Templuman yëkuyänampaqqa, tsë pasadïzuparan pasayaq y tsëpa yëkurmi sagrädu cuartuman chäyaq. Peru tsë pasadïzupa altunqa, ¿ëka metrutan karqan? Mushoq Patsachö Kawaqkunapaq Bibliachömi 2 Crön. 3:4 textuchö kënö nin: “Templuman yëkuna pasadïzupa anchunqa isqun metrum karqan y altunnam cientu veinti [cödus] karqan”. Wakin Bibliakunapis “120 cödus” ninmi. Peru 120 cödus kashqa kaptinqa, 53 metruschi altun karqan.

Peru Mushoq Patsachö Kawaqkunapaq Bibliaqa, 2023 watapitaqa mananam 120 cödus ninnatsu, sinöqa 20 cödus o 9 metrus ninnam. a Imanir cambiayanqanta rikärishun.

1 Rëyes libruchö templuman yëkuna pasadïzupaq parlarqa, manam altun ëka kanqanta willakuntsu. Këllaman pensarishun: 1 Rëyes 6:3 textuchömi Jeremïas parlarqan templuman yëkuna pasadïzupa anchun y largun ëka metru kanqanta. Tsëpitanam qateqnin kaq capïtuluchö parlarqan templuchö cösaskuna imanö kanqampaq; parlarqanmi templupa pasadïzumpa frentinchö këkaq Mar niyanqan jatun lavatoriupaq, yakuta puritsiyänan diez carrëtakunapaq y ishkan columnakunapaq. Peru manam parlarqantsu pasadïzupa altumpaqqa (1 Rëy. 7:15-37). Templuman yëkuna pasadïzupa altun 50 metruspitapis mas kashqa kaptinqa, templupita mas altuchi kanman karqan. Tsënö këkaptinqa, ¿imanir-raq Jeremïas tsëpaq parlarqantsu? Tiempu pasariptinmi, unë pasakunqankunata willakoq judïukuna niyarqan, templuman yëkuna pasadïzupa altunqa templupita mas bäjulla kashqa kanqanta.

Wakin yachaq nunakunam niyan templuman yëkuna pasadïzupa altun 120 cödus kashqa karqa, fäcil-lla ishkirinampaq kaqta. Unë witsankunaqa, imatapis altuta ladrïlluwan y rumiwan rurayänan kaptinqa, qallananchömi anchuta rurayaq y tsëpita cada altuyanqanmannömi mas llanuta rurayaq; tsënömi egipciukunapis rurayaq. Peru Salomon ruratsinqan templupa plänunqa manam tsënö rurayänampaqtsu karqan. Wakin yachaq nunakunaqa niyan templupa perqampa anchunqa seis cödus kanqantam, tsëqa cäsi 3 metrusnömi. Construccion asuntuta alli musyaq Theodor Busink nuna kënö nirqan: “Templupa perqampa anchunta cuentachö katsirqa, fäcil-llam cuentata qokurintsik templuman yëkuna pasadïzupa altun 120 cödus kashqa karqa fäcil-lla ishkirinampaq kaqta”.

Capazchi 2 Crönicas 3:4 textuta copiarnin pantayarqan. Unë qellqayanqan wakin copiakunachö tsë versïculuchö “120 cödus” niptimpis, wakin confiakuypaq copiakunachöqa “20 cödus” niyanmi, tsënömi nin cuatrocientus wata witsankunachö Códice alejandrino y quinientus wata witsankunachö Códice ambrosiano niyanqampis. ¿Imanir-raq pantayarqan? Hebreu idiömachöqa cien palabrawan cödus palabraqa igualnöllam. Tsëchi copiarninqa, “veinti cödusta” churayänampa rantin “cientu veintita” churayarqan.

Salomon ruratsinqan templu imanö kanqanta musyanqantsik alli kaptimpis, masqa yanapamäshun tsë templu imata rikätsikunqanta musyanqantsikmi. Tsë templuqa rikätsikun adoranantsikpaq Jehovä patsätsimunqan templutam, juk parlakuychöqa, salvamänantsikpaq Jesus wanunqanta valorarnin imanö adoranantsikpaq Jehovä patsätsimunqantam. Llapantsikmi, ¡alläpa agradecikuntsik tsë templuchö juntu adoranqantsikta! (Heb. 9:11-14; Apo. 3:12; 7:9-17).