Imanir dejanëkipaq kaqman pensë

“Fumëta dejayänampaq decidïdu kayanqanmi fumëta dejaqkunataqa mas yanapan” (Stop Smoking Now! [¡Deje de fumar ahora!] neq libruchö willakunqan).

JUKNÖPAQA kënömi nishwan: cigärru fumëta dejëta munarqa, imanir dejanëkipaq kaqmanmi pensanëki. ¿Imatan dejëta munanëkipaq yanapashunki? Puntataqa fumëta dejanqëki imanö yanapashunëkipaq kaqman pensë.

Manam qellënikita lluta gastankinatsu. Cada junaq juk cajetïllata fumarqa, watachöqa mëtsika qellëtam gastanki. Nepal nacionpita Gyänum këta nin: “Cigärruta rantir mëtsika qellëta gastanqätaqa, manam cuentata qokurqätsu”.

Mas kushishqam kawakunki. Sudafrica nacionpita Regïnam këta nin: “Fumëta dejanqäpitaqa mas allinam kawakü, y tiempu pasanqanmannömi mas alliraq kawakü”. Fumëta dejaqkunaqa, masmi mikuypa gustunta tariyan y ima pukutanqanta o mushkunqantapis masmi cuentata qokuyan. Mas kallpayoqmi sientikuyan y mas allim rikakuyampis.

Mas alli saloryoqmi kanki. Estädus Unïduschö Centros para el Control y la Prevención de Enfermedades niyanqanmi këta nin: “Fumëta dejayanqanqa, ëka watayoq kayaptimpis, salorninkunachö mas alli kayänampaqmi ollqukunata y warmikunata yanapan”.

Mas següru sientikunëkipaqmi yanapashunki. Dinamarca nacionpita Henningmi këta nin: “Kikï imatapis decidita munar y cigärru mana controlamänanta munarmi, fumëta dejarqä”.

Familiëkita y amïguykikunatapis yanapankim. Sociedad Americana contra el Cáncer niyanqanmi këta nin: “Cigärruta fumanqëkiqa [...] läduykichö kaqkunatapis mana allitam ruran. [...] Tsëpita masta musyapakoqkunam niyan cigärrupita yarqoq y cigärruta fumaqkuna jitayanqan qoyëta o qoshnita shütaqkunaqa, pulmonninkunachö cancer yuriptin y shonqupita qeshyarnin mëtsikaq wanuyanqanta”.

Kamakoq Yayatam kushitsinki. 2 Corintius 7:1 textuchömi këta nin: “Kuyë wawqikuna y panikuna [...], cuerpuntsikta y imanö pensanqantsikta mana limpiu tikratseqkunapita limpiakushun”. Romänus 12:1 textuchönam këta nin: “Qamkunata[m] rogayaq, kawëkaq, limpiu y Diosta kushitseq qarëtanö cuerpuykikunata entregayänëkipaq”.

Espäña nacionpita Sylviam këta nin: “Cuerpuntsikta mana limpiu tikratseqkunata Teyta Dios mana allipa rikanqanta musyarirmi, cigärru fumëta dejarqä”.

Peru höraqa manam imanir dejanëkipaq kaqman pensanqëkillatsu yanapashunki, sinöqa familiëkikuna y amïguykikuna yanapayäshunëkitam wananki. ¿Imanötan pëkunaqa yanapayäshunkiman?