1, 2. ¿Imanirtaq Jehoväpa testïgunkunapaqqa alläpa precisan shumaq vistikuyänan? (Rikäri kë yachatsikïpa qallananchö këkaq dibüjuta).

HOLANDA nacionchö juk periödicum parlarqan pushakoq religiösukuna imanö vistishqa reunionninkunaman ëwayanqampaq. Y nirqanmi kë pushakoq religiösukunapita mëtsikaq lluta vistishqa ëwayanqanta, masqa alläpa achachaptin. Jina kë periödicum nirqan, Jehoväpa testïgunkuna juk asamblëankunaman ëwayanqampita, y nirqanmi ollqu kaqkunaqa wamrapis y yashqapis säcushqa y corbätashqa ëwayanqanta y warmi kaqkunana, wamrapis y yashqapis shumaq rikakoq y alli tamäñuyoq faldawan ëwayanqanta. Imanö vistikuyanqampitam Jehoväpa testïgunkunataqa imëpis alabayan. Apostol Pablum nirqan cristiänukunaqa “sensillullata y normalllata” vistikuyänampaq kaqta, porqui tsëtam Diosqa shuyaran (1 Timoteu 2:9, 10). Kë textuchö warmikunapaq Pablu parlarpis, kë willakïqa ollqukunatapis yanapanmi.

 ² Diospa sirweqninkunapaqqa alläpam precisan shumaq vistikunantsik, porqui Diosnintsikpaqpis alläpam precisan (Genesis 3:21). Jehovällam Ciëluchö y Patsachö mandakoqqa, y pëmi cläru willamantsik imanö vistikunapaq kaqta. Tsëmi imanö röpata akranqantsikqa noqantsikllatatsu gustamänantsik, sinöqa mandakoq Jehovä Diosnintsiktam masqa gustanan.

3. ¿Imatataq Moises qellqanqa ley yachatsimantsik vistikïpita?

³ Moises qellqanqan leyqa israelïtakunatam tsapaq juk nacion nunakunapa rakcha rurëninkunapita. Tsë leyqa rikätsikoq juk ollquwan juk warmi jukläya kayanqanta mana rikätsikoq vistikïtaqa Jehovä chikinqantam (leyi Deuteronomiu 22:5 *). Moises qellqanqan leymi yachatsimantsik, juk ollqu vistikunqan röpa warmitanö rikätsiptin o juk warmi vistikunqan röpa ollqutanö rikätsiptinqa Jehoväta mana gustanqanta. Jina ollqu o warmi kanqanta cläru mana rikätsikoq röpatapis mana gustanqanta.

4. ¿Imataq cristiänukunata yanapamantsik imanö vistikunapaq kaqta alleq akranapaq?

⁴ Bibliapa musyatsikïninkunaqa vistikïnintsikta alleq akranampaqmi yanapamënintsikta puëdin. Kë musyatsikïkunaqa alalaq o achachaq markachö tärashqa o ima costumbriyoq kashqapis yanapamantsikmi. Manam wanantsiktsu ima röpata churakunapaq juk listachöraq nimänantsikta. Bibliapa musyatsikïninkunaqa yanapamantsik gustuntsikmannö röpantsik akrakunapaqmi. Rikärishun vistikï asuntuchö “Diospaq ima alli kanqanta, chaskinampaqnö kanqanta y rasumpa munënin ima kanqanta” (Romänus 12:1, 2, NM).

5, 6. ¿Imanötaq wakinkunata sientitsinman churakunqantsik röpa?

⁵ 2 Corintius 6:4 (leyi) textuchö këkaq precisaq musyatsikïta qellqanampaqmi apostol Pabluta Jehovä mandarqan. Imanö vistikunqantsikmi willakun pï kanqantsikta, y nunakunatapis pensatsin imanö nuna kanqantsikta (1 Samuel 16:7). Diospa sirweqnin karmi, gustamanqantsik y alli sientikunqantsik röpallatatsu churakuntsik. Bibliapa musyatsikïninkunaqa yanapamantsik qarantsikman laqarëkaq y cuerpuntsikta munapätsikoq röpata mana churakunapaqmi. Imanö vistikunqantsikqa manam pitapis mana alliqa sientitsinmantsu ni penqakatsinmantsu.

