Tsëpaq willakurmi Jesusqa kënö nirqan: “Musyayë Diospa Gobiernun këllachöna këkanqanta” (Lücas 21:31). Y guërrakuna, patsa feyu kuyïkuna, mallaqë, imëka qeshyakuna kanampaq kaqtam willakurqan, y tsëtaqa më tsëchömi rikëkantsik (Lücas 21:10-17).

‘Ushanan junaqkunachö’ nunakuna imanö portakuyänampaq kaqtapis Bibliaqa willakunmi. Tsëtaqa tarintsik 2 Timoteu 3:1-5 textuchömi. Kanan witsan nunakuna imëka mana allikunata rurayanqanqa këchö leyinqantsiknöllam kayan.

Kë llapan rikanqantsikkunaqa musyatsimantsik, ichikllachöna Diospa Gobiernun imëka mana allikunata altsamunampaq kaqtam (Lücas 21:36). Patsapaq y sirweqninkunapaq Diosnintsik imakunata änikunqanta rikärishun.

Jesustam “churarqan llapanta mandananpaq, llapampaq puëdiq kananpaq y llapampita respetashqa kananpaq. Tsëmi më markapita karpis, mëtsë nacionpita karpis y ima idiömata parlarpis pëta sirwiyarqan. Pëpa mandakïninqa mana ushakaqmi kanqa. Puëdiq kashqantaqa manam pipis qochinqatsu ni pipis ushakätsinqatsu” (DANIEL 7:14).

¿Ima ninantaq? Diospa Gobiernunllam alli Gobiernuqa y Jesustam mandakoq kanampaq churashqa. Tsëchöqa manam sufrishunnatsu ni llakikushunnatsu.

“Manam mëqanpis ‘qeshyëkämi’ ninqatsu” (ISAÏAS 33:24).

¿Ima ninantaq? Wiskukunata, mankukunata, müdukunata manam rikäshunnatsu, ni ima qeshyapis tsarimäshunnatsu . Tsëqa mana wanushpanam kawakushun.

“Pëqa jinantinchömi guërratapis päratsin. Flëchakunatapis lanzakunatapis llapanta pakirin. Guërra carrëtakunatapis chipyëpam kayëkun” (SALMUS 46:9).

¿Ima ninantaq? Guërraqa manam mëchöpis kanqanatsu. Tsëqa yamë y trankilunam kawakushun.

“Mana alli nunakunaqa kayanqanatsu, [...] peru humildi nunakunaqa patsachömi mana wanushpa kawayanqa” (SALMUS 37:10, 11, TNM).

¿Ima ninantaq? Diosta wiyakoq nunakunallana kayaptinmi, mana alli ruraq nunakunataqa rikäshunnatsu.

“Wayinkuna sharkatsirmi kuyashqä nunakuna tsëchö täräyanqa. Üvasta plantakurmi wayïninta mikukurnin kawakuyanqa” (ISAÏAS 65:21, 22).

¿Ima ninantaq? Patsachö Diospa munënin rurakäriptinqa, llapan patsam shumaq tikrarinqa (Mateu 6:10).