Inti o rupay mana kaptinqa wanurishwanchi. Plantakunapis y mikuykunapis inti kaptinraqmi yakuta shoquyta puëdiyan y tsëran wëtar y wayur qallëkuyan.

¡Imanömi kushikuntsik Teyta Diosnintsik tamyatsimunqampita! Tsëwanmi murunqantsikkuna y imëka mikuykunapis jeqamun. Tsëkunata ëllupakurmi kushishqa kawakuntsik.

Wamrayoqkunaqa wamrankunapaq mikuyta y röpata mana faltatsiyänampaqmi yarpachakuyan. Tsëpaq parlarmi Bibliachö nin: ‘Ciëluchö pishqukunaman yarpäyë; pëkunaqa manam murukuyantsu, ni cosechayantsu, tsënö kaptimpis, ciëluchö Teyta Diosqa pacha juntatam katsin. ¿Manaku qamkunaqa pëkunapitapis mas väleq kayanki?’ (Mateu 6:25, 26).

‘Pensariyë liriu wëtakuna imanö winayanqanman. Noqam niyaq, manam ni Salomonpis imëkayoq këkar pëkunanö alläpa shumaqqa vistikurqantsu. Dios tsënö vistikätsirqa, ¡tsëtsuraq mana qamkunatanäqa masraq vistitsiyäshunki markäkuynin o yärakuynin pisheq nunakuna!’ (Lücas 12:27, 28).

Mikuyta y röpata tarinapaq Teytantsik Jehovä yanapëkämarnintsikqa, ¿manatsuraq maskunachöpis yanapamäshun? Awmi, mandamanqantsikkunata cäsukurninqa trabäjuta ashir kallpachakunqantsiktam bendicimunqa. Y trabäjuta tarinapaqpis yanapamashwanmi (Mateu 6:32, 33).

Y Teyta Diosnintsiktaqa mas kuyantsik intita o rupayta yarqatsimuptin, tamyatsimuptin, shumaq wëtakunata wëtatsimuptin y pishqukunata shumaq wätanqanta rikarninmi. Kananqa yachakurishun Diosnintsik imakunata ruramunampaq kaqta unë sirweqninkunata musyatsinqanta.