 ⁶ Limpiu, alli altsapäkushqa y shumaq röpawan vistishqa kashqaqa, nunakunaqa Jehoväpa sirweqninkunata y markantam respëtuwan rikäyanqa. Itsa höraqa Diosta mas reqita munayanqa y salvakïta tariyänampaq yachatsikunqantsiktapis wiyakuyanqa.

7, 8. ¿Imëtaq masqa precisan vistikïnintsikta alleq rikänantsik?

⁷ Limpiu Diosnintsikta, cristiänu mayintsikta y yachatsinqantsik nunakunata respetarninmi shumaq vistikunantsik precisan (Romänus 13:8-10). Reunionkunaman y Diospita yachatsikoq ëwashqaqa, masran precisan shumaq vistikunantsik. Vistikïnintsikqa rikätsikunanmi Diosta adoranqantsikta (1 Timoteu 2:10). Juk sitiuman imanö vistikushqa ëwanqantsikqa, juk sitiuchöqa manam allitsu rikakunman. Tsëmi Jehoväpa testïgunkunaqa mëchö tärarnimpis, imanö vistikunqantsikwan wakinkunata piñatsinantsiktsu.

⁸ (Leyi 1 Corintius 10:31). Asamblëakunaman ëwashqaqa, tsë hörapaqnömi röpantsikqa shumaq y sencïllulla  kanan. Manam kanan witsan nunakuna mana alli vistikuyanqanta qatinantsiktsu. Jina asamblëa manaraq qallaptin, asamblëa ushariptin, hotelman chanqantsik höra y ëwakunqantsik hörapis vistikïnintsikqa Diospa sirweqnin kanqantsiktam rikätsikunan. Tsënö rurarninqa, alläpa kushishqam Jehoväpa testïgun kanqantsikta willakushun y mëchö këkarpis yachatsikunapaq listum këkäshun.

9, 10. ¿Imanötaq yanapamantsik Filipensis 2:4 textu imanö vistikunqantsikchö?

⁹ (Leyi Filipensis 2:4). ¿Imanirtaq yarpachakunantsik cristiänu mayintsikkunata vistikïnintsik imanö sientitsinqanman? Porqui Diospa sirweqninkunaqa kë consëjuta wiyakuyänampaqmi kallpachakïkäyan: “Tsemi qonqëcuyena que munducho mana alli rurecunata. Ama jucwan jucwan pununacur caquicayëtsu, ni lluta puriquicayëtsu” (Colosensis 3:2, 5). Jehoväpa testïgun manaraq karninmi, wakin cristiänu mayintsikkunaqa jukwan jukwan oqllanakur ruranakï jutsata rurayaq y tsë mana alli munëta venciyänampaqqa itsa kallpachakïkäyanllaraq. Imanö vistikunqantsikta cuentaman mana churashqaqa, kë cristiänukunapaqqa mas sasam kanqa Bibliapa consëjunkunata cäsukuyänan y mana alli munëninkunata ushakätsiyänan (1 Corintius 6:9-11). Pëkunapaq tsënö sasa kanantaqa manam munantsiktsu.

¹⁰ Diospita Yachatsikuyänan Wayichö y mëchö këkarpis shumaq vistikunqantsikmi yanapakunan, cristiänu mayintsikkunawan limpiu shonquntsikwan kawakunapaq y oqllanakï jutsaman mana ishkinapaq. Rasumpam, ima röpata churakunapaq kaqtaqa kikintsikmi akrakuntsik. Peru churakunqantsik röpaqa, wakinkunatam yanapanman pensëninkuna, parlëninkuna y rurëninkuna Dios munanqannö limpiu kanampaq (1 Pëdru 1:15, 16, NM). Rasumpa kuyakïqa manam llutaqa portakunqatsu, “ni imatapis manam quiquinllapaqqa ashenqatsu” (1 Corintius 13:4, 5).

11, 12. ¿Imanötaq yanapamantsik Eclesiastes 3:1, 17 textu vistikïnintsikta alleq rikänapaq?

