UNË KAQKUNATA estudiaq nunakunam, 1970 watachö Israel nacionchö këkaq Ein Gedi markachö, chipyëpa rupashqa rölluta tariyarqan. Y tsë markaqa këkan Wanushqa qochapa amänunchömi. Y tsëtaqa tariyarqan unë witsanchö Diospita yachakuyänan kayashqa wayita oqtïkarninmi, itsa tsëqa karqan 500 a 550 watakuna Jeus shamushqanchö. Tsë röllu alläpa rupashqa kaptinmi leyita ni kichëta puëdiyarqantsu. Tsëqa, ¿imanötaq tsë rölluta leyiyänan karqan? Juk mäquinatam utilizäyashqa tsë rölluta leyiyänampaq.

Tsë mäquinawan leyiyanqan pruëbam rikätsikun unë witsanchö escribiyanqan Diospa palabran kanqanta. Y Levïticu librupa qallanankunam tsë tariyanqan rölluchö këkan. Jina tsëchöqa hebreu idiömachömi Jehoväpa jutimpis yurin. Itsa tsë röllutaqa escribiyarqan 50 wata a 400 wata Jesus shamunqanchö. Kë rölluta manaraq tariyaptinqa, mas unë röllukunaqa wanushqa qochachö tariyanqa y cödice de Alëpu nishqan röllukunallam kayarqan. Wanushqa qochachö tariyanqan röllukunata escribiyanqampita hasta cödice de Alëpu nishqan rölluta escribiyanqanyaqqa 1000 watam pasarqan. Peru kë tariyanqan rölluqa escribikashqa tsë ishkan röllukunata escribiyanqan tiempuchömi. Tsëmi yachaq nunakunaqa niyan, Diospa Palabranqa atska waranqa watakuna pasashqa kaptimpis, kë tariyanqan rölluchö ninqannölla escribirëkanqanta.