2009 wata diciembre killachömi, Rusiachö këkaq Tribunal Supremo nishqan yapë mandakurqan, Rusia nacionchö këkaq Taganrog markachö, Jehoväpa testïgonkuna rurëninkunata dejayänampaq y Yachatsikuyänan Wayinkunata qochiyänampaq o qechuyänampaq; jina 34 publicacionninkunapa yachatsikïninkuna chipyëpa mana alli kanqantam niyarqan. Y wawqintsikkunanam, Internetchö Jehoväpa testïgonkunapa rasumpa kaq päginanman churayarqan Rusiachö autoridadkuna pasëpa mana allipa tratayanqanta. Tsë päginamanqa mana allipa tratashqa atskaq cristiänokunapa y wamrakunapa fötonkunatam churayarqan.

Tsëpita ichik killakunallatam Queensland (Australia) markachö tsë noticiata leishqa juk testigo familiapita, Rusiachö këkaq Centro Administrativo de los Testigos de Jehová nishqan, juk encomiendata y juk cartata chaskirqan. Tsë cartam kënö nirqan: “Kuyashqa wawqikuna y panikuna: Cody y Larissa wamräkunam alläpa kushikuyashqa Rusiachö cristiano mayintsikkuna markäkïninkunachö y tukï pruëbakunachö alli tsarakuyanqampita. Tarjëtakunatam qellqayämushqa y juk encomiendatam rurayämushqa Taganrog markachö këkaq wamrakunapaq. Këta musyayänantam munayan: alläpa karuchö këkarpis, kanmi juk wamrakunapis Jehovällata sirweq y pëkunaman alläpa yarparaq. Kuyakïninkunatam pëkunapaq apatsiyämun”.

Taganrog markachö këkaq wamrakuna tsë qarëta chaskirirqa, alläpa kushikuyanqanta rikätsirmi, Australiachö këkaq familiapaq dibüjoyoq cartakunata apatsiyarqan. ‘Wamrakunapa shimimpita’ yarqoq yanapakïta rikarmi, Rusia Sucursalchö sirweq juk wawqi, Cody y Larissa wamrakunaman alläpa kushishqa kënö nir qellqarqan: “Ima mana allitapis mana ruranqantsikpita castigamashqaqa, ichik karpis o jatun kashqapis alläpam llakitsimantsik, ¿aw? Tsënömi Taganrog markachö wawqintsikkunapis alläpa llakishqa këkäyan, ima mana allitapis mana rurëkäyaptinmi, castigarnin Yachatsikuyänan Wayinkunata qechuyashqa o qochiyashqa. Pero alläpam kushikuyanqa karu nacionkunachöpis pëkunapaq alläpa yarpachakoq wawqikuna y panikuna kayanqanta musyarir. ¡Alläpam agradecikuyä alläpa alli y kuyakoq kayanqëkipita!” (Sal. 8:2).

Rasunmi, entero Patsachöqa cristiano mayintsikkunawan juk kastanölla kantsik y juknintsik juknintsik kuyanakunqantsikmi yanapamantsik problëmakunapa pasarnin alli tsarakunapaq. Autoridadkuna publicacionnintsikkuna nunakunata chikinakïman apanqanta nikäyaptimpis, wamrantsikkunaqa juk markachö wakin wawqikuna y panikuna alli kayänanta munarmi alläpa yarpachakuyan, y më nacionpita y ima costumbreyoq kayaptimpis,“sitsun qamcuna jucniqui jucniqui cuyanacuyanqui, llapan nunacunam musyariyanqa noqapa disipulücuna cayanqequita” nir Jesus parlanqantam rasumpa kanqanta rikätsikuyan (Juan 13:35).