Qochachö mantsakëpaq laqcheqsaq yakuchö cäsi hundikärirmi, qochapa kuchunman chäriyarqan, y tsëchömi alläpa mantsakëkuyarqan. Sepultürakuna këkaqpitam supëyoq ishkë alläpa lïsu nunakuna yarqurir Jesus kaqman ëqipa ëwayarqan. Marcuswan Lücasqa juknin nunallapaqmi qellqayanqanchö willakuyan. ¿Imanir? Itsachi tsë nunaqa mas lïsu karqan y mas tiempupana supëkunapa makinchö këkarqan.

Tsë nunaqa röpannaqmi pureq. “Paqasta junaqtam imëpis sepultürakuna kaqchö y jirkakunachö qaparir qayarir y rumikunawan roqukur” kakoq (Marcus 5:5). Alläpa lïsu kaptinmi tsë nänipa puritaqa ni pipis valuraqtsu. Wakinqa cadënakunawan y grillëtikunawanmi watëta tïrashqa kayarqan, peru pëqa chipyëpam rachiratseq. Manam pipis dominëta puëdirqantsu.

Tsë nunaqa Jesuspa puntanmanmi qonqurikïkurqan. Tsënam tsë supëkunaqa tsë nunata kënö qayarïkatsiyarqan: “¿Imatataq noqapita munanki, Llapampa Janampa Këkaq Diospa Tsurin Jesus? Diospa jutinchö jurëkur mana sufritsimänëkipaqmi neq”. Tsëpitanam, mana alli espïritukunata dominanampaq autoridäyoq kanqanta rikätsikurnin Jesus kënö nirqan: “Kë nunapita yarqï mana alli espïritu” (Marcus 5:7, 8).

Rasumpa kaqchöqa, pëchöqa mëtsika supëkunam kayarqan. Tsëmi jutin ima kanqanta Jesus tapuptinqa kënö nirqan: “Jutïqa Tröpam, porqui mëtsikaqmi kayä” (Marcus 5:9). Röma nacionpa juk tröpanchöqa atska waranqa soldädukunam kayaq, tsëmi “jutïqa Tröpam” nirqa mëtsika supëkuna tsë nunata controlayanqanta rikätsikurqan. Tsë nunata sufritsirnin kushikoq mana alli espïritukunaqa, “wanwanyarëkaq uchkuman” Jesus mana jitarkunampaqmi rogakuyarqan. Pëkunaqa, mandaqnin Satanaswan mëchö ushayänampaq kaqtaqa musyayaqmi (Lücas 8:31).

Tsë kinrëchömi 2.000 kuchikuna mikïkäyarqan, Moises qellqanqan Ley ninqanmannöqa tsë animalkunaqa rakcham kayaq y judïukunaqa manam watëta puëdiyaqtsu. Tsëmi supëkunaqa Jesusta kënö mañakuyarqan: “Kuchikunaman  kachëkayämë pëkunaman ulluyänäpaq” (Marcus 5:12). Ëwayänanta Jesus jaqiriptinmi, tsë nunapita yarqurir kuchikunaman ullukïkuyarqan. Tsë höram tsë 2.000 kuchikunaqa jirkampita qochaman jeqakurkuyarqan y shenqakar wanuriyarqan.

Tsënam kuchi mitseqkunaqa, jinan höra ëqipa ëwar ima pasakunqanta tsë markachö willakuyarqan. Tsëmi tsëchö täraqkunaqa ima pasakushqa kanqanta rikaq ëwayarqan. Chärirqa, tsë nunata juiciunchöna y sänutanam taririyarqan. Y Jesuspa chakin kaqchömi vistishqana tëkarqan.

Ima pasakunqanta musyareq kaqkuna o tsë nunata rikaq kaqkunaqa alläpam mantsakäyarqan, y ima mastapis Jesus ruranampaq kaqtam mantsayarqan. Tsëmi markankunapita ëwakunampaq niyarqan. Barcuman Jesus lloqarkuptinqa, tsë nunaqa pëwan ëwakunampaqmi mañarqan. Peru Jesusqa kënömi nirqan: “Wayikita ëwakï kastëkikuna kaqman, y qampaq Jehovä imëkakunata ruramunqanta y alläpa ankupäshunqëkita pëkunata willë” (Marcus 5:19).

Kachakätsinqan nunakunataqa, pitapis mana willakuyänampaqmi neq, nunakuna yaparkuryan imatapis ruranqanta willakuyänantaqa manam munaqtsu. Peru, kikin Jesusta mana wiyëta puëdeqkunata y alläpa poderyoq kanqantaqa, tsë nunaqa willakïta puëdinmanmi karqan, porqui pëpitam supëkunata qarqushqa karqan. Jinamampis, kuchikuna imanöpa wanuyanqampaq mana allita parlayanqankuna mana rasumpa kanqantam cläru rikätsikunman karqan. Tsëmi tsë nunaqa ewkurqan y entëru Decäpolis kinrëchö pëpaq Jesus imata ruranqanta willakurqan.