¿Pitaq dibüjuchö këkaq wamra?. . . Bibliaqa manam willakuntsu jutinta, peru papänimpa jutinqa Jeftëmi. Kë wamraqa ruranqanwanmi papänintawan Jehoväta kushitsirqan. ¿Masllata musyëta munankiku Jeftëpita y wamrampita?

Jeftëqa alli nunam (runam) karqan. Y wamrantapis Jehoväpitam parlapaq. Jina Israel markatapis shumaqmi dirigeq, y manam imatapis mantsaqtsu. Tsëmi israelïtakuna kënö niyarqan: “¿Manatsuraq pelyachö mandayämaqnïkuna këkullankiman?”.

Pelyachö ganayänampaqmi Jeftëqa Jehoväman mañakurqan. Y ganatsiptinqa, kutimuptin puntata chaskeqnin kaqtam Jehoväta qoykunan karqan carpa wayinchö  imëyaqpis sirwinampaq. Porqui tsë carpa wayimanmi llapan nunakuna Jehoväta adoraq ëwayaq. ¿Jeftëqa pelyachö ganarqanku? Awmi. Y tsëpita kutiramuptin, ¿musyankiku chaskeqnin puntata pï yarqurinqanta?. . .

¡Wamranmi karqan! Jeftëpaqa pëllam wamran karqan, y kananqa Diospa carpa wayinmanmi apëkunan karqan. Llakikurqanmi, peru Jehovätam awnishqa karqan. Tsëmi wamran papäninta nirqan. “Papä, Jehovätam awnirqunki y cumplinëkim”.

Pëpis llakikurqanmi. Porqui Diospa carpa wayinchö sirwirqa, manam casakïta ni wamrayoq këta puëdiyaqtsu. Peru pëqa, papänin awnikunqantam cumplita munarqan, y Jehovätam kushitsita munarqan. Tsëmi casakïpita y wamrayoq këpitapis pëpaqqa mas precisarqan. Diospa carpa wayinmanmi ëwakurqan y tsëchömi wanunqanyaq sirwirqan.

¿Jehoväwan Jeftëqa kushishqatsuraq kayarqan kë wamrawan?. . . Awmi. Qampis Jeftëpa wamrannö këta puëdinkim. Jehovä ninqanta wiyakuptiki y kuyaptikiqa alläpam kushikunqa. Papänikiwan mamëkipis alläpam kushikuyanqa.