Teytakunaqa, wamrankunata yachatsiyanqantam kikinkuna rurayänan. Wamrëkikunata wayichö këkar mana tsëchö këkanqëkita niyänampaq yachatsirqa, ¿rasumpa kaqta parlakuyänampaqku yachëkätsiyanki?

Davidmi kënö nin: “Wakinqa niyan, ‘ninqäta rurë y ama ruranqätaqa’, peru tsëqa manam wamrakunata yanapantsu. Nunakunaqa wakinkuna rurayanqantam masqa rurantsik. Tsëmi nikanqantsikta mana rurashqaqa, ‘¿imanirtan qamqa rurankitsu?’ nimäshun”.

BIBLIACHÖ YACHAKUNQANTSIK: “Qam, ‘ama suwakïtsu’ nir willakoq, ¿suwakunkiku?” (Romänus 2:21).

Wamrakunaqa teytankuna rurayanqanta rikarmi masqa yachakuyan. Hasta jövinna karpis, tsëmi teytakunaqa wamrankuna alli kawakuyänampaq imëkanöpa yachatsiyänan. Y tsëtaqa rurayanqa, niyanqankunata kikinkuna rurarmi.

Nicolmi kënö nin: “Wamrëkikunataqa ëka kutipis parlapëta puëdinkim. Peru ninqëkita mana ruraptikiqa, ‘¿imanirtan qamqa rurankitsu?’ niyäshunkim. Awmi wamrantsikkunaqa llapan ruranqantsiktam rikëkäyan”.

BIBLIACHÖ YACHAKUNQANTSIK: “Rarapita shamoq yachëqa manam ishkë qaqllatsu” (Santiägu 3:17).

Këman yarpë: “¿Imanötan majätawan wamräkunata rikä? ¿Imatatan televisionchö rikarä? ¿Imanö nunatan amïgükuna kayan? ¿Wakinkunapaq yarpachakokü?”. Juk parlakuychöqa, ¿wamrakuna noqanö kayänantaku munä?

Cristïnam nin: “Noqawan nunä mana rurayanqätaqa manam wamräkuna rurayänampaq niyätsu”.

Perdonta mañakuy. Wamrëkikunaqa qamkunapis pantayanqëkita musyayanmi. Tsëmi qamkuna majëkikunata y wamrëkikunata perdonta mañakuyaptikiqa, pëkunapis qamkunanölla perdonta mañakuyanqa y humildi kayanqa.

Röbinmi kënö nin: “Mana allita rurarir perdonta mañakuyaptikiqa, wamrëkikunapis tsënöllam rurayanqa”.