïta munaq 45 watayoq Dörista taririrqan. Yachatsikun librupa qallanan kima capïtulunkunata yachatsir usharirmi, Katherïniqa yarpachakur qallëkurqan. Kënömi nin: “Dörisqa alleqmi yachakoq, y noqaqa manam pëta shumaq yanapaqnötsu sientikurqä. Manam tsënö yachakïta munaqtaqa yachatsishqatsu karqä, tsëmi juk mas alleq yachaqta o edä mayinta wananqanta pensarqä”. Tsëmi Katherïniqa Jehoväman mañakurqan alli yachatseq panita tarinampaq. Y tsëta Dörista willanampaqmi pensëkarqan.

Katherïnim nin: “Manaraq willaptïmi, Dörisqa juk problëmanta willamarqan. Shumaq wiyarirmi, tsënö problëmapa pasaptï Jehovä imanö yanapamanqanta willarqä”. Tsënam Dörisqa Katherïnita agradecikur kënö nirqan: “Qamtaqa Jehovämi kachëkamushurqunki. Wayïman chämunqëki junaqqa, atska hörapanam  Bibliata leyikarqä y pillapis yachatsimänampaqmi Diosman rogakurqä. Y tsëllachönam punküman qayakaramurqëki. ¡Jehovämi mañakïnïta wiyarirqan!”. Tsëta yarparqa Katherïniqa waqarinmi, y kënömi nin: “Tsënö nimanqanwanqa Jehovämi mañakunqäta contestëkämarqan. Y Jehovämi rikëkätsimarqan Dörista yachatsinäpaq listu këkanqäta”.

2010 watachömi Dörisqa bautisakurirqan y atskaqtam Bibliapita yachëkätsin. Katherïnim nin: “¡Alläpam agradecikö unëpita rurëta munanqä cumplikanqanta!”. Kananqa Kosrae islachömi precursöra especialnö yanapakïkan.

Pachakpitapis masmi, 19 watayoqpita hasta 79 watayoq cristiänukunam Micronesiaman ëwayashqa, mas yachatsikoqkunata wanayanqanman. 2006 watachömi, Guam nacionta 19 watayoq Ërica yanapakoq ëwarqan, wakinkuna imanö sientikuyanqantam kënö nin: “Diospita yachakïta munaqkuna kayanqan markakunachöqa, precursorkunaqa alläpa allim pasakuyan. Jehovätam alläpa agredecikö tsënö sirwinäpaq yanapamanqampita. ¡Këmi alli vïdaqa!”. Kananqa këkan precursöra especialnömi Marshall islapa Ebeye markanchö. Juk markakunachö yanapakïqa manam fäciltsu. Micronesiachö yanapakoqkuna imanö venciyanqanta kimata rikärishun.

Wallkallawan kawakïta. 2007 watachö Palaos markaman chärirmi, 22 watayoq Simonqa cuentata qokurirqan Inglatërrachö gananqampitaqa mas ichikllata gananampaq kaqta, kënömi nin: “Llapan munanqäta rantita mana puëdinqätam yachakurqä. Kananqa alleqran pensä mikunapaq imata rantinapaq y entërupam tumamö chaninta tapukurllaraq. Imäpis pakiptinqa, makwa repuestukunatam ashï y pipis altsëta yanapamänampaqmi mañakö”. ¿Wallkallawan kawëta yachakunqan yanapashqaku? Kënömi nin: “Yachakurqö rasumpëpa imata wananqäta, y wallkallawan kawëtam. Jehovä cuidëkamanqantam rikarqö. Qanchis watapanam këchö yanapakïkä, peru mikunäpaq y mëchö pununäpaqpis kashqam”. Awmi, Jehoväqa pëta sirwiyänanrëkur precisaq kaqllawan kawaqkunataqa yanapanmi (Mat. 6:32, 33).

Llakikïkunata. Ëricam kënö nin: “Familiäpita mana yarqushqa karninmi llakikunäpaq kaqta pensarqä”. Jina ninmi: “Manaraq viajarmi, llakikïkunata imanö vencinapaq parlaq yachatsikïkunata Täpakoqchö leyirqä. Tsëchömi tarirqä,  juk mama wamranta, ‘noqapita mas allim Jehoväqa cuidashunki’ ninqanta, tsëmi alläpa yanapëkamarqan”. Marshall islakunachö këkaq Majuro markachömi Hannahwan qowan Patrick yanapakuyan. Hannahqa llakikïninta vencin congregacionninchö yanapakurninmi. Kënömi nin: “Jehovätam alläpa agradecikö familiänö entëru munduchö cristiänu mayïkuna kayanqampita. Pëkuna yanapayämaptinmi, yachatsikoqkunata wanayanqan markakunachö yanapakïkä”.

Wakinkunapita rakikashqa sientikïta. Simonmi nin: “Juk nacionman chäriptikiqa imëkapis jukläyam. Höraqa brömakupti mana entiendiyaptinmi mana alli sientikö”. Ëricanam nin: “Qallananllachöqa wakinkunapita rakikashqam sientikoq kä. Peru Diospa kaqchö yanapakoq shamunqäman pensanqämi yanapamarqan alli sientikunapaq. Tiempuwanqa amïgu këmanmi chäyarqä y alläpam kushikö”. Palauanu idiömata yachakurmi Simonqa tsë markachö cristiänukunawan mas amïgu këman chashqa y masmi kuyayashqa (2 Cor. 6:13). Jinamampis, yanapakoq ëwashqakuna patsan cristiänukunawan juntu trabajayanqanmi yanapakun congregacionchö kuyanakï kanampaq. ¿Ima mas bendiciontataq chaskiyan wanayanqan sitiukunachö yanapakoqkunaqa?

Pablum qellqarqan: “Pipis atscata muroqqa atscatam ellun” (2 Cor. 9:6). Tsënö nirqa mas yanapakoqkunapaqwanmi nikan. ¿Imatataq cosëchayashqa Micronesiachö yanapakoqkuna?

Micronesiachöqa estudiu biblicuta qallëta puëdintsikran, y rikantsikran Biblia mandakunqannö kawar qallayaqtapis. Jina Patrickwan Hannahqa, 320 nunayoq Angaur islachöpis yachatsikuyashqam. Ishkë killa këkarnam, wamranta japallanlla wätaq y Bibliapita yachakïta munaq warmita tariyarqan. Bibliapita yachakurmi cambiukunata rurarqan. Hannahm willakun cada yacharatsir biciclëtankunachö kutikurnin “gracias Jehovä” ninakuyanqanta. Jina ninmi: “Kë warmitaqa Jehovämi markanman apamushqa, peru mas Diospita yachatsikoqkunata wanayanqan sitiukunachö yanapakuyaptïmi noqakuna tariyänäpaq Jehovä permitirqan. ¡Kë pasayämanqanmi mas shumaqqa kashqa!”. Ërica ninqannöpis, Jehoväta reqiyänampaq nunakunata yanapar kushikunqantsiktaqa manam imanö willakïtapis puëdintsiktsu.

Mëtsikaq nacionkunachömi Diospita yachatsikoqkunata wanayan. ¿Ëwëta puëdinkimantsuraq? Tsë munëta Jehovä qoshunëkipaq mañakï. Parlë anciänukunawan, congregacionkunata watukaqkunawan y juk lädukunachö yanapakushqakunawampis. Y valorarninqa, mëchö sirwita munanqëkita y imanö kanqanta musyänëkipaq sucursalman qellqë. * Itsa jövinpis, mayorpis, soltërupis o casädupis yanapakoq grüpuchö qampis këkankiman, y alli cosëchata cosechar kushikurinkiman.