Mana allikunaqa qallarqan Satanás ulikunqampita o llullakunqampita patsëmi. Qallananchöqa alli y jutsannaq angelmi karqan, pero ‘rasonpa caqcunataqa manam gustarqantsu’ (Juan 8:44). Diostanö adorayänantam munarqan. Tsëmi Diosta mana cäsur pëllata wiyakunampaq Ëvata engañarqan. Adanpis warminnöllam Diosta wiyakurqantsu. Tsëta rurayanqampitam tukï sufrimientokuna y wanïpis kan.​—Lei Génesis 3:1-6, 19.

 Eva Diosta mana wiyakunampaq rurarmi Satanasqa Diospita rebelakur qallëkurqan. Tsënöpam Jehovälla Ciëlochö y Patsachö Mandakoq kanqampa contran tikrarirqan. Diosta mana wiyakur mëtsika nunakuna o runakuna yanapayaptinmi Diabluqa ‘cay munduta mandag’ tikrarishqa.​—Lei Juan 14:30, NTCN y 1 Juan 5:19.

 Jehová kamashqanqa llapampis allillam. Mandamientonkunata cumplita puëdeqtam nunakunata y angelkunatapis Diosqa kamarqan (Deuteronomio 32:4, 5). Alli kaqta o mana alli kaqta akrakunapaqmi Diosnintsikqa kamamashqantsik. Tsënöpam kuyanqantsikta rikätsita puëdentsik.​—Lei Santiagu 1:13-15 y 1 Juan 5:3.

 Jehoväqa, contran churakashqakunata juk tiempollapam dejarishqa. ¿Imapaq? Mëqan gobiernopis mana pëpa yanapakïninwanqa nunakunata yanapëta mana puëdeyanqanta rikätsikunampaqmi  (Eclesiastés 7:29; 8:9). 6.000 wata nunakuna gobernayanqanchöqa manam ushakätsiyashqatsu mana alli rurëkunata, guërrakunata ni ima qeshyakunatapis.​—Lei Jeremías 10:23 y Romanos 9:17.

 Pero Dios gobernamänata munanqantsikqa yanapamantsikmi (Isaías 48:17, 18). Ichikllachönam Jehoväqa gobiernokunata ushakäratsimunqa. Y pëpa Gobiernonta yanapaqkunallam Patsachöqa kawayanqa (Isaías 11:9).​—Lei Daniel 2:44.

 Rikäri ¿Imanirtaq sufrimientukunata Dios permitin? neq videuta

 Satanasqa nirqan, Dios bendeciptinlla nunakuna pëta sirwiyänampaq kaqtam. Pacienciayoq Dios kaptinmi alli rurënintsikkunawan rikätsikuntsik Diablu uli o llulla kanqanta y Diospa Gobiernonllata yanapëkanqantsikta.​—Lei Job 1:8-12 y Proverbios 27:11.

 Diosta sirwita munarqa pë munanqannömi adoranantsik, Bibliapita yachatsikoq religiontam ashinantsik, y yachakunqantsiknöllam kawanantsik (Juan 4:23). Jina polïticata y guërrakunata Jesusnölla mana yanaparqa Satanaspa gobiernonta chikinqantsiktam rikätsikushun.​—Lei Juan 17:14.

 Satanasmi tukï mana allikunata pï mëta ruratsin. Y tsëkunata mana rurashqaqa quizá amïgontsikkuna, y familiantsikkuna noqantsikpita burlakuyanqa, o imëkata ruramäshun (1 Pedru 4:3, 4). Tsënö pasamashqaqa, ¿Diosta kuyaqkunawantsuraq këkäshun? ¿Wiyakushuntsuraq kuyakur y yachaq kar qomanqantsik leyninkunata? Tsëta rurarqa rikätsikushun, sufrimientokunapa pasarqa pipis Diosta dejarinampaq Satanás ninqan mana rasumpa kanqantam.​—Lei 1 Corintios 6:9, 10 y 15:33.

 Diosnintsik kuyamanqantsikmi claro rikätsikun sufrimientokunata y mana alli rurëkunata ushakätsinampaq kaqta. Tsëkunaman creeqkunaqa Patsachömi imëyaqpis kawayanqa.​—Lei Juan 3:16.