2 KAQ YACHAKUNËKIPAQ

Bibliachöqa alli noticiakunam kan

KICHË

Kananqa pïmëmi mana allikunapa pasar sufriyan, llakikuyan y imanö këta puëdiyantsu. ¿Imëllapis tsënö pasashurqunkiku? Capaz qeshyarnin o pïnikipis wanushqa kaptin llakishqa këkanki, y quizaschi, “¿imëllapis kushishqa kashaqtsuraq?” nir yarpachakuykanki. Tsënö kaptinqa, Bibliachö alli noticiakunam yamë kanëkipaq yanapashunki.

1 KAQ: ¿Ima alli noticiakunatan Bibliachö kan?

Kanan witsan alläpa sufrimientukuna imanir kanqantam Bibliachöqa willakun, peru alli noticiakunatapis willakunmi. Ichikllachöna llapan mana allikuna ushakänampaq kaqta y allina y shumaqna kawakunapaq kaqtam nimantsik (leyi Jeremïas 29:11, 12). Tsëta musyanqantsikqa imata pasarpis alli tsarakunapaq y yamë kanapaqmi yanapamantsik. Bibliachöqa mana wanurna kushishqa kawakunapaq kaqtam nin.

2 KAQ: ¿Ima manana kanampaq kaqtatan Bibliachö nin?

Mananam kanqanatsu sufrimientu, mallaqë, imëkata faltapakuy, chikinakuy, qeshya ni wanuypis. Bibliachöqa clärum nin manana wanur, ni llakikur, ni waqar ni nanatsikur kanapaq kaqta (leyi Apocalipsis 21:4). Entëru Patsam shumaq tikranqa y mana wanurnam kushishqa kawakushun.

3 KAQ: ¿Imaraq yanapashunki Bibliachö ninqanta creinëkipaq?

Pïmëmi munayan imëkapis altsakänanta, peru, “¡imëraq tsëqa kanqa!” niyanmi. Llapan mana allikuna ushakänampaq kaqta Bibliachö ninqanqa, ¿rasumpatsuraq kanqa? Awmi, peru tsëta musyanapaqqa Bibliatam ‘alli estudianantsik’ (Hëchus 17:11). Tsënö ruranqëkim yanapashunki Bibliachö ninqanta creinëkipaq.

MASLLA YACHAKUSHUN

Bibliachö alli noticiakunatam maslla yachakushun, y tsë alli noticiakuna jukkunata imanö yanapëkanqantam rikäshun.

4 KAQ: Bibliachöqa allina kawakunapaq kaqtam nin

Bibliachö ima alli noticiakuna kanqanta yachakuy. ¿Mëqan kaqtan mas gustashunki? ¿Imanirtan gustashunki?

Bibliachö ima ninqanta leyiyë y këkunapaq parlayë:

Bibliachö alli noticiakunaqa, ¿yanapamantsikku? ¿Familiëkikunata y reqishqëkikunataqa yanapanmantsuraq?

Këchö ninqannö kawëkänëkipaq kaqta pensë:

MANAM NI PIPIS...	LLAPANTSIKMI...
... sufrinqanatsu, awkinyanqanatsu, chakwanyanqanatsu ni wanunqanatsu (Isaïas 25:8)	... familiantsikkuna y reqishqantsikkuna kawarimoqta rikäshun (Juan 5:28, 29)
... qeshyanqanatsu ni imampis nananqanatsu (Isaïas 33:24; 35:5, 6)	... qeshyashunnatsu ni awkinyäshuntsu o chakwanyäshuntsu (Job 33:25)
... justiciata ashir sufrinqanatsu (Isaïas 32:16, 17)	... imëkayoq kashun, wayintsik kapamäshun y alli trabäjuyoq kashun (Salmus 72:16; Isaïas 65:21, 22)
... guërrakunarëkur sufrinqanatsu (Salmus 46:9)	... imatapis mana mantsarna yamë kawakushun (Salmus 37:11)
... imapis llakitsinqanta yarpar sufrinqanatsu (Isaïas 65:17)	... mana wanurna kushishqa kawakushun (Salmus 37:29)

5 KAQ: Bibliachö alli noticiakunaqa allina kawakunapaqmi yanapamantsik

Pïmëmi imëka mana allikuna pasaqta rikar cölerashqa këkäyan. Wakinqa imëkapis altsakänanta munarmi imëkata rurayan. Bibliachö alli noticiakuna atskaqta imanö yanapanqanta rikë. VIDEUTA rikäyë y këkunapaq parlayë:

VIDEU: Mana alli kaq rurëkunapa contranmi churakëta tïrarqä (4:07)

Rafïka jutiyoq warmiqa, ¿imakunapaqtan yarpachakoq?
¿Imanötan Bibliapita yachakunqan yanaparqan?

Bibliachö alli noticiakunaqa justicia mana kaptimpis mana llakikunapaq y shonquntsikchö yamë kanapaqmi yanapamantsik. Leyiyë Proverbius 17:22 y Romänus 12:12 ima ninqanta y këpaq parlayë: