PASAQ watakunachö Indonesia nacionchö Sangir Besar ichikllan islaman viajashqa karqa, lamar kuchunchö këkaqtam kima panikunata rikankiman karqan. Tsë panikunataqa Bibliata yachatsikuyanqampitam tsë islachöqa reqiyaq, peru lamar kuchunchöqa manam Bibliapitatsu yachatsikuykäyarqan. Tsëqa, ¿imatataq rurayaq?

Tsë panikunaqa lamar rurinman yëkuykurmi pelöta tamäñu rumikunata lamar kuchunman apayämoq. Tsëpitanam qerupita rurashqa ichikllan sïllankunaman jamëkur tsë rumikunata runtu tamäñunö tikranqanyaq pakiyaq. Tsë pakiyanqantanam plasticu baldikunaman winarkur wayinkunaman apayaq. Wayinkunaman chäyänampaqqa escalërakunataran witsäyaq. Y chäratsirnam jatusaq costalkunaman winayaq. Tsëtanam camion shamuptin rantikuyaq y tsë pakishqa rumikunataqa carretërata rurayänampaqmi utilizäyaq.

Tsë panikunapita juk kaq panipa jutinqa Huldämi. Pëqa wakin kaqkunapita mas tiempupam lamar kuchunchö trabajaq. Y gananqanwanqa familianchö gastukunapaqmi yanapakoq. Peru Huldäqa JW Library^® aplicacionta utilicëta munarmi tablet-ta rantinampaq mas qellëta wanarqan. Pëqa musyarqanmi tabletchö videukunata y publicacionkunata maslla utilizarqa, mas alli yachatsikunampaq kaqta. Y Bibliachö ninqankunatapis mas alli entiendinampaq kaqta.

Huldäqa juk killa y ishkë semänapam, cada junaq cada qoyakuna o wärëkuna ishkë hörapa trabajarqan. Tsënö trabajarmi juk taksha camion junta rumita pakirqan, y tsëpita pagayanqanwannam tabletnin rantirirqan.

Huldämi kënö nin: “Tsëtsika rumikunata pakishqa karmi alläpa pishipashqa o utishqa këkarqä y cuerpüpis nanarqanmi. Peru tablet-ta rantirirqa, mas alli yachatsikunäpaq yanapamaptin y reunionkunapaq mas fäcil-lla preparakurmi nanatsikunqätapis qonqarirqä”. Tsënöqa Huldä willakun COVID-19 qeshya qallanqan witsankuna tsë tablet alläpa yanapashqa kanqantam. Tsë witsankunaqa congregacionninchö Internetllapam reunionkunata wiyayaq. Munanqanta Huldä rantita puëdinqampitaqa, ¡alläpam kushikuntsik!