¿Musyarqëkiku?
¿Imanirtan Davidpa soldädunkunachöqa mana israelïta nunakunapis kayarqan?
DAVIDPA soldädunkunachöqa mana israelïta nunakunapis kayarqanmi. Karqanmi ammonïta Zëlec, hitïta Urïas y moabïta Itmä (1 Crön. 11:39, 41, 46). a Tsënöllam keretïtakuna, peletïtakuna y guitïtakunapis kayarqan (2 Sam. 15:18). Keretïtakuna y peletïtakunaqa capazchi filisteu nunakunapa kastankuna kayarqan (Ezeq. 25:16). Y guitïtakunaqa filisteu nunakunapa Gat markampitam kayarqan (Jos. 13:2, 3; 1 Sam. 6:17, 18).
¿Tsëqa imanirtan Davidqa mana israelïta nunakunata soldädunkuna kayänampaq churarqan? Pëqa segürum karqa imëpis mana traicionayänampaq kaqta, y Jehovä Diostapis llapan shonqunkunawan kuyayanqanta. Keretïtakunapaq y peletïtakunapaq parlarmi, Bibliapaq parlaq juk libru kënö nin: “Pëkunaqa, mana allikunapa pasanqan hörakunam Davidta yanapayarqan y manam dejayarqantsu”. ¿Imanötan tsënö kanqanta musyantsik? Këllaman pensarishun, benjaminïta Bicrïpa tsurin Sebaqa “problëma asheq nunam karqan”. Y Davidpa contran churakaptinmi cäsi llapan israelïtakuna pëta yanapayarqan, peru keretïtakuna y peletïtakunaqa Davidtam yanapayarqan y manam Sebata permitiyarqantsu contran churakar sïguinanta (2 Sam. 20:1, 2, 7). Juk kutichönam Davidpa Adonïas jutiyoq tsurin gobernanti këta munarqan. Tsë kutichöpis keretïtakuna y peletïtakunaqa Davidtam yanapayarqan, y Salomon gobernanti yëkunampaqmi yanapakuyarqan. Pëkunaqa clärum musyayarqan gobernanti kanampaq Salomonta Jehovä akrashqa kanqanta (1 Rëy. 1:24-27, 38, 39).
Ittäi jutiyoq guitïta nunapis manam israelïtatsu karqan, peru Davidtaqa llapan shonqunwanmi yanaparqan. Juk kutim Davidpa tsurin Absalonqa gobernanti këta munarqan, tsëmi yanapayänanta munar israelïtakunata shumaq tratar qallëkurqan. Peru Ittäiqa 600 soldädunkunawanmi Davidta yanaparqan, tsëmi Davidqa Ittäita kënö nirqan: “Këchöqa forastërullam kanki. [...] Qanyanllaran chämurqunkipis. [...] Tsëtsuraq pushäman”. Tsënö niptinmi Ittäiqa kënö nirqan: “Teytallë, Jehovä Diospa jutinchö y qampa jutikichömi neq: ‘¡Wanurpis o kawarpis qamwan juntum mëchöpis këkäshaq!’” (2 Sam. 15:6, 18-21).
Ittäiqa Jehovä churanqan gobernanti Davidtam mana dejëpa yanaparqan.
Keretïtakuna, peletïtakuna y guitïtakunaqa mana israelïta këkarpis, Jehovälla rasumpa kaq Dios kanqantam creiyaq, y Davidtaqa Jehovä akranqan gobernanti kanqanta musyarmi respetayaq. Tsëmi Davidqa tsë nunakuna yanapayanqampita alläpa agradecikoq.
a Deuteronomiu 23:3-6 textuchö këkaq Diospa Leyninqa clärum nin, ammonïtakuna y moabïtakunaqa, Israelman yëkuyta mana puëdiyanqanta. Tsënö nirqa capazchi nikarqan Israel nacionchö israelïtakunanö imëka derëchuyoq këta mana puëdiyänampaq kaqta, peru Israel nacionchöqa kawakuyta puëdiyaqmi. Leyiri Perspicacia para comprender las Escrituras libruchö. Tsëpaqqa ashiri “Ammonitas” neqchö “Se casan con israelitas” neq subtïtuluta.
