57 KAQ YACHAKUNËKIPAQ
¿Imaraq pasanman Jehovä melananqankunata o chikinqankunata rurashqa?
Jehoväta kuyar y mana llakitsita munarpis hörataqa llakiratsishwanmi. Peru Jehoväqa melananqankunata o chikinqankunata rurar jutsallakushqam masqa llakikun (1 Corintius 6:9, 10). Tsënö kaptimpis, Teytantsik Jehoväqa perdonamänapaq y yanapamänapaqmi listu këkan. Tsëmi jutsata rurashqa manana kuyamänapaq kaqtaqa pensanantsiktsu.
1 KAQ: ¿Imatataq ruranantsik Jehovä perdonamänapaq?
Teytantsik Jehoväta kuyëkar jutsata ruraqqa, ¿imanötan sientikun? Alläpam llakikun. Peru Jehoväqa unë sirweqninkunata ninqannöllam, jutsata rurashqa kaqkunata kënö nin: “Jutsëkikuna yawarnö puka kaptimpis, rashtanömi yuraq tikranqa” (Isaïas 1:18). Rasumpa arrepentikushqaqa Jehovä perdonamantsikmi. Peru tsëpaqqa, ruranqantsik mana alli kanqanta cuentata qokurmi chipyëpa arrepentikunantsik, mana allikuna rurëtam dejanantsik y perdonamänapaqmi llapan shonquntsikwan Jehoväman mañakunantsik. Jutsa rurëman ima chätsimanqantsikpitam cuidakunantsik. Jehovä munanqannömi kawanantsik y mandakunqankunatam cäsukunantsik (leyi Isaïas 55:6, 7).
2 KAQ: ¿Imanötan anciänukunaqa yanapamantsik?
Jehoväqa jutsallakoqkunatam kënö nin: “Anciänukunata qayatsun” (leyi Santiägu 5:14, 15). Anciänukunaqa Jehoväta y wawqi paninkunatam kuyayan, tsëmi jutsallakushqapis Jehoväwan yapë amïgu kanapaq yanapamënintsikta puëdiyan (Gälatas 6:1).
Tsëmi ishkë o kima anciänukuna Diosnintsikpa Palabranwan entienditsimantsik tsë ruranqantsik imanir mana alli kanqanta. Y jutsa rurëman yapë mana ishkinapaq imata ruranapaq kaqtam consejamantsik y animamantsik. Peru mana arrepentikoqkunataqa congregacionpitam rakiyan, y tsëtaqa rurayan mana allikunapita wawqi panikunata cuidarmi.
MASLLA YACHAKUSHUN
Jutsata ruranqantsikpita perdonamänapaq Jehovä imata ruranqantam alli entiendinëki y valoranëki.
3 KAQ: Jutsata rurarqa willakunantsikmi
Jutsata ruranqantsikqa Teytantsik Jehovätam alläpa llakitsin, tsëmi imëpis willakunantsik. Leyiyë Salmus 32:1-5 ima ninqanta y këpaq parlayë:
-
Upälla kakunantsikpa rantin, ¿imanirtan jutsata ruranqantsikta Jehoväta willanantsik?
Jutsantsikta Jehoväta willarpis alli sientikunapaqqa anciänukunatam willanantsik yanapamänapaq. VIDEUTA rikäyë y këpaq parlayë:
-
¿Imanötan Canonta anciänukuna yanapayarqan Jehoväwan yapë amïgu kanampaq?
Anciänukuna yanapamänapaqqa, jutsata ruranqantsiktam llapanta y rasumpa kaqta willakunantsik. Leyiyë Santiägu 5:16 ima ninqanta y këpaq parlayë:
-
¿Imanirtan anciänukuna yanapamänapaq mas fäcil kanqa jutsata ruranqantsikta llapanta y rasun kaqta willanqantsik?
Jutsata ruranqëkita Jehoväta willë, anciänukunata willar rasumpa kaqta y llapanta willë, y Jehovä yanapashunëkita permiti.
4 KAQ: Jehoväqa jutsata rurashqakuna arrepentikuyaptin llakipanmi
Pipis jutsata ruranqampita mana arrepentikur y Jehovä mandakunqankunata mana cäsukurqa, congregacionpitam rakishqa kanqa. Pëkunawanqa mananam juntakänantsiktsu. Leyiyë 1 Corintius 5:6, 11 ima ninqanta y këpaq parlayë:
-
Llapantsikmi musyantsik wallka levadüralla llapan masata poqutsinqanta. Tsëqa, ¿imanirtan allitsu kanman mana arrepentikoqkunawan wawqikuna y panikuna juntakäyanqan?
Jehovä Diosnintsiknö kuyakoq y llakipäkoq karmi, anciänukunaqa congregacionpita rakishqa këkaqkunata shumaq yanapayan. Congregacionpita rakishqa këkaqkunaqa corregiyanqan allipaq kashqa kanqanta cuentata qokurmi Jehoväta yapë sirwiyänampaq mëtsikaq kutiyämushqa (Salmus 141:5).
¿Imanötan Jehovä Diosqa rikätsikun jutsata rurashqakunata kuyanqanta y llakipanqanta?
5 KAQ: Rasumpa arrepentikushqaqa Teytantsik Jehovä perdonamantsikmi
Oqrakashqa üshanta juk nuna tarïkur alläpa kushikunqanta Jesus willakunqanta leyirmi musyantsik, arrepentikuyaptin Jehovä imanö sientikunqanta. Leyiyë Lücas 15:1-7 ima ninqanta y këpaq parlayë:
-
Këchö Jesus willakunqanqa, ¿imatataq Jehoväpita yachatsimantsik?
Leyiyë Ezequiel 33:11 ima ninqanta y këpaq parlayë:
-
¿Imatataq ruranantsik rasumpa arrepentikushqa karqa?
Üshankunapaq juk mitsikoq yarpachakoqnömi, Jehoväqa sirweqninkunapaq yarpachakun.
WAKIN IMA NIYANQAN: “Congregacionpita rakiyämänanta mantsarmi, jutsa ruranqäta anciänukunata willätsu”.
-
Pipis tsënö nishuptikiqa, ¿ima ninkimanraq?
KËTAM YACHAKURQUNKI
Jehovä melananqankunata rurar jutsallakushqapis, rasumpa arrepentikushqa y yapë manana rurashqaqa Jehovä perdonamantsikmi.
¿Yarpankiku?
-
¿Imanirtan jutsata ruranqantsikta Jehoväta willanantsik?
-
¿Imatataq ruranantsik Jehovä perdonamänapaq?
-
Jutsata rurashqa karqa, ¿imanirtan anciänukunata yanapamänapaq willanantsik?
MASTA YACHAKUY
Isaïas 1:18 ninqannömi Jehoväqa perdonakoq. Tsëta musyanqan juk nunata imanö yanapanqanta rikë.
Mana arrepentikoqkunata congregacionpita rakiyanqan imanö yanapakunqanta yachakuy.
“Anciänukuna jutsata rurashqakunata kuyayë y llakipäyë” (Täpakoq, agostu 2024)
Mana arrepentikoqkunata congregacionpita rakiyanqanta mana Testïgu kaqkunata imanö entienditsinëkipaq yachakuy.
“¿Imanötan yanapashwan congregacionpita rakishqa kaqkunata?” (Täpakoq, agostu 2024)
Jehovä yanapëkanqanta juk nuna imanö cuentata qokunqanta yachakunëkipaq, “Jehoväman kutïtam wanarqä” neqta leyi.
“Bibliam yanapashqa jukläyana kawakuyänampaq” (Täpakoq, 1 de abril 2012)