¹¹ Diospa sirweqninkunapaqqa imëka rurënintsikkunam kan y musyantsikmi tsëpaqnö vistikunantsik precisanqanta (Eclesiastes 3:1, 17). Ima tiempuchö këkanqantsikmannö y imakunapa pasanqantsikmannömi vistikuntsik. Peru Jehoväpa willakïninkunaqa manam cambiantsu (Malaquïas 3:6).

¹² Alläpa achachaq markakunachöqa manam fäciltsu shumaq y sencïllulla röpata akrëqa. Cristiänu mayintsikkunaqa alläpam agradecikuyan qarantsikta rikätsikoq kichki röpata o soqla (jäku) röpata mana churakunqantsikpita (Job  31:1). Jina pläyachö o piscïnachö këkashqapis, bañakunantsikpaq röpantsikqa cuerpuntsikta shumaq tsapaq röpam kanan (Proverbius 11:2, 20). Mëtsikaq nunakunam bañakuyänampaq pasëpa ichikllëlla röpata utilizäyan. Peru noqantsikqa manam vistikïnintsikwan Jehoväpa santu jutinta rakchatëta munantsiktsu.

13. ¿Imanirtaq precisan röpata akranqantsik höra 1 Corintius 10:32, 33 textuchö consëjuta yarpänantsik?

¹³ Jina röpata akranqantsik höraqa, Bibliapa juk precisaq musyatsikïninta y wakinkunapa concienciankunatam cuentaman churanantsik (leyi 1 Corintius 10:32, 33). Churakunqantsik röpaqa manam cristiänu mayintsikkunata o Jehoväta mana sirweq nunakunata mana alliqa sientikatsinantsu. Apostol Pablum kënö qellqarqan: “Noqantsicqa imecatapis alli caqta rurashun nuna mayintsicwan cushishqa cawacunantsicpaq [...]. Porqui Jesucristupis manam quiquin cushicunanpaqtsu imatapis rurarqan” (Romänus 15:2, 3). Kikimpa munëninta rurakunampa rantinmi, Jesuspaqqa Diospa munëninta rurë y wakinkunata yanapë masqa precisarqan. Noqantsikpis tsënöllam ruranantsik. Churakunqantsik röpa gustamashqapis, tsërëkur wakinkuna Diospa yachatsikïninta mana wiyakuyaptinqa manam tsë röpata churakunantsiktsu.

14. ¿Imanötaq teytakuna wamrankunata yachatsiyanman Diosnintsikta respetayänampaq?

¹⁴ Cristiänu teytakunam carguyoq kayan wamrankunata Bibliapa musyatsikïninkunata yachatsiyänampaq. Tsë carguchömi këkan Jehoväta kushitsinampaqnö vistikïta y altsapäkïta yachatsipis (Proverbius 22:6; 27:11). ¿Imanötaq teytakunaqa wamrankunata yachatsiyanman Diosnintsikta y willakïninkunata respetayänampaq? Puntataqa kikinkunam alli vistikuyänan y kuyakïwanmi yachatsiyänan imanö y mëchö alli röpata tariyänampaq kaqta. Jinamampis teytakunaqa wamrankunata yachatsiyänan gustunkunallaman röpata akrayänampa rantin, Jehoväta alabanampaq kaqman pensëkur akrayänampaqmi, porqui pëpa sirweqninmi kayan.

15. ¿Imataq yanapamäshun yachëwan akranapaq?

¹⁵ Bibliam yanapamantsik Diosta alabanampaqnö kaqta imatapis yachëwan akranapaq. Tsënö kaptimpis, röpaqa gustuntsikmannö kanqantam rikätsikun. Imanö vistikunqantsik y röpapa chanimpis manam llapantsikpatsu igual-lla kayan. Peru imëpis limpiu, alli rikakoq, sencïllu, imata ruranqantsikpaqnö y täranqantsik markachö alli rikashqam kanan.

16. ¿Imanirtaq alleq vistikunapaq kallpachakunqantsikqa allipaq kanqa?

¹⁶ Shumaq y sencïllulla röpata tarinanqa manam fäciltsu. Röpata rantikuyanqan tiendakunachöqa tsëllaraq yarqamushqa röpatam masqa rantikuyan. Tsëmi faldakunata, blüsakunata, vestïdukunata, qarantsikman alläpa mana  laqarëkaq ternukunata y pantalunkunata sencïllullata tarinapaqqa tiemputaraq wanantsik y kallpachakunantsikraq. Y tsënö kallpachakunqantsikqa allipaqmi. Porqui cristiänu mayintsikkunam cuentata qokuyanqa y agradecikuyanqa shumaq y sencïllulla vistikunqantsikpita. Jina kuyakoq teytantsik Jehovätam alabashun. Sasa kaptimpis, pëta alabanantsikrëkur shumaq vistikurninqa alläpa kushishqam sientikushun.

17. ¿Imatataq juk cristiänu cuentaman churanman shaprunta winatsita pensarqa?

¹⁷ ¿Alliku cristiänukuna shaprunkunata winatsiyanman? Moises qellqanqan leyqa llapan ollqukuna shaprunkunata winatsiyänampaqmi mandakoq. Peru cristiänukunaqa manam tsë leywannatsu kawantsik (Levïticu 19:27; 21:5; Gälatas 3:24, 25). Wakin markakunachöqa, shumaq rutushqa shaprunkunata katsiqa alli y respetëpaqmi kanman, y shapruyoq kayaptimpis Diospita yachatsikuyaptinqa wiyakuyanllam. Tsë markakunachöqa, wakin carguyoq cristiänukunaqa shaprunkunata winatsiyanmi. Tsënö kaptimpis, wakin cristiänukunaqa mana winatsiyänampaqmi decidiyan (1 Corintius 8:9, 13, NM; 10:32). Wakin markakunachöqa ollqukuna manam shaprunkunata winatsiyantsu, jina Diospita yachatsikoq nunakuna shapruyoq kayaptinqa mana allipam rikäyan. Tsënö markakunachö juk cristiänu shaprunta winatsirqa itsa Diosta alabëkanmantsu, y mana allipa rikashqam kanman (1 Timoteu 3:2, 7; Romänus 15:1-3).

18, 19. ¿Imanötaq Miquëas 6:8 textu yanapamantsik?

¹⁸ Alläpam agradecikuntsik imanö vistikunapaq y altsapäkunapaq Jehovä juk listata mana qomanqantsikpita. Tsëpa rantinqa, Bibliapa musyatsikïninkunapa yanapakïninkunawan alleq pensëkur kikintsik akrakunatam jaqimantsik. Tsëmi Miquëas 6:8 textu ninqannöpis, Diosnintsikta sirwinqantsikchö humildi kanqantsiktaqa rikätsikuntsik vistikïnintsikchö y altsapäkïnintsikchö.

¹⁹ Humildi karninqa, Jehovä chipyëpa limpiu kanqanta y willakïninkuna noqantsikpaq mas alli kanqantam yarpäshun. Y humildi këta munarqa llapan kawënintsikchömi willakïninkunata cäsukushun. Jinamampis yanapamäshunmi wakin nunakunapa sentimientunkunata y pensëninkunata respetanapaq.

20. ¿Imanötaq wakinkuna rikäyanman imanö vistikunqantsikta y altspäkunqantsikta?

²⁰ Röpantsikqa alleqmi rikätsikunan Jehoväpa sirweqnin kanqantsikta. Diospa willakïninkunaqa mas alli kaqmi, y noqantsikqa kushishqam cäsukuntsik. Llapan cristiänu mayintsikkunatam shumaq vistikuyanqampita y alli portakuyanqampita, “¡allitam rurëkäyanki!” nirinantsik. Porqui shumaq vistikuyanqampita y alli portakuyanqampitam Jehoväta alabayan y kushitsiyan, jina alli shonquyoq nunakunapis Bibliapita yachakïtam munayan. Imanö vistikunapaq alleq akrarninqa, alläpa respetashqa y jatun këwan vistishqa Diostam alabarnin sïguishun (Salmu 104:1, 2